ខេត្តពោធិ៍សាត់ ៖ ពលរដ្ឋក្រីក្រចាស់ជរា និងការងារបង្កបង្កើតផលជួបគ្រោះរាំងស្ងួតចំនួន៨៥៧គ្រួសារ នៅស្រុកបាកាន និងស្រុកកណ្ដៀង បានទទួលអំណោយមនុស្សធម៌ពីកាកបាទក្រហមកម្ពុជា កាលពីថ្ងៃទី១២ កញ្ញា ២០១៥ ដែលបានប្រារព្វធ្វើនៅវិទ្យាល័យអូរតាប៉ោង ក្រោមអធិបតីភាព លោក អ៊ុយ សំអាត ប្រធាននាយកដ្ឋានគ្រប់គ្រងគ្រោះមហន្តរាយតំណាង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងមានការចូលរួមពីលោក ម៉ៅ ធនិន អភិបាលខេត្ត និងជាប្រធានកិត្តិយសសាខាកាកបាទក្រហមកម្ពុជាខេត្ត ។
លោក ម៉ៅ ធនិន បានជម្រាបជូនថា រយៈពេល៨ខែ ឆ្នាំ២០១៥នេះ ខេត្តបាននាំយកអំណោយមនុស្សធម៌សាខាកាកបាទក្រហមកម្ពុជា ចែកជូនជនរងគ្រោះបានចំនួន៥.៤២៨គ្រួសារ ក្នុងនោះ ភ្លើងឆេះផ្ទះ៤៥គ្រួសារ ខ្យល់កន្ត្រាក់រលំផ្ទះ១៨២គ្រួសារ ក្រីក្រចាស់ជរាជនពិការ កុមារកំព្រា ផ្ទុកមេរោគអេដស៍ និងគ្រោះថ្នាក់ដោយប្រការផ្សេងៗចំនួន៥.១៩៧គ្រួសារ ។ ចំពោះការងារសុខភាពបានអប់រំដល់ស្ត្រីមានផ្ទៃពោះបាន៥២១នាក់ ចុះសួរសុខទុកនិងនាំយកសម្ភារៈជូនស្ត្រីសម្រាលកូននៅតាមមណ្ឌលសុខភាពបាន៣៤នាក់ ព្រមទាំងបានផ្សព្វផ្សាយអំពីគ្រោះថ្នាក់់ដោយសារមីន និងគ្រាប់មិនទាន់ផ្ទុះនៅស្រុកវាលវែងចំនួន៣០លើក មានអ្នកចូលរួម២.៦២៥នាក់ ក្នុងនោះកុមារ១.៤៣២នាក់ ។
លោក អ៊ុយ សំអាត ថ្លែងថា កាកបាទក្រហមកម្ពុជា បានផ្ដល់អាទិភាពក្នុងការផ្ដល់អំណោយមនុស្សធ៌មដល់ពលរដ្ឋរងគ្រោះធ្ងន់ធ្ងរមុនគេ តែក៏មិនភ្លេចអ្នកលំបាកខ្វះខាតនិងរងផលប៉ះពាល់ដោយកត្តាផ្សេងៗដែរ ។ ជាក់ស្ដែង ថ្ងៃនេះសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានឲ្យក្រុមការងារនាំយកអំណោយមនុស្សធម៌មកផ្ដល់ជូនពលរដ្ឋក្រីក្រចាស់ជរាជនពិការ និងប៉ះពាល់គ្រោះរាំងស្ងួតនៅក្នុងស្រុកបាកាន និងស្រុកកណ្ដៀងចំនួន៨៥៧នាក់ ដោយមិនប្រកាន់និន្នាការនយោបាយអ្វីឡើយ ពោលគឺឲ្យតែប្រជាពលរដ្ឋដែលរស់នៅលើទឹកដីខ្មែរ ហើយទទួលរងគ្រោះ គឺសុទ្ធតែទទួលបាននូវការជួយឧបត្ថម្ភពីកាកបាទក្រហមស្មើៗគ្នាគ្រប់ក្រុមគ្រួសារដើម្បីជួយសម្រាលជីវភាពរស់នៅដោយឈរលើគោលការគ្រឹះទាំង០៧ប្រការរបស់កាកបាទក្រហម ។
សូមបញ្ជាក់ថា ប្រជាពលរដ្ឋដែលមកទទួលអំណោយពីកាកបាទក្រហមកម្ពុជានាពេលនេះ មានចំនួន៨៥៧គ្រួសារ មកពីឃុំអូរតាប៉ោង ស្វាយដូនកែវ បឹងបត់កណ្ដោល បឹងខ្នារ តាលោ មេទឹកស្រយកបាកាន និងមកពីសង្កាត់លលកស ក្រុងពោធិ៍សាត់ ឃុំកោះជុំស្រុកកណ្ដៀង ដោយក្នុងមួយគ្រួសារៗទទួលបានអង្ករ៣០គីឡូក្រាម មីមួយកេស ត្រីខ១០កំប៉ុង ឃីតមួយកញ្ចប់ ក្នុងនោះ មាន សារុងមួយ ក្រមា១ ភួយ១ និងមុង១ ៕
ចែករំលែកព័តមាននេះ