រាជធានីភ្នំពេញ ៖ មានករណីទុស្សេខ្សែភ្លើងបង្កជាអគ្គីភ័យឆាបឆេះយ៉ាងសន្ធោសន្ធៅ និងមានផ្សែងខ្មៅហុយឃ្មួលខ្មាញ់ឡើងលើបង្កឱ្យមានការភ្ញាក់ផ្អើលយ៉ាងខ្លាំងដល់រថយន្តពន្លត់អគ្គីភ័យចំនួន២គ្រឿងចុះមកជួយអន្តរាគមន៍បាញ់ទឹកពន្លត់ផងដែរ។ ហេតុការណ៍ខាងលើនេះបានកើតឡើងកាលពីវេលាម៉ោង១០និង១៥នាទីព្រឹកថ្ងៃទី២២ ខែមីនា ឆ្នាំ ២០២១ នៅចំណុចមុខផ្ទះលេខ ២២៣…
រាជធានីភ្នំពេញ ៖ មានករណីទុស្សេខ្សែភ្លើងបង្កជាអគ្គីភ័យឆាបឆេះយ៉ាងសន្ធោសន្ធៅ និងមានផ្សែងខ្មៅហុយឃ្មួលខ្មាញ់ឡើងលើបង្កឱ្យមានការភ្ញាក់ផ្អើលយ៉ាងខ្លាំងដល់រថយន្តពន្លត់អគ្គីភ័យចំនួន២គ្រឿងចុះមកជួយអន្តរាគមន៍បាញ់ទឹកពន្លត់ផងដែរ។
ហេតុការណ៍ខាងលើនេះបានកើតឡើងកាលពីវេលាម៉ោង១០និង១៥នាទីព្រឹកថ្ងៃទី២២ ខែមីនា ឆ្នាំ ២០២១ នៅចំណុចមុខផ្ទះលេខ ២២៣ ផ្លូវលេខ ១៩៩ កែងផ្លូវ ៤៣០ (ម្តុំខាងក្រោយផ្សារសុវណ្ណា) ស្ថិតក្នុងសង្កាត់ទំនប់ទឹក ខណ្ឌបឹងកេងកង រាជធានីភ្នំពេញ ។
តាមប្រភពព័ត៌មានពីសមត្ថកិច្ចបានប្រាប់ឱ្យដឹងថា មុនពេលកើហេតុ អ្នករស់នៅក្បែរខាងកន្លែងកើតហេតុខាងលើបានឮសំឡេងផ្ទុះ និងបែកផ្កាភ្លើងចេញពីប្រអប់ភ្លើងមួយនៅលើបង្គោលភ្លើងថ្មមួយដែលមានខ្សែភ្លើង និងបណ្តាញខ្សែកាប្លិ៍យ៉ាងច្រើន ដែលគេចងផ្តុំគ្នាមួយសំណុំធំ ហើយក៏មានខ្សែមួយចំនួននៅរាយប៉ាយក្បែរគ្នានោះផងដែរ។ ស្របពេលដែលមានសំឡេងទុស្សេខ្សែភ្លើង និងបែកផ្កាភ្លើងព្រាកៗចេញពីប្រអប់ភ្លើងមួយខាងលើភ្លាមនោះ ក៏ស្រាប់តែមានអណ្តាតភ្លើងចាប់ផ្តើមឆាបឆេះលើបង្គោលភ្លើង ហើយអ្នករស់នៅក្បែរខាងក៏បាននាំគ្នារត់ទៅយកបំពង់ពន្លត់អគ្គិភ័យមកបាញ់ពន្លត់អស់ជាច្រើនបំពង់ដែរ តែមិនរលត់ឡើយ។
តាមប្រភពដដែលបានប្រាប់ទៀតថា ពេលនោះ ភ្លើងក៏បានឆាបឆេះខ្សែភ្លើងនៅលើបង្គោលភ្លើងកាន់តែខ្លាំងឡើងៗ និងរាលដាលជាបបន្តបន្ទាប់ ធ្វើអោយខ្សែភ្លើង និងខ្សែកាប្លិ៍មួយចំនួនត្រូវបានដាច់ធ្លាក់មកដី ហើយអណ្តាតភ្លើងឆាបឆេះយ៉ាងសន្ធោសន្ធៅ និងមានផ្សែងខ្មៅហុយឃ្មួលខ្មាញ់ បានធ្វើអោយអ្នករស់នៅក្នុងផ្ទះជួលមួយកន្លែងនៅក្បែរកន្លែងកើតហេតុនោះជាច្រើននាក់នាំគ្នាមានការភ័យស្លន់ស្លោយ៉ាងខ្លាំង ដោយសារតែរកផ្លូវរត់ចេញពីក្នុងផ្ទះមកខាងក្រៅមិនរួច។
តាមប្រភពដដែលបានបន្តទៀតថា ខណៈដែលភ្លើងកំពុងតែឆាបឆេះបង្គោលភ្លើងយ៉ាងសន្ធោសន្ធៅនោះ ក៏មានកម្លាំងសមត្ថកិច្ចមូលដ្ឋានបានចុះមកដល់និងហៅរថយន្តពន្លត់អគ្គិភ័យរបស់ស្នងការនគរបាលរាជធានីភ្នំពេញចំនួន២គ្រឿងចុះមកជួយធ្វើអន្តរាគន៍បាញ់ទឹកពន្លត់ភ្លាមៗផងដែរ ។ (សូមបញ្ជាក់ថា បង្គោលភ្លើងមួយនៅចំណុចកើតហេតុខាងលើនេះ កាលពីពេលកន្លងទៅក៏ធ្លាប់កើតមានករណីអគ្គិភ័យឆាបឆេះយ៉ាងខ្លាំងបែបនេះជាច្រើនដងរួចមកហើយដែរ)។
ពាក់ព័ន្ធនិងករណីអគ្គិភ័យឆាបឆេះខ្សែភ្លើងលើបង្គោលភ្លើងខាងលើនេះដែរ គឺកើតឡើងដោយសារតែទុស្សេខ្សែរភ្លើង ហើយបណ្តាលឱ្យខ្សែភ្លើង និងខ្សែរកាប្លិ៍ជាច្រើនខ្សែរត្រូវបានភ្លើងឆេះដាច់ធ្លាក់រាយប៉ាយពេញដីរងការខូចខាត ដោយឡែកកម្លាំងមានសមត្ថកិច្ចបានប្រើប្រាស់ទឹកបាញ់អស់ចំនួន២គ្រឿង ទើបភ្លើងរលត់ទៅវិញ និងមិនបានឆេះរាលដាលដល់ផ្ទះនៅក្បែរខាង និងមិនបង្ករអោយមនុស្សណាម្នាក់រងគ្រោះថ្នាក់ឡើយ ៕
ចែករំលែកព័តមាននេះ