មន្ទីរបរិស្ថានរបស់ខេត្តយ៉ាម៉ាណាស៊ី និងខេត្តស៊ីស៊ូអូកេ ដែលជាទីតាំងនៃច្រកឡើងទស្សនាភ្នំភ្លើងហ្វូ៊ជី (Fuji) កំពុងផ្សព្វផ្សាយបញ្ចុះបញ្ចូលអ្នកទេសចរដែលឡើងភ្នំភ្លើងហ៊្វូជី ត្រូវពាក់ឧបករណ៍ការពារសុវត្ថិភាពចំនួន៣ប្រភេទ
មន្ទីរបរិស្ថានរបស់ខេត្តយ៉ាម៉ាណាស៊ី និងខេត្តស៊ីស៊ូអូកេ ដែលជាទីតាំងនៃច្រកឡើងទស្សនាភ្នំភ្លើងហ្វូ៊ជី (Fuji) កំពុងផ្សព្វផ្សាយបញ្ចុះបញ្ចូលអ្នកទេសចរដែលឡើងភ្នំភ្លើងហ៊្វូជី ត្រូវពាក់ឧបករណ៍ការពារសុវត្ថិភាពចំនួន៣ប្រភេទ រួមមានមួកការពារសុវត្ថិភាព វ៉ែនតា និងមា៉ស់ការពារធូលី ដើម្បីការពារខ្លាចដុំថ្មធ្លាក់លើ និងការហុយផេះពីភ្នំភ្លើង ដែលអាចកើតឡើងជាយថាហេតុ ។
អង្គភាពផ្នែកសុវត្ថិភាពនៅភ្នំភ្លើងហ៊្វូជីចាប់ផ្តើមបំផុសបំផុលពីបទដ្ឋានសុវត្ថិភាពដល់អ្នកឡើងភ្នំ គឺត្រូវពាក់ឧបករណ៍ការពារសុវត្ថិភាព តាំងពីដើមរដូវក្តៅលើកដំបូងក្នុងឆ្នាំ២០១៥នេះ ប៉ុន្តែមានអ្នកយកចិត្តទុកដាក់លើបញ្ហានេះតិចតួចបំផុត ។
ក្នុងរយៈពេល៩ថ្ងៃដំបូង ខេត្តទាំង២បានបើកច្រកឱ្យភ្ញៀវឡើងភ្នំហ៊្វូជី បានប្រហែល៥៦៨៣នាក់ ប៉ុន្តែមានអ្នកពាក់មួកត្រឹមតែ២០នាក់ប៉ុណ្ណោះ ខណៈពេលអ្នកទេសចរជាច្រើនរូបនិយាយថា ពួកគេមិនដឹងព័ត៌មានឱ្យពាក់ឧបករណ៍សម្រាប់ការពារនោះទេ ។ ចំណែកមួយចំនួនទៀតប្រាប់ថា «បានដឹង» ប៉ុន្តែមិនចង់ប្រើឧបករណ៍ច្រើននៅតាមខ្លួន ព្រោះជាបន្ទុក ។
ចៅហ្វាយក្រុងហ៊្វូជីយ៉ូស៊ីដា ខេត្តយ៉ាម៉ាណាស៊ី ជាច្រកឡើងភ្នំដ៏សំខាន់បានបញ្ជាក់ថា លោកព្រួយបារម្ភព្រោះស្ទើរតែគ្មានអ្នកទេសចរណាម្នាក់ពាក់ឧបករណ៍ការពារទេ ទោះបីមួកសុវត្ថិភាពបច្ចុប្បន្នមានទម្ងន់ស្រាល និងអាចផ្លាស់ប្តូរខ្យល់អាកាសបានល្អក្តី ។ អង្គភាពផ្នែកសុវត្ថិភាពនឹងបង្កើនការទាក់ទងជាមួយអ្នកទេសចរថែមទៀត រួមទាំងពិចារណាឱ្យពួកគេឡើងភ្នំគួរពាក់មួកសុវត្ថិភាពចាប់ពីឆ្នាំក្រោយតទៅ ៕
ចែករំលែកព័តមាននេះ