សារព័ត៌មានបរទេសកាលពីពេល ថ្មីៗកន្លងមកផ្សាយថា អ្នកស្រុកប្រទះឃើញចៀមឈ្មោលរស់នៅឯកានាជាយក្រុងកង់បេរ៉ា ប្រទេសអូស្ត្រាលី ។ ចៀមនោះមានរោមក្រាស់គ្របដណ្តប់លើដងខ្លួន ដូច្នេះផ្តល់ការលំបាកដល់ការរស់នៅរបស់វា ។
សមាគមការពារសត្វរបស់អូស្ត្រាលី (RSPCA) បានបញ្ជូនក្រុមការងារ៥នាក់ទៅជួយសង្គ្រោះចៀមនោះដែលដឹកនាំដោយលោកអៀន អេលគីន ។ លោកអេលគីន រួមទាំងក្រុមការងារ៤នាក់ទៀតបានកាត់រោមចេញពីដងខ្លួនចៀមនោះបានទម្ងន់៤០,៤៥គីឡូក្រាម ។ ការកាត់រោមចៀមនោះចំណាយពេលដល់ទៅ៤២នាទី ជារយៈពេលយូរ ព្រោះរយៈពេលមធ្យមនៃការកាត់រោមចៀមទូទៅប្រហែល៣នាទីប៉ុណ្ណោះ ។ ត្រង់ចំណុចនេះអាចឆ្លុះបញ្ចាំងឱ្យឃើញថា សត្វចៀមដែលក្រុមការងារដាក់ឈ្មោះថា «គ្រីស» នោះរស់នៅដោយឯកាអស់រយៈពេលជាច្រើនឆ្នាំ និងចាត់ទុកថាអាចបំបែកឯតទគ្គកម្មពិភពលោកលើការកាត់រោមចៀមមួយក្បាលមានទម្ងន់២៩គីឡូក្រាមកាលពីឆ្នាំ២០១៤ ។
«គ្រីស» ស្ថិតក្រោមថែទាំរបស់សមាគម RSPCA ហើយអំពាវនាវរកការឧបត្ថម្ភពីសប្បុរសជនទូទៅ ។ នៅមិនទាន់មានរបាយការណ៍ណាមួយបញ្ជាក់ថាតើអាយុរបស់គ្រីស និងម្ចាស់ដើមរបស់វាជានរណាទេ ៕
ចែករំលែកព័តមាននេះ