ប្រទេសថៃ ៖ រដ្ឋមន្ត្រីពាណិជ្ជកម្មកំពុងកោះប្រជុំជាមួយបណ្តាប្រតិបត្តិករលក់រាយ និងផលិតកម្មនានានៅសប្តាហ៍នេះ ដើម្បីពិភាក្សារកលទ្ធភាពបញ្ចុះតម្លៃទំនិញ ឲ្យស្របទៅតាមហាងឆេងប្រេងដែលបន្តធ្លាក់ចុះ ។ នេះបើយោងតាមកាសែតបាងកកប៉ុស្តិ៍។
អគ្គនាយកនៃអគ្គនាយកដ្ឋានពាណិជ្ជកម្មផ្ទៃក្នុងថៃ លោក Boonyarit Kalayanamit បានថ្លែងថា បណ្តាមន្ត្រីពាក់ព័ន្ធបានពិនិត្យយ៉ាងដិតដល់ និងវិភាគទៅលើរចនាសម្ព័ន្ធតម្លៃសរុបទាំងអស់នៃទំនិញប្រើប្រាស់ ហើយថែមទាំងបានស្នើអ្នកលក់រាយឲ្យបញ្ចុះតម្លៃទៀតផង ។
លោកបានលើកឡើងថា « នៅក្នុងកិច្ចប្រជុំ យើងនឹងមើលឃើញថា តើវាមានកម្រិតដាច់ឆ្ងាយយ៉ាងណា រវាងអ្នកផលិតនិងអ្នកលក់រាយដែលអាចបញ្ចុះតម្លៃ ជាពិសេសចំពោះផលិតផលដែលបានផ្តល់គុណប្រយោជន៍ពីការធ្លាក់ចុះនៃតម្លៃប្រេង និងតម្លៃទាបជាងមុននៃវត្ថុធាតុ ដើម»។ លោកបានបន្តទៀតថា « តាមដែលយើងសង្កេតឃើញតម្លៃផលិតផលភាគច្រើននៅទូទាំងប្រទេសថៃនៅតែដូចមុន មិនប្រែប្រួល បើទោះជាតម្លៃប្រេងនៅតែបន្តធ្លាក់ថ្លៃក៏ដោយ » ។
ផលិតផលពាក់ព័ន្ធនឹងប្រេងត្រូវបានគេរកឃើញថា នឹងមានតម្លៃទាបជាងមុនរួមមាន ប្រេងរំអិល ដែកសន្លឹក ដែកដើម និងស៊ីម៉ងត៍ ជាដើម ។
ប៉ុន្តែដោយផ្អែកតាមការពិនិត្យពិច័យពីសំណាក់អាជ្ញាធរពាក់ព័ន្ធ តម្លៃទំនិញប្រើប្រាស់ទូទៅនៅតែមិនប្រែប្រួលដដែល នេះបើតាមការឲ្យដឹងពីលេខាអចិន្ត្រៃយ៍ពាណិជ្ជកម្ម លោក Chutima Bunyapraphasara ។
នៅក្នុងផ្នែកអាហារដែលជាទិសដៅដ៏មានប្រជាប្រិយភាពមួយ និងជាមុខទំនិញដែលគេច្រើនត្អូញត្អែអំពីតម្លៃខ្ពស់នោះ ក្រសួងពាណិជ្ជកម្មនឹងពង្រីកគោលការណ៍អាហារដែលមានតម្លៃទាបរបស់ខ្លួនដើម្បីគ្របដណ្តប់លើផ្សារលក់ចំនួន៥ពាន់ផ្សារនៅឆ្នាំនេះ និង១ម៉ឺនផ្សារនៅក្រោយកើន៣ពាន់ផ្សារធៀបនឹងបច្ចុប្បន្ន ។
ជាងនេះទៅទៀត ក្រសួងបានដឹកនាំផ្ទាល់កាលពីសប្តាហ៍មុនតាមរយៈលោកឧបនាយករដ្ឋមន្ត្រី Somkid Jatusripitak នៅក្នុងការកែប្រែថ្មីនូវកិច្ចខិតខំប្រឹងប្រែងដើម្បីគ្រប់គ្រងផលិតផលប្រើប្រាស់និងតម្លៃអាហារ តម្លៃផលិតផលនេសាទបានកម្រិតធូរថ្លៃ ដើម្បីលើកទឹកចិត្តការនាំចេញ និងផ្សព្វផ្សាយដល់បណ្តាសហគ្រាសតាមសហគមនានា ។
អ្នកនាំពាក្យរបស់រដ្ឋាភិបាលលើបញ្ហាសេដ្ឋកិច្ចក៏បានជំរុញឲ្យអាជ្ញាធរពាក់ព័ន្ធបង្ខំចិត្តអនុវត្តច្បាប់យ៉ាងតឹងរ៉ឹងផងដែរ។
លោក Somkid បានស្នើឲ្យក្រសួងពាណិជ្ជកម្មធ្វើការកាន់តែជិតស្និទ្ធថែមទៀតជាមួយក្រុមហ៊ុនឯកជនដើម្បីជំរុញតម្លៃផលិតផលកសិកម្មជាពិសេសសម្រាប់អង្ករ កៅស៊ូ និងដូងប្រេងជាដើម ។
ដើម្បីជំរុញការនាំចេញ ក្រសួងបានបង្គាប់ឲ្យបង្កើតក្រុមការងារស្វិតស្វាញមួយដើម្បីធ្វើការយ៉ាងជិតស្និទ្ធជាមួយវិស័យឯកជន ក្រសួងការបរទេស ទេសចរណ៍និងកីឡា ដើម្បីបង្កើនការនាំ ចេញទៅកាន់ទីផ្សារមីយ៉ាន់ម៉ា ប៉ាគីស្ថាន រុស្ស៊ី ចិន និងជប៉ុន ។
បណ្តាក្រុមហ៊ុនទាំងឡាយដែលមកពីវិស័យឯកជនទាំងអស់នឹងត្រូវបានជំរុញក្នុងការរាយកាណ៍បញ្ហានិងឧបសគ្គនានាដោយផ្ទាល់ដល់នាយករដ្ឋមន្ត្រីនៅក្នុងការរំពឹងទុកពីការដោះស្រាយបញ្ហាបានកាន់តែឆាប់ ។
លោក Somkid បានបេ្តជ្ញា នឹងផ្សព្វផ្សាយពាណិជ្ជកម្មនៅក្នុងសេវាកម្មដូចជាទេសចរណ៍ មន្ទីរពេទ្យ មជ្ឈមណ្ឌលកម្សាន្ត ភោជនីយដ្ឋាន និងការធ្វើអាជីវកម្មតាមបណ្តាញអីុនធើរណេតជាដើម ៕
ចែករំលែកព័តមាននេះ