ខេត្តបន្ទាយមានជ័យ ៖ ផ្សារចក្រីស្ថិតស្រុកព្រះនេត្រព្រះ ត្រូវបានអាជីវកររិះគន់ម្ចាស់ក្រុមហ៊ុនផ្សារថា ពេលយកលុយលឿន តែពេលប្រមូលសំរាមយឿត ទុកសំរាមឱ្យស្អុយរលួយជះក្លិនធ្វើឱ្យប៉ះពាល់ដល់សុខភាព និងបរិស្ថាន ។
អាជីវករលក់ដូរនៅក្នុងផ្សារចក្រី បាននិយាយថា ដោយសារតែរដូវនេះជារដូវវស្សាមានភ្លៀងធ្លាក់ជោកជាំ ហើយសំរាមត្រូវបានគេយកមកបោះចោលពាសវាលពាសការ និងក្នុងប្រព័ន្ធលូបង្ហូរទឹកបណ្តាលឱ្យស្ទះ មានក្លិនស្អុយធ្វើឱ្យប៉ះពាល់ដល់សុខភាពយ៉ាងខ្លាំង ។ ព្រោះតែមិនយកចិត្តទុកដាក់ក្នុងការប្រមូលសំរាមខាងលើនេះ ទើបប្រជាពលរដ្ឋ ក៏ដូចជាអាជីវករបានរិះគន់ម្ចាស់ក្រុមហ៊ុនផ្សារចក្រីនេះថា «ប្រមូលលុយលឿន តែប្រមូលសំរាមយឿត» ។
លោក វ៉ាត វីរៈ អភិបាលរងស្រុក បានប្រាប់ថា បញ្ហាផ្សារចក្រីដែលអ្នកម៉ៅការផ្សារមិនបានយកចិត្តទុកដាក់ការប្រមូលសម្រាមទុករហូតដល់ស្អុយរលួយមានក្លិនហើយមានដង្កូវវារឡើងផ្ទះអ្នកស្រុកនោះ គឺអាជ្ញាធរស្រុកបានណែនាំដល់អ្នកម៉ៅការផ្សារត្រូវយកចិត្តទុកនិងគិតគូរបញ្ហាបរិស្ថាន និងសុខភាពអ្នកលក់និងអ្នកទិញ ។
ក្រុមអាជីវករបានសំណូមពរដល់អាជ្ញាធរ និងមន្ត្រីជំនាញ ចុះអើតមើលខ្លះៗផង ៕
ចែករំលែកព័តមាននេះ