ខេត្តកំពត ៖ បន្ទាប់ពីមានខ្លឹមសារណែនាំសំខាន់ៗជូនដល់ប្រជាពលរដ្ឋ និងបងប្អូនក្រុមអាជីវកររបស់អាជ្ញាធរក្រុងកំពតនាពេលថ្មីៗនេះ អ្នកសារព័ត៌មានបានចុះទៅយកព័ត៌មាននៅក្នុងផ្សារទីប្រជុំជន២កន្លែង ក្នុងក្រុងកំពតដូចជា ផ្សារសាមគ្គីទីរួមខេត្តកំពត និងផ្សារដីហុយ ស្ថិតក្នុងសង្កាត់អណ្តូងខ្មែរ ក្រុងកំពត ។
បើតាមការពិនិត្យឃើញ ជារួមក្នុងការការពារប្រយុទ្ធប្រឆាំងនឹងជំងឺឆ្លងដ៏កាចសាហាវកូវីដ១៩ ដែលកំពុងតែរីករាលដាលក្នុងសហគមន៍តាមបណ្តារាជធានី និងតាមបណ្តាខេត្ត-ក្រុងមួយចំនួន បន្ទាប់ពីមានការណែនាំ និងមានបទបញ្ជាយ៉ាងម៉ឺងម៉ាត់របស់រាជរដ្ឋាភិបាល និងក្រសួងសុខាភិបាលស្តីពីការផាកពិន័យចំពោះពលរដ្ឋមិនគោរពការ ការពារជំងឺឆ្លងតាមការណែនាំរបស់ក្រសួងសុខាភិបាលរួចមក គេសង្កេតឃើញថា បងប្អូនប្រជាពលរដ្ឋដែលមកចូលក្នុងទីប្រជុំជនក៏ដូចជា បងប្អូនក្រុមអាជីវករដែរ គឺបងប្អូនមួយចំនួនធំប្រហែលជា៩៥% បានការពារយ៉ាងខ្ជាប់ខ្ជួន ពាក់ម៉ាស់ និងមានអាល់កុលដាក់តាមខ្លួនសំរាប់លាងដៃបន្ថែមទៀតផងក៏មាន ដោយបងប្អូនមានការប្រុងប្រយ័ត្នខ្ពស់ដើម្បីការពារនូវជំងឺឆ្លងកូវីដ១៩នេះ។
ជាមួយគ្នានេះដែរ លោក លាង រឿនសុទ្ធី អភិបាលក្រុងកំពត បានមានប្រសាសន៍ប្រាប់អ្នកព័ត៌មានកោះសន្តិភាពនៅរសៀលថ្ងៃទី១៥ ខែមីនា ឆ្នាំ២០២១នេះថា ក្រោយពីការផ្ទុះកូវីដនៅតាមបណ្តាខេត្ត-ក្រុង និងក្នុងសហគមមួយចំនួននៅទូទាំងប្រទេស ហើយមានការដាក់បញ្ជាយ៉ាងតឹងរ៉ឹងដើម្បីការពារកុំឲ្យឆ្លងនូវមេរោគដ៏កាចសាហាវនោះពីប្រមុខរាជរដ្ឋាភិបាល និងក្រសួងសុខាភិបាលចំពោះដែលមិនគោរពតាមការណែនាំរបស់រាជរដ្ឋាភិបាលពីវិធានការពារ ការឆ្លងរីករាលដាលនូវមេរោគកូវីដ១៩ ក្នុងនាមលោកជាអភិបាលក្រុងលោកក៏បានធ្វើការណែនាំបន្ថែមដល់អាជ្ញាធរ និងសមត្ថកិច្ចពាក់ព័ន្ធសហការគ្នាត្រួតពិនិត្យការណែនាំ និងវិធានការ ការពារនៅតាមទីប្រជុំជនក៏ដូចនៅតាមគេហដ្ឋាន គឺប្រជាពលរដ្ឋទាំងអស់រួមនឹងក្រុមអាជីវករផង ត្រូវតែគោរពតាមវិធានការការពាររបស់រាជរដ្ឋាភិបាលឲ្យបានតឹងរ៉ឹងបំផុតទាំងនៅតាមផ្ទះ ក៏ដូចជានៅក្នុងផ្សារ ត្រូវពាក់ម៉ាស់ លាងដៃនឹងអាល់កុល ឬជែល ។
ដូច្នេះហើយឃើញថា បងប្អូនប្រជាពលរដ្ឋគាត់មានការយល់ដឹង និងអនុវត្តវិធានការរបស់ក្រសួងសុខាភិបាល ក៏ដូចការណែនាំរបស់រាជរដ្ឋាភិបាលបានល្អ ប្រហែលជា៩៥% ហើយ ចំពោះការនៅសល់តិចតួចនោះ អាជ្ញាធរនឹងខិតខំជម្រុញ និងណែនាំបន្ថែមទៀតឲ្យគាត់យល់ពីហានិភ័យនៃការឆ្លងនូវកូវីដ១៩នេះ ។
លោកអភិបាលក្រុងបានមានប្រសាសន៍ឲ្យដឹងទៀតថា ទោះបីក្រុងកំពត មិនទាន់មានអ្នកកើតមេរោគកូវីដនេះក្តី ចាប់ពីថ្ងៃទ១៥ ខែមីនា ឆ្នាំ២០១២នេះតទៅ គ្រប់កន្លែងប្រជុំជន ក្លឹបកំសាន្ត រង្គសាល និងការរៀបអាពាហ៍ពីពាហ៍ត្រូវបានប្រកាសបិទមួយរយៈសិនតែម្តង។ ករណីនេះ អាជ្ញាធរក្រុងបានធ្វើការផ្សព្វផ្សាយដល់អាជ្ញាធរ ភូមិ សង្កាត់ឲ្យបានដឹង និងអនុវត្តនូវការប្រកាសបិទនេះ ជូនដល់ប្រជាពលរដ្ឋ និងម្ចាស់ក្លឹបកំសាន្តទាំងអស់។ ចំពោះបញ្ហានេះ ក៏មានបងប្អូនដែលត្រៀមរៀបអាពាហ៍ពិពាហ៍នៅក្នុងក្រុងកំពតក៏ដូចជានៅទូទាំងខេត្តដែរ គឺត្រូវលុបចោល ឬពន្យាពេលការប្រារព្ធពិធីទាំងអស់៕
ចែករំលែកព័តមាននេះ