រាជធានីភ្នំពេញ ៖ ការប្រកួតជម្រុះប្រចាំសប្ដាហ៍របស់ព្រឹត្តិការណ៍ «ជើងឯក Tiffy Super Fight» របស់ទូរទស្សន៍ប៉ុស្ដិ៍លេខ៥ បានរកឃើញអ្នកឡើងទៅវគ្គ១៦នាក់ចំនួន២នាក់ទៀតហើយ កាលពីថ្ងៃអាទិត្យ ទី៦ កញ្ញា ។ ក្នុងចំណោមអ្នកឈ្នះទាំង២ កីឡាករធន់ ចាន់តាក់ ត្រូវគេឃើញទទួលបានជោគជ័យពីការប្រកួតដោយភាពស្វិតស្វាញជាងគេ បន្ទាប់ពីអាចវាយឲ្យកីឡាករម៉ឺន ដា ហាលអាវដោយលំបាក ។
មិនខុសពីសប្ដាហ៍កន្លងទៅ កីឡាករ៤រូបក្នុងចំណោម៣២រូបដែលមានឈ្មោះចូលប្រកួតក្នុងព្រឹត្តិការណ៍ដណ្ដើមខ្សែក្រវាត់នេះបានបន្តប្រកួតគ្នាចាញ់ធ្លាក់ៗទៀតហើយឆ្ពោះទៅរកវគ្គ១៦នាក់ជាជំហានទី២ ។ យឹម សារុន មកពីក្លិបកងពលតូចលេខ៣១ ត្រូវហាលអាវទាំងមិនអស់ចិត្តក្រោមដៃកីឡាករ ប្រាក់ រ៉ាម៉ាញ មក ពីក្លិបតាឯកបាត់ដំបងមានរឹទ្ធិ ។ ការប្រកួតពួកគេ ក្រៅពីមានសភាពស្វិតស្វាញពេញរយៈពេល៣ទឹក ក៏មានចំណុចទាក់ទាញខ្លាំងណាស់ដែរ ដោយសារតែអ្នកទាំងពីរសុទ្ធតែប្រើបច្ចេកទេសពិសេសៗធ្វើការវាយសន្ធាប់គ្នា ។ ទោះជាយ៉ាងណា ការប្រកួតរបស់គូខ្សែក្រវាត់ទី១ រវាងកីឡាករធន់ ចាន់តាក់ មកពីក្លិបមជ្ឈមណ្ឌលកីឡាខេមរភូមិន្ទ និងកីឡាករម៉ឺន ដា មកពីក្លិបខ្លារខិនមានរឹទ្ធិ រឹតតែធ្វើឲ្យរញ្ជួយសង្វៀនប៉ុស្ដិ៍លេខ៥ នៅជ្រោយចង្វា ។ ការចាប់អារម្មណ៍ទី១ ដោយសារតែគូនេះជាជំនួបរវាងកីឡាករវ័យក្មេងដែលកំពុងឡើងកូដដូចគ្នា ហើយមានសភាពវាយសន្ធាប់ដាក់គ្នាដោយមិនសំចៃដៃធ្វើឲ្យអ្នកទស្សនាពេញចិត្ត និងទី២ គឺកីឡាករទាំងពីរក្រៅពីស្វិតស្វាញក្នុងការវាយតប់ ក៏ចេះឌឺដាក់គ្នាផងដែរ ។ គូនេះស្វិតស្វាញតាំងពីដើមទី រហូតដល់ទឹកទី៣ ដោយសារតែបង្គោលខៀវក៏ប្រើអស់ពីបច្ចេកទេស ហើយបង្គោលក្រហម ក៏ប្រឹងបង្អួតស្នាដៃធ្វើឲ្យមានអារម្មណ៍ត្រូវចិត្ត ។
តាមការកត់សម្គាល់កីឡាករម៉ឺន ដា ខ្លាំងបច្ចេកទេស និងស្នៀតក្នុងការវាយសន្ធាប់ ប៉ុន្តែមកពីគេចាញ់កម្លាំង និងឆាប់ហត់ ទើបធ្វើឲ្យការប្រកួតប្រែក្លាយជាបាត់ឱកាសក្នុងការវាយសង្គ្រុប ។ អញ្ចឹងហើយទើបការប្រកួតមួយនេះ ធន់ ចាន់តាក់ ក្លាយជាអ្នកឈ្នះពិន្ទុ ហើយបានបន្តទៅកាន់វគ្គ១៦នាក់ ដោយទម្លាក់ ម៉ឺន ដា ដែលជាកីឡាករល្អម្នាក់ធ្វើឲ្យគេមិនអស់ចិត្ត។ ជ័យជម្នះរបស់ ធន់ ចាន់តាក់ កាលពីល្ងាចថ្ងៃអាទិត្យ ក្រៅពីស្ដែងឲ្យឃើញនូវភាពខ្លាំងក្លា ក៏ត្រូវគេចាត់ទុកថាកើតឡើងពីសំណាងល្អគួបផ្សំផងដែរ ទើបបានបន្តទៅកាន់វគ្គ១៦នាក់ក្នុងជំហានបន្ទាប់ ។ ប៉ុន្តែផ្អែកតាមអ្វីដែលកីឡាករជើងថ្មីម្នាក់ក្នុងចំណោមទាំងពីរនាក់ធ្វើបាន គឺបង្ហាញយ៉ាងច្បាស់ថា គេមានសមត្ថភាព និងមានថ្វីដៃល្អ ទាំងកម្លាំងស៊ុហ្វ និងបច្ចេកទេសប្រកួត ទើបធ្វើឲ្យគេអាចទម្លាក់គូប្រកួតរបស់ខ្លួនឲ្យហាលអាវដូចបំណង ។
ធៀបនឹងជ័យជម្នះរបស់កីឡាករធន់ ចាន់តាក់ ដែលបានឡើងទៅវគ្គ១៦នាក់ដូចគ្នា កីឡាករប្រាក់ រ៉ាម៉ាញ ក៏ត្រូវគេមើលឃើញថាគឺជាកីឡាករល្អម្នាក់ស្ថិតក្នុងអារម្មណ៍អ្នកទស្សនាផងដែរ បន្ទាប់ពីបានបំបាក់ដៃគូហើយឆ្ពោះទៅកាន់វគ្គបន្ត ។ ព្រឹត្តិការណ៍កាលពីថ្ងៃអាទិត្យនោះត្រូវគេកត់សម្គាល់ថា មានអ្នកទស្សនាកកកុញណែនពេញសាលកីឡា Tiffy Arena នៅជ្រោយចង្វាតែម្ដង ដែលអាចនិយាយបានថា ការប្រកួតក្នុងវគ្គជម្រុះកាន់តែមានអ្នកស្នេហាវិស័យប្រដាល់ចង់តាមដាន ៕
ចែករំលែកព័តមាននេះ