ខេត្តតាកែវ ៖ ក្នុងនាមជាស្ថាប័នគ្រប់គ្រងនិងអនុវត្តគម្រោងឥណទាននៃមូលនិធិទ្រទ្រង់ និងអភិវឌ្ឍន៍វិស័យកសិកម្មកាលពីថ្ងៃទី២៧ កុម្ភៈ ឆ្នាំ២០១១ លោកសុន គន្ធរ ទីប្រឹក្សាផ្ទាល់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានអគ្គនាយកធនាគារអភិវឌ្ឍន៍ជនបទ រួមដំណើរដោយមន្ត្រីអគ្គលេខាធិការដ្ឋាននៃគណៈកម្មាធិការជាតិជម្រុញចលនាភូមិ១ ផលិតផល១ បានចុះពិនិត្យបរិមាណស្រូវស្តុកនៅតាមរោងម៉ាស៊ីនកិនស្រូវ និងឃ្លាំងមួយចំនួនរបស់សមាជិកសមាគមម៉ាស៊ីនកិនស្រូវខេត្តតាកែវ ដែលបានទទួលឥណទាននៃគម្រោងមូលនិធិទ្រទ្រង់ និងអភិវឌ្ឍន៍វិស័យកសិកម្មសម្រាប់ការប្រមូលទិញស្រូវចូលរួមទប់ស្កាត់ការហូរចេញស្រូវទៅក្រៅប្រទេសនារដូវប្រមូលផល និងលើកស្ទួយការកែច្នៃក្នុងស្រុកដើម្បីបង្កើននូវតម្លៃបន្ថែម ។
គោលបំនងនៃការចុះបំពេញការងារនេះ គឺដើម្បីពិនិត្យជាក់ស្តែងនូវបរិមាណស្រូវដែលសមាគមម៉ាស៊ីនកិនស្រូវខេត្តតាកែវ បានប្រមូលទិញពីប្រជាកសិករ សមស្របទៅនឹងចំនួនឥណទានដែលទទួលបានពីធនាគារអភិវឌ្ឍន៍ជនបទ ។ ក្នុងពេលចុះពិនិត្យនេះ ក្រុមការងារបានសង្កេតឃើញមានបរិមាណស្រូវស្តុកទុកនៅតាមរោងម៉ាស៊ីនកិនស្រូវ និងឃ្លាំងមួយចំនួនក្នុងខេត្តតាកែវនេះ ដែលក្នុងនោះដូចជារោងម៉ាស៊ីនកិនស្រូវ លោកដួង ហេង មានបរិមាណស្រូវស្តុកប្រមាណ៨០០តោន និងរោងម៉ាស៊ីនភាជ សុផាត មានបរិមាណស្រូវស្តុកប្រមាណ៥០០តោន និងអង្ករចំនួន១០០តោន ។
លោកដួង ហេង ប្រធានសមាគមម៉ាស៊ីនកិនស្រូវខេត្តតាកែវ បានឱ្យដឹងថា នៅរដូវប្រមូលផលស្រូវរដូវវស្សាឆ្នាំ២០១០នេះ សមាគមម៉ាស៊ីនកិនស្រូវខេត្តតាកែវ ដែលមានរោងម៉ាស៊ីនកិនស្រូវចំនួន១០ ជាសមាជិកបានប្រមូលទិញស្រូវពីប្រជាកសិកររបានចំនួន១២.០០០តោន ជាប្រភេទស្រូវនាងមិញ ក្នុងតម្លៃជាមធ្យម១.០០០រៀល ក្នុង១គីឡូក្រាម ស្មើនឹងប្រមាណ២៥០ដុល្លារ ក្នុង១តោន ។ ដោយសារពុំទាន់មានម៉ាស៊ីនកែច្នៃអង្ករទំនើប សមាជិកទាំងនោះបានកែច្នៃជាអង្ករសម្រាប់តែផ្គត់ផ្គង់ក្នុងស្រុកតែប៉ុណ្ណោះ ហើយក៏មានការលក់ចេញជាស្រូវខ្លះ ដើម្បីបង្វែរទុនមួយចំនួនសម្រាប់ការប្រមូលទិញស្រូវប្រាំងបន្ត ។ បច្ចុប្បន្នសមាគមមានស្រូវសល់ក្នុងស្តុកចំនួន២.៦៣០តោន ហើយក៏កំពុងត្រៀមប្រមូលទិញស្រូវប្រាំងប្រភេទ IR ដែលនៅដើមរដូវនេះគឺមានតម្លៃជាមធ្យមពី១.០០០រៀល ក្នុង១គីឡូក្រាម ។
លោកសុន គន្ធរ បានមានប្រសាសន៍ណែនាំដល់សមាគមម៉ាស៊ីនកិនស្រូវខេត្តតាកែវ គឺធ្វើយ៉ាងណាខិតខំចូលរួមអនុវត្តគោលនយោបាយស្តីពីការជម្រុញផលិតកម្មស្រូវ និងការនាំចេញអង្កររបស់រាជរដ្ឋាភិបាលឱ្យទទួលបានជោគជ័យ ពិសេសគឺការប្រើប្រាស់ឥណទានឱ្យចំគោលដៅ និងប្រមូលទិញស្រូវពីប្រជាកសិករឱ្យបានទាន់ពេលវេលា ឆ្លើយតបទៅនឹងការខិតខំប្រឹងប្រែងរបស់រាជរដ្ឋាភិបាលដែលបានស្វះស្វែងរកទុនជួយផ្តល់ដល់រោងម៉ាស៊ីនទាំងនោះ ។ លោកក៏បានណែនាំឱ្យសមាជិកសមាគមម៉ាស៊ីនកិនស្រូវខេត្តតាកែវ រួមគ្នាសិក្សាលើគម្រោង ក្នុងការរៀបចំម៉ាស៊ីនកែច្នៃឱ្យមានលក្ខណៈទំនើបស្របតាមស្តង់ដា ព្រមទាំងសម្ងួតដើម្បីរួមចំណែកកែច្នៃអង្ករនាំចេញទៅកាន់ទីផ្សារបរទេស ព្រោះថា ខេត្តតាកែវដែលជាខេត្តផលិតស្រូវមួយដ៏ច្រើននោះពុំទាន់មានឡសម្ងួត និងមា៉សីុនកែច្នៃស្រូវ-អង្ករទំនើបឡើយ។ លោកសុន គន្ធរ ក៏បានទៅពិនិត្យឃ្លាំងរបស់ទីផ្សារស្រូវខេត្តតាកែវ មានទីតាំងស្ថិតនៅភូមិស្នោ ឃុំរកាក្នុង ស្រុកដូនកែវ ដែលមានសមត្ថភាពស្តុកស្រូវបានចំនួន៥.០០០តោន ។
ក្រុមការងារក៏បានចុះពិនិត្យផ្សារកសិផល សុខ អាន ទន្លាប់-មជ្ឈមណ្ឌលភូមិ១ផលិតផល១ គិរីវង់ ដែលគ្រោងរៀបចំដំណើរការឱ្យកសិករចូលលក់ដូរចាប់ពីថ្ងៃទី២៧ កុម្ភៈ នេះតទៅ។
ឆ្លៀតក្នុងឱកាសនោះលោកសុន គន្ធរ និងសហការីក៏បានអញ្ជើញទៅស្វែងយល់អំពី ការធ្វើស្រែបង្ហាញក្រោមកម្មវិធីសហប្រតិបត្តិការរវាងខេត្តអានយា៉ង ប្រទេសវៀតណាម និងខេត្តតាកែវ ប្រទេសកម្ពុជា ។ ស្រែបង្ហាញនេះបានអនុវត្តសាកល្បងលើផ្ទៃដីចំនួន១៨,៤ហិកតា សម្រាប់កសិករចំនួន២១គ្រួសារ នៅភូមិទទឹង ឃុំភ្នំដិន ស្រុកគិរីវង់ ខេត្តតាកែវ ដោយភាគីវៀតណាមបានផ្តល់ពូជស្រូវប្រភេទ IR ដែលមានឈ្មោះ OM 4218 ជី និងជួយជាបច្ចេកទេស ។ ទិន្នផលដែលទទួលបានពីស្រែបង្ហាញនេះគឺពី៨តោនទៅ៩តោនក្នុង១ហិកតា ហើយបើប្រៀបធៀបនឹងការធ្វើស្រែធម្មតាតាមទម្លាប់របស់ប្រជាកសិករ គឺទទួលបានទិន្នផលតែពី៤,៥ទៅ៥តោនក្នុង១ហិកតា ។ ជួបសំណេះជាមួយលោកលឿង ឡេភឿង អនុរដ្ឋមន្ត្រីក្រសួងកសិកម្មប្រទេសវៀតណាម ដែលបានអញ្ជើញមកចូលរួមក្នុងពិធីបូកសរុបលទ្ធផលស្រែបង្ហាញនេះ លោកសុន គន្ធរ បានថ្លែងអំណរគុណចំពោះភាគីវៀតណាមដែលបានជួយផ្តល់នូវបច្ចេកទេសដាំដុះថ្មីដល់ប្រជាកសិករកម្ពុជា ដើម្បីបង្កើនទិន្នផលស្រូវ ហើយលោកក៏បានស្នើដល់ភាគីវៀត ណាមបន្តសហការជាមួយក្រសួងកសិកម្មកម្ពុជា ក្នុងការពិនិត្យលទ្ធភាពពង្រីក និងផ្សព្វផ្សាយបច្ចេកទេសថ្មីនេះដល់តំបន់ផ្សេងៗទៀតនៅកម្ពុជា ជាពិសេសនៅខេត្តកំពង់ធំដែលមានផ្ទៃដីធ្វើស្រែប្រាំងច្រើន និងមានប្រព័ន្ធធារាសាស្ត្រផ្គត់ផ្គង់ទឹកគ្រប់គ្រាន់ ។ លោកលឿង ឡេភឿង អនុរដ្ឋមន្ត្រីក្រសួងកសិកម្មប្រទេសវៀតណាម ក៏បានឯកភាពលើសំណើនេះដែរ៕
ចែករំលែកព័តមាននេះ