ខេត្តស្ទឹងត្រែង ៖ បុសអ្នករត់ម៉ូតូឌុបម្នាក់ចោរល្បួងឱ្យឌុបទៅកន្លែងស្ងាត់រួចប្រើពួថៅកាប់ពីក្រោយត្រូវចំកញ្ចឹង.ក និងដៃខាងឆ្វេងបណ្តាលឱ្យរងរបួសប្លន់យកម៉ូតូម៉ាកហុងដាឌ្រីម សេ១២៥ ស៊េរីឆ្នាំ២០០៨ មួយគ្រឿងទៅបាត់ដោយសុវត្ថិភាពកាលពីល្ងាចថ្ងៃទី០៥ ខែកញ្ញា ឆ្នាំ២០១៥ នៅចំណុចផ្លូវលំចូលទៅភូមិស្តៅ ចម្ងាយប្រមាណជាជាង៣គីឡូម៉ែត្រពីផ្លូវជាតិ ស្ថិតក្នុងឃុំស្តៅ ស្រុកសេសាន ខេត្តស្ទឹងត្រែង ។
ហេតុការណ៍ខាងលើបង្កឱ្យមានភ្ញាក់ផ្អើលជាខ្លាំងដល់អ្នកធ្វើដំណើរតាមផ្លូវជាតិលេខ៧ ខណៈកម្លាំងកងរាជអាវុធហត្ថ និងកម្លាំងនគរបាលព្រហ្មទណ្ឌកម្រិតស្រាល និងកម្រិតធ្ងន់ប្រជែងគ្នាចុះទៅឡោមព័ទ្ធទីតាំងកើតហេតុ ក្រោយពីមានការប្តឹងទៅសមត្ថកិច្ចទាំងនោះអំពីករណីប្លន់ម៉ូតូនេះ ។ កម្លាំងប្រដាប់អាវុធទាំង២ប្រភេទបានចែកគោលដៅទៅតាមជំនាញធ្វើការស៊ើបអង្កេតទាក់ទងករណីប្លន់នេះ រហូតបានជួបជាមួយជនរងគ្រោះ និងរៀបរាប់អំពីហេតុការណ៍ដែលបានកើតឡើង ។
សមត្ថកិច្ចបានប្រាប់ឲ្យដឹងថា ជនរងគ្រោះមានឈ្មោះ ឆយ ឆើត ភេទប្រុស អាយុជាង៤០ឆ្នាំ មុខរបររត់ម៉ូតូឌុប រស់នៅភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ត្រូវបានជនមិនស្គាល់មុខល្បួងយកទៅប្លន់ម៉ូតូម៉ាកហុងដាឌ្រីម សេ១២៥ ស៊េរីឆ្នាំ២០០៨ នៅចំណុចផ្លូវលំចូលទៅភូមិស្តៅ ចម្ងាយពីផ្លូវជាតិប្រមាណជាជាង៣គីឡូម៉ែត្រ ។ សមត្ថកិច្ចបានបន្ថែមថា ជនសង្ស័យប្រដាប់ដោយពូថៅកាប់ជនរងគ្រោះពីក្រោយចំកញ្ចឹងក និងដៃខាងឆ្វេងបណ្តាលឲ្យរបួស ។
ប្រភពព័ត៌មានពីជនរងគ្រោះឲ្យដឹងថា មុនពេលកើតហេតុ ជនសង្ស័យបានជួលឲ្យឌុបរូបគេពីក្រុងស្ទឹងត្រែងទៅភូមិស្តៅ រហូតមកដល់ផ្លូវបំបែកចូលភូមិស្តៅ ជនសង្ស័យបានប្រាប់ឲ្យបត់ពីផ្លូវជាតិទៅតាមផ្លូវក្រាលក្រួសក្រហមរហូតទៅដល់ចំណុចទីតាំងមួយជនសង្ស័យបានប្រាប់ឲ្យខ្លួនបើកកាត់វាសស្មៅសំដៅទៅខ្ទមមួយ ខណៈបត់ម៉ូតូចូលទៅខ្ទមនោះម៉ូតូរបស់គាត់ក៏ជាប់ផុង ជាឱកាសមួយដែលជនសង្ស័យទាញពូថៅពីចង្កេះកាប់ពីក្រោយ គ្រានោះខ្លួនបានប្រវាយប្រតប និងរត់គេចខ្លួនទៅពួនសម្ងំក្នុងគម្ពោធព្រៃហើយព្យាយាមទូរស័ព្ទទៅអ្នកស្គាល់ឲ្យប្តឹងសមត្ថកិច្ច ទើបមានការអន្តរាគមន៍ភ្លាមៗ ចំណែកជនសង្ស័យបានយកម៉ូតូជិះរត់គេចខ្លួនបាត់ស្រមោល ។
គួរបញ្ជាក់ថា ស្ថិតក្នុងភូមិសាស្ត្រខាងលើជាផ្លូវជាតិតែមួយខ្សែដែលមានគោលដៅពីក្រុងស្ទឹងត្រែងឆ្ពោះទៅកាន់ព្រំដែនប្រទេសឡាវ ហើយនៅចំណុចភូមិសាស្ត្រកើតហេតុមានផ្លូវលំចំនួន២ខ្សែដែលត្រូវបត់ចូលទៅភូមិស្តៅ ឃុំស្តៅ ស្រុកសេសាន ហើយពីផ្លូវក្រាលគ្រួសក្រហមទៅដល់ភូមិស្តៅនោះជាទន្លេ តែក្រោយកម្លាំងចុះឡោមព័ទ្ធនោះនៅតែមិនទាន់មានតម្រុយលើមុខសញ្ញាពាក់ព័ន្ធករណីខាងលើនោះនៅឡើយ តែទោះបីជាយ៉ាងកម្លាំងប្រដាប់អាវុធទាំង២ប្រភេទនៅតែបន្តការតាមដាននៅឡើយ ៕
ចែករំលែកព័តមាននេះ