ខេត្តព្រៃវែង ៖ គិតត្រឹមយប់អធ្រាត្រថ្ងៃទី១៣ ឈានចូលព្រឹកថ្ងៃទី១៤ ខែមីនា ឆ្នាំ២០២១នេះ កម្លាំងសមត្ថកិច្ចស្រុកពាមរក៌ បានដាក់បារ៉ាស់បិទផ្លូវចំនួន៤គោលដៅ ដោយហាមឃាត់មិនអោយមានការធ្វើចរាចរណ៍ឆ្លងកាត់ឡើយ ក្នុងគោលបំណងដើម្បីទប់ស្កាត់ការឆ្លងរាលដាលជំងឺកូវីដ១៩។
លោកស្រី សេង ទៀង អភិបាលស្រុកពាមរក៌ បានអោយដឹងថា ដោយមានការឯកភាពពីឯកឧត្តមអភិបាលខេត្ត ឃុំចំនួន៤នៅក្នុងស្រុកពាមរក៌ ត្រូវបានសំរេចបិទមិនអោយប្រជាពលរដ្ឋធ្វើចរាចរណ៍ឆ្លងកាត់ទេ គឺអ្នកខាងក្រៅមិនអោយចូលមកក្នុង ហើយអ្នកខាងក្នុងក៏មិនអោយចេញទៅក្រៅ។ ប៉ុន្តែសំរាប់រថយន្តដឹកទំនិញផ្សេងៗ គឺនៅអនុញ្ញាតិអោយធ្វើចរាចរណ៍ឆ្លងកាត់បានជាធម្មតា។
លោកស្រីអភិបាលស្រុកបានបន្តថា ឃុំទាំង៤ ដែលត្រូវបានបិទរួមមាន ឃុំអ្នកលឿង ឃុំព្រែកខ្សាយ(ខ) ឃុំព្រែកខ្សាយ(ក) និងឃុំពាមរក៌ ចំណែកគោលដៅដែលត្រូវបានដាក់បារ៉ាស់បិទផ្លូវនោះមាន៤ទីតាំង់ គឺ ៖
ទី១- គឺនៅចំណុចផ្លូវកោងមុខខ្លោងទ្វាវត្តទួល លើកំណាត់ផ្លូវជាតិលេខ១១ ក្នុងភូមិចាក់ខ្លាញ់។
ទី២- នៅលើកំណាត់ផ្លូវជាតិលេខ៣១០ ត្រង់ចំណុចព្រំព្រទល់ស្រុកពាមរក៌ និងស្រុកពាមជរ ។
ទី៣- នៅចំណុចខ្លោងទ្វាវត្តទួលសមាធិ តាមបណ្តោយផ្លូវជាតិលេខ១ និង
ទី៤- គឺនៅចំណុចរង្វង់មូលត្រីកោណ ផ្លូវបំបែកចូលទីប្រជុំជនអ្នកលឿង។
លោកស្រី សេង ទៀង អភិបាលស្រុកពាមរក៌ បានបញ្ជាក់ថា ការសំរេចបិទឃុំទាំង៤មិនអោយមានប្រជាពលរដ្ឋឆ្លងកាត់ គឺដើម្បីទប់ស្កាត់ការឆ្លងរាលដាលជំងឺកូវីដ១៩ ព្រោះនៅក្នុងឃុំទាំង៤នេះ មានអ្នកជាប់ពាក់ព័ន្ធដោយផ្ទាល់ និងប្រយោលជាច្រើននាក់ ជាមួយអ្នកវិជ្ជមានជំងឺកូវីដ១៩ ក្នុងព្រឹត្តិកា៍ណ៌ឆ្លងសហគមន៌២០កុម្ភៈ ហើយគិតមកដល់ត្រឹមថ្ងៃទី១៣ ខែមីនានេះ ក្រសួងសុខាភិបាលបានរកឃើញអ្នកឆ្លងនៅក្នុងស្រុកពាមរក៌ សរុប៣៦នាក់ហើយ ខណៈនៅទូទាំងខេត្តមានអ្នកឆ្លងសរុបចំនួន៤៥នាក់។
ចែករំលែកព័តមាននេះ