ខេត្តបន្ទាយមានជ័យ ៖ កាលពីថ្ងៃទី៣ មីនា រថយន្តដឹកផ្លែឈើ១គ្រឿងបានក្រឡាប់ផ្ងារជើងទាំងព្រឹកដែលឧប្បត្តិហេតុនេះ ត្រូវបានប៉ូលិសចរាចរនិយាយយោងតាមសម្តីម្ចាស់រថយន្តរងគ្រោះថា បណ្តាលមកពីរថយន្តប៉ូលិសសេដ្ឋកិច្ចក្រសួងដេញរថយន្តដឹកត្រី ធ្វើឱ្យរថយន្តដឹកផ្លែឈើរបស់គាត់បើកគេចទាំងប្រថុចញ៉ុច ទើបក្រឡាប់បែបនេះ តែមិនបង្កគ្រោះថ្នាក់ដល់នរណាម្នាក់ឡើយ ។ ហេតុការណ៍នេះបានកើតឡើងនៅតាមបណ្តោយផ្លូវជាតិលេខ៥ ត្រង់ចំណុចសាលាឃុំបន្ទាយនាង ស្រុកមង្គលបុរី។
លោកអនុសេនីយ៍ទោ ហ៊ឹង ហាន នាយផ្នែកប៉ូលិសចរាចរស្រុកមង្គលបុរី បានប្រាប់ថា ម្ចាស់រថយន្តដឹកផ្លែឈើក្រឡាប់ផ្ងារជើងនោះឈ្មោះខៀវ សុខ ភេទប្រុស អាយុជាង៦០ឆ្នាំ រស់នៅក្នុងស្រុកបាណន់ ខេត្តបាត់ដំបង និងរថយន្តរបស់គាត់ម៉ាកហ៊ីយ៉ាន់ដាយ (កូរ៉េ) ពាក់ស្លាកលេខស៊េរីចាស់ ។ ទាក់ទិននឹងមូលហេតុបង្កគ្រោះថ្នាក់នេះលោកអនុសេនីយ៍ទោ បានប្រាប់ដោយយោងតាមសម្តីម្ចាស់រថយន្តរងគ្រោះថា គាត់ដឹកផ្លែខ្នុរចេញពីខេត្តបាត់ដំបង យកទៅកាន់ខេត្តបន្ទាយមានជ័យ។ លុះមកដល់ចំណុចកើតហេតុ ខណៈគាត់បើករថយន្តក្នុងល្បឿនធម្មតាក្នុងទិសដៅពីត្បូងទៅជើងស្រាប់តែមានរថយន្ត២គ្រឿងបើកស្របទិសគ្នា មួយគ្រឿងជារថយន្ត១បាំងកន្លះដឹកត្រី និង១គ្រឿងទៀតធុនកាមរីដែលគេស្គាល់ថា ជារថយន្តរបស់ប៉ូលិសសេដ្ឋកិច្ចក្រសួងដែលបានដេញរថយន្តដឹកត្រី ហើយមកឈប់ពីមុខរថយន្តរបស់គាត់ធ្វើឱ្យគាត់ត្រូវជាន់ហ្វ្រាំង និងកាច់ចង្កូតគេចទាំងប្រថុចញ៉ុចក៏ក្រឡាប់ផ្ងារជើងបណ្តាលឱ្យផ្លែឈើធ្លាក់រាយប៉ាយពេញប្រឡាយ។
ចំពោះការចោទប្រកាន់នេះ ត្រូវបានលោកអនុសេនីយ៍ទោ ហ៊ឹង ហាន ឆ្លើយបដិសេធថា គ្រោះថ្នាក់នេះកើតឡើង ដោយសារតែមានរថយន្តធុនធំ១គ្រឿងបើកមកឈប់ពីមុខរថយន្ត ដឹកផ្លែឈើដោយគ្មានភ្លើងសញ្ញា ហើយអ្នកបើកបររថយន្តដឹកផ្លែឈើនោះបានជាន់ហ្វ្រាំងបន្ទាន់ពេក ដោយសារខ្លាចបុករថយន្តដែលឈប់ពីមុខនោះ ទើបក្រឡាប់ធ្លាក់ក្នុងប្រឡាយតែម្តង ។ ពេលនោះគេឃើញមានរថយន្តប៉ូលិសសេដ្ឋកិច្ចក្រសួងបើកមកឈប់មើលដែរ ។ លោកក៏បានបញ្ជាក់ថា ចំពោះរថយន្តដឹកផ្លែឈើដែលក្រឡាប់ ក្រោយពេលប៉ូលិសចរាចរធ្វើការវាស់វែងហើយ រកមិនឃើញរថយន្តណាមួយជាអ្នកបង្កឡើងទេ៕
ចែករំលែកព័តមាននេះ