រាជធានីភ្នំពេញ ៖ ជនសង្ស័យប្លន់ប្រដាប់អាវុធចំនួន៣នាក់ត្រូវប៉ូលិសការិយាល័យព្រហ្មទណ្ឌកំរិតធ្ងន់នៃស្នងការដ្ឋានរាជធានីចាប់ខ្លួនជាបន្តបន្ទាប់នៅថ្ងៃទី២៨ ខែកុម្ភៈ ក្រោយពីពួកគេប្លន់យករថយន្តម៉ាកតូយ៉ូតាកាមរីឆ្លាម ស៊េរី១៩៩៨ ពណ៌ស្ករ កាលពីថ្ងៃទី២២ កុម្ភៈ នៅផ្លូវជាតិលេខ៥ ម្តុំស្ពានស្រះអង្កាម ខេត្តកំពង់ឆ្នាំង ពីជនរងគ្រោះឈ្មោះលឹម សុម៉ាល័យ ប្រកបរបររត់រថយន្តឈ្នួល ។
នៅព្រឹកថ្ងៃទី២ មីនា ប៉ូលិសការិយាល័យព្រហ្មទណ្ឌកំរិតធ្ងន់នៃស្នងការដ្ឋានរាជធានីធ្វើសន្និសីទកាសែតមួយដើម្បីបង្ហាញមុខជនសង្ស័យប្លន់ប្រដាប់អាវុធទាំង៣នាក់នោះ។ លោកជួន ណារិន នាយការិយាល័យព្រហ្មទណ្ឌកំរិតធ្ងន់ដែលជាអ្នកដឹកនាំក្នុងការបង្ក្រាបករណីនោះឱ្យដឹងថា នៅថ្ងៃទី២២ កុម្ភៈ វេលាម៉ោង១៦ ឈ្មោះលឹម សុម៉ាល័យ ដែលជាអ្នករត់តាក់ស៊ីពីភ្នំពេញ ទៅបាត់ដំបង និងពីបាត់ដំបងមកភ្នំពេញ ត្រូវជនសង្ស័យ៤នាក់ជួលឱ្យដឹកទៅភ្នំពេញ ដោយឯកភាពក្នុងតម្លៃ៤៥ដុល្លារ ។ឈ្មោះលឹម សុម៉ាល័យ បានយករថយន្តម៉ាកតូយ៉ូតាឆ្លាម ពណ៌ស្ករ ស៊េរី១៩៩៨ ពាក់ស្លាកលេខភ្នំពេញ 2H-9054 ដឹកជនសង្ស័យទាំង៤នាក់នោះ គឺដឹកពីខេត្តបាត់ដំបងមកភ្នំពេញ ។ ពេលដឹកមកដល់ចំណុចស្ពានស្រះអង្កាម ខេត្តកំពង់ឆ្នាំង ម៉ោងប្រហែល១៩ ជនសង្ស័យទាំង៤នាក់នោះប្រាប់ឱ្យឈ្មោះលឹម សុម៉ាល័យ ឈប់រថយន្ត ដើម្បីបត់ជើងតូច។ ពេលនោះឈ្មោះលឹម សុម៉ាល័យ បានឈប់រថយន្ត ហើយជនសង្ស័យទាំង៤នាក់បានចុះពីលើរថយន្តដើរទៅឈរទន្ទឹមគ្នាបត់ជើងតូច។ បានប្រហែល២នាទីពួកគេដើរចូលរថយន្តវិញ ហើយភ្លាមនោះជនសង្ស័យដែលអង្គុយទន្ទឹមឈ្មោះលឹម សុម៉ាល័យ បានដកអាវុធខ្លីមិនស្គាល់ម៉ាកភ្ជង់ក្បាលខាងស្តាំរបស់លឹម សុម៉ាល័យ ចំណែកជនសង្ស័យ២នាក់ទៀតអង្គុយខាងក្រោយ ដកអាវុធខ្លីភ្ជង់ចង្កេះខាងក្រោយ គំរាមមិនឱ្យស្រែក និងម្នាក់ទៀតដកអាវុធខ្លីភ្ជង់ពីខាងក្រៅរថយន្ត ។
ប្រភពដដែលបន្តថា ជនសង្ស័យ២នាក់ដែលអង្គុយខាងក្រោយបានទាញឈ្មោះលឹម សុម៉ាល័យ ឱ្យមកក្រោយ រួចយកខ្សែកៅស៊ូយឺតរាងមូលមានទម្ពក់សងខាងចងដៃទាំង២មកក្រោយ និងយកស្កុតពណ៌ស មករុំមុខ និងមាត់ជិត និងយកខ្សែចង.កជើងថែមទៀត ។ ពួកគេបានបើករថយន្តយកឈ្មោះលឹម សុម៉ាល័យ ទៅទម្លាក់ចោលនៅផ្លូវទំនប់កប់ស្រូវ ស្ថិតនៅក្នុងខណ្ឌសែនសុខ រាជធានីភ្នំពេញ ។ រថយន្តនោះត្រូវជនសង្ស័យទាំង៤នាក់ យកទៅ ព្រមទាំងសំភាររបស់ឈ្មោះលឹម សុម៉ាល័យ មានដូចជា ទូរស័ព្ទ២គ្រឿង ម៉ាកណូគា១គ្រឿង និងម៉ាកសាំសុង១គ្រឿង ប័ណ្ណសំគាល់រថយន្ត (ថតចំលង) ចំនួន១សន្លឹក អត្តសញ្ញាណប័ណ្ណសញ្ជាតិខ្មែរ១សន្លឹក (ថតចំលង) ប្រាក់៣០ដុល្លារ និង១០ម៉ឺនរៀល។ ក្រុមជនសង្ស័យទាំង៤នាក់បានជិះរថយន្តរបស់ឈ្មោះលឹម សុម៉ាល័យ គេចខ្លួនបាត់ ។
នៅថ្ងៃទី២៨ កុម្ភៈ ២០១១ សមត្ថកិច្ចបានឃាត់ខ្លួនជនសង្ស័យម្នាក់ឈ្មោះអ៊ុក ណុច អាយុ៣០ឆ្នាំ មានទីលំនៅក្នុងភូមិក្រាំងដូង ឃុំសំរោងក្រោម ស្រុកបន្ទាយមាស ខេត្តកំពត។ ឆ្លងតាមចំលើយសារភាពសមត្ថកិច្ចបានបន្តសហការជាមួយសមត្ថកិច្ចអធិការដ្ឋាននគរបាលស្រុកបន្ទាយមាសឃាត់ខ្លួនជនសង្ស័យ២នាក់ទៀត គឺម្នាក់ឈ្មោះឡាំ សុភ័ក្រ អាយុ២៨ឆ្នាំ និងម្នាក់ទៀតឈ្មោះឡាំ វីរៈ អាយុ២៣ឆ្នាំ។
ការបង្ក្រាបជនសង្ស័យប្លន់ប្រដាប់អាវុធចំនួន៣នាក់នេះ ការិយាល័យប៉ូលិសព្រហ្មទណ្ឌកំរិតធ្ងន់នៃស្នងការដ្ឋានរាជធានីបានសហការជាមួយប៉ូលិសស្រុកបន្ទាយមាស ខេត្តកំពតផងដែរ ៕
ចែករំលែកព័តមាននេះ