រាជធានីភ្នំពេញ ៖ សិស្សានុសិស្ស លោកគ្រូអ្នកគ្រូ និងបុគ្គលិករបស់មជ្ឍមណ្ឌលអូស្ត្រាលីសម្រាប់ការបណ្តុះបណ្តាល (ACE) រួមនឹងអាណាព្យាបាលសិស្សផ្សេងទៀត រៀបចំដង្ហែបុណ្យផ្កាសាមគ្គីទៅវត្តឈូកវ៉ា
រាជធានីភ្នំពេញ ៖ សិស្សានុសិស្ស លោកគ្រូអ្នកគ្រូ និងបុគ្គលិករបស់មជ្ឍមណ្ឌលអូស្ត្រាលីសម្រាប់ការបណ្តុះបណ្តាល (ACE) រួមនឹងអាណាព្យាបាលសិស្សផ្សេងទៀត រៀបចំដង្ហែបុណ្យផ្កាសាមគ្គីទៅវត្តឈូកវ៉ា ស្ថិតនៅភូមិគោករកា សង្កាត់ព្រែកព្នៅ ក្នុងគោលបំណងដើម្បីប្រមូលថវិកាចូលរួមការសាងសង់សាលាធម្មសភា (សាលាឆាន់) មួយខ្នងដែលមានទទឹង២៧ម៉ែត្រ និងបណ្តោយ៣៧ម៉ែត្រ។ ពិធីនេះ ធើ្វឡើងកាលព្រឹកថ្ងៃទី៣០ សីហា ដោយមានអ្នកចូលរួមជាង២០០នាក់។ គូសបញ្ជាក់ថា សាលា ACE ត្រូវបានបង្កើតឡើងដោយ IDP Education(International Development Program) ដែលជាស្ថាប័នឈានមុខគេក្នុងការផ្តល់សេវាកម្មបញ្ចូនសិស្សទៅសិក្សានៅបរទេស និងជាស្ថាប័នអន្តរជាតិដែលមានបណ្តាញនៅ៣២ប្រទេសជុំវិញពិភពលោក។
លោកម៉ៅ ស្រេង នាយករបស់ IDP Education ប្រចាំកម្ពុជា មានប្រសាសន៍ថា ការប្រារព្ធពិធីបុណ្យផ្កាសាមគ្គីនេះឡើង មានការចូលរួមមកពីបណ្តាអាណាព្យាលសិស្សានុសិស្ស លោកគ្រូអ្នកគ្រូ នៅសាលា ACE រួមនឹងពុទ្ធបរិស័ទចំណុះជើងវត្តឈូកវ៉ាទាំងមូល ដែលនាំមកនូវបច្ច័យចូលរួមកសាងសរុបជាង៣៤លានរៀល ក្នុងនោះថវិការបស់សាលា ACE មានចំនួន១៧លានរៀល។ លោកថា បុណ្យផ្កាសាមគ្គីនេះ ដែលផ្តើមឡើងដោយសាលា ACE នេះជាលើកទី១ ហើយយើងសង្ឃឹមថា ពិធីបុណ្យនេះ យើងនឹងធ្វើឡើងនៅរៀងរាល់ឆ្នាំំ ដើម្បីបំផុសទឹកចិត្តសិស្សានុសិស្ស លោកគ្រូអ្នគ្រូទាំងអស់ឲ្យមានការចូលរួមជ្រោមជ្រែងនៅក្នុងវិស័យព្រះពុទ្ធសាសនា ក៏ដូចនៅក្នុងសកម្មភាពសង្គមនានា។
លោកម៉ៅ ស្រេង បញ្ជាក់ថា មូលហេតុដែលយើងជ្រើសរើសយកវត្តឈូកវ៉ាដោយដង្ហែនៅបុណ្យផ្កាសាមគ្គីពេលនេះ ដោយសារវត្តឈូកវ៉ាជូបការលំបាកខ្លាំងទៅលើសម្ភារសំណង់ក្នុងការសាងសង់សាលាឆាន់ថ្មីមួយខ្នងនេះ ព្រោះនៅពេលកន្លងមក ការចូលបច្ច័យរបស់ប្រជាពលរដ្ឋរស់នៅក្នុងមូលដ្ឋាននៅមានចំនួនតិច បើប្រៀបធៀបទៅនឹងតម្រូវការសាងសង់ពេលនេះ។ ការរៀបចំពិធីបុណ្យផ្ការសាមគ្គីដែលដឹកនាំដោយសិស្សានុសិស្ស លោកគ្រូអ្នកគ្រូរបស់បស់សាលា ACE ពេលនេះយើងប្រើរយៈពេលត្រឹម៣សប្តាហ៍ប៉ុណ្ណោះ តែយើងសង្ឃឹមថា នៅពេលលើកក្រោយៗទៀត យើងនឹងមានពេលច្រើនជាងនេះក្នុងការគៀរគរប្រមូលនូវថវិកា ដើម្បីកសាងវត្ត សាលារៀន ឬសកម្មភាពមនុស្សធម៌ផ្សេងទៀតនៅពេលអនាគត៕
ចែករំលែកព័តមាននេះ