យោងតាមរបាយការណ៍របស់ធនាគារវិនិយោគ និងអភិវឌ្ឍន៍កម្ពុជា (BIDC) បានឲ្យដឹងថា គិតមកត្រឹមខែមិថុនា ឆ្នាំ២០១៥ ធនាគារ BIDC មានទ្រព្យសរុបប្រមាណ៦២០លានដុល្លារអាមេរិក ដែលចំនួននេះមានការកើនឡើង៣,២ដងធៀបនឹងឆ្នាំ២០០៩ ខណៈពេលឥណទានសរុបដែលបានផ្តល់ប្រមាណជិត៥០០លានដុល្លារអាមេរិក កើនឡើង៣,៥ ដងធៀបនឹងឆ្នាំ ២០០៩ ប្រាក់បញ្ញើរបស់អតិថិជនក្នុងស្រុកមានចំនួន២២០លានដុល្លារអាមេរិក កើន២,៣ ដងធៀបនឹងឆ្នាំ២០០៩។
បើតាមការឲ្យដឹងពីលោកអគ្គនាយកធនាគារ BIDC ដែលបានថ្លែងក្នុងកម្មវិធីរំលឹកខួបគំរប់២០ឆ្នាំនៃធនាគារ BIDV ដែលបានធ្វើឡើងកាលពីថ្ងៃទី២៨ សីហា ២០១៥ បានឲ្យដឹងថា ធនាគារ BIDV ត្រូវបានបង្កើតឡើងតាំងពីឆ្នាំ១៩៥៧ នៅពេលចាប់ផ្តើមដំបូងជាធនាគារដែល មានមុខងារបែងចែកធនធានទុនដែលជាថវិការបស់រដ្ឋាភិបាល។ រហូតមកដល់ឆ្នាំ១៩៩៥ ធនាគារ BIDV បានផ្លាស់ប្តូររចនាសម្ព័ន្ធប្រតិបត្តិការមកជាធនាគារពាណិជ្ជវិញ និងមានការរីកចំរើនគួរជាទីកត់សម្គាល់។ បច្ចុប្បន្នទ្រព្យសរុបរបស់ BIDV កើនឡើងដល់៣៥ពាន់លានដុល្លារអាមេរិក ស្ថិតក្នុងចំណោម៤ធនាគារធំបំផុត នៅក្នុងប្រទេសវៀតណាម។ លោកបញ្ជាក់ថា ដើម្បីសម្រេចបានលទ្ធផលដូចក្នុងពេលនេះ តាំងពីពេលចាប់ផ្តើមផ្លាស់ប្តូររចនាសម្ព័ន្ធប្រតិបត្តិការទៅជាធនាគារពាណិជ្ជធនាគារ BIDV បានព្យាយាមធ្វើការបមែប្រមូលចលនាទុនទាំងក្នុងប្រទេស និងធ្វើការស្វែងរកប្រភពទុនពីបរទេស ព្រមទាំងសហការជាមួយដៃគូរអន្តរជាតិពង្រីកសកម្មភាព អាជីវកម្មផ្គត់ផ្គង់ដើមទុនដល់គំរោងអភិវឌ្ឍន៍សេដ្ឋកិច្ចសង្គម របស់ប្រទេសជាតិ ។ ក្នុងរយៈពេល២០ឆ្នាំដែលបានធ្វើសមាហរណកម្មទៅ ក្នុងទីផ្សារហិរញ្ញវត្ថុសកលលោក ក៏ដូចជាក្នុងទីផ្សារហិរញ្ញវត្ថុកម្ពុជា ធនាគារ BIDV បានយកចិត្តទុកដាក់យ៉ាងពិសេសក្នុងកិច្ចការបង្កើតឡើងនូវបណ្តាវត្តមានពាណិជ្ជកម្មរបស់ខ្លួនចាប់តាំងពីឆ្នាំ២០០៩មក។
លោកបន្ថែមថា BIDC តែងតែជាធនាគារផ្តល់ទុន និងសេវាកម្ម ដ៏ទំនើបសំបូរបែបសមស្របតាមតម្រូវការរបស់អតិថិជនក្នុងប្រទេសកម្ពុជា រួមមានទាំងអតិថិជនក្នុងស្រុក និងវិនិយោគិនបរទេស ។ លោកបញ្ជាក់ថា ជាមួយលទ្ធផលនេះ បានបង្ហាញចេញជាលទ្ធផលជាវជ្ជមានក្នុងសកម្មភាពអាជីវកម្ម និងផលចំណេញមានកំណើនកាន់តែប្រសើរឡើងជានិច្ច ៕
ចែករំលែកព័តមាននេះ