ខេត្តកំពង់ឆ្នាំង ៖ ជនពិការជាគ្រួសារក្រីក្រ និងជនចាស់ជរាគ្មានទីពឹងចំនួន៥នាក់ នៅភូមិចន្លោះរ៉េន ឃុំស្វាយជ្រុំ និង១គ្រួសារនៅភូមិត្រពាំងពោធិ ឃុំពង្រ ស្រុករលាប្អៀរ កាលពីព្រឹកថ្ងៃទី២ កញ្ញា ២០១៥ ត្រូវបានលោកស្រី កែ ច័ន្ទមុនី អ្នកតំណាងរាស្ត្រគណបក្សប្រជាជនកម្ពុជាមណ្ឌលកំពង់ឆ្នាំង លោកស្រី តុង ណារី សមាជិកក្រុមប្រឹក្សាខេត្ត លោក សេង វិចិត្រ ប្រធាន(ស.ស.យ.ក) ស្រុករលាប្អៀរ បានចុះសាកសួរសុខទុក្ខ និងនាំយកអំណោយផ្ទាល់ខ្លួន អំណោយរបស់សប្បុរសជនទៅចែកជូនដល់លំនៅឋានដោយផ្ទាល់ដៃ ។
លោកស្រី តុង ណារី សមាជិកក្រុមប្រឹក្សាខេត្ត បានឱ្យដឹងថា គ្រួសារក្រីក្រជាជនពិការ និងជនចាស់ជរាគ្មានទីពឹងទាំង៦គ្រួសារ ក្នុងមួយគ្រួសារៗទទួលបាន មី១កេស, អង្ករ២០គីឡូក្រាម, ត្រីខ១យួរ, អំបិល៥គីឡូក្រាម, ស្ករស២គីឡូក្រាម និងប្រាក់៥ម៉ឺនរៀល ព្រមទាំងបានចែក នំ ខោអាវ ដល់ក្មេងៗ និងឧបត្ថម្ភដល់ប្រជាការពារប្រាក់សរុប១០ម៉ឺនរៀលផងដែរ ។
លោកស្រី កែ ច័ន្ទមុនី បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចអគ្គមហាសេនាពញាចក្រី ហេង សំរិន ប្រធានរដ្ឋសភា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលកន្លងមក សម្តេចតែងតែនឹករលឹកនិងគិតគូរពីសុខទុក្ខ និងផលលំបាកក្នុងការរស់នៅរបស់បងប្អូននៅគ្រប់ទីកន្លែង គ្រប់មូលដ្ឋាន នៅពេលដែលពួកគាត់មានទុក្ខលំបាក គឺសម្តេចតែងតែផ្តល់ជូននូវអំណោយសង្គ្រោះជូនដល់បងប្អូនគ្រប់ៗគ្នាទាំងអស់ ដោយមិនបានប្រកាន់ពូជសាសន៍ ឬនិន្នាការនយោបាយឡើយ ។
លោកស្រី បានបន្តថា ទោះបីជាអំណោយទាំងនេះមានតិចតួចក៏ពិតមែន តែអាចជួយដោះស្រាយការលំបាករបស់បងប្អូន លោកយាយលោកតា បានមួយគ្រាផងដែរ ។លោកស្រី ក៏បានផ្តាំផ្ញើដល់គ្រួសារក្រីក្រពិការ និងលោកយាយចាស់ជរាគ្មានទីពឹងទាំង៦គ្រួសារ ឱ្យខិតខំថែរក្សាសុខភាពដោយរស់នៅស្អាត ហូបស្អាត ផឹកស្អាត និងសម្រាកក្នុងមុង ដើម្បីការពារសុខភាពកុំឱ្យឈឺស្កាត់ខាតបង់ប្រាក់កាក់ ។
គ្រួសារក្រក្រីជាពិការ និងលោកយាយចាស់ជរាគ្មានទីពឹងទាំង៦គ្រួសារ សូមគោរពជួនពរដល់សម្តេច លោកស្រី និងសប្បុរសជនទាំងអស់ សូមទទួលបានជ័យជម្នះគ្រប់តួនាទីភារកិច្ច រួមគ្នាដឹកនាំប្រទេសជាតិ ប្រកបដោយភាពសុខសាន្ត មានសុខសន្តិភាព មានការអភិវឌ្ឍនភាពលើគ្រប់វិស័យ ដើម្បីប្រជាពលរដ្ឋ ភាពសម្បូរសប្បាយរុងរឿងរហូតតទៅអនាគត ៕
ចែករំលែកព័តមាននេះ