ខេត្តកណ្តាល ៖ ក្រោយពីទទួលបានដំណឹងតាមរយៈហ្វេសប៊ុក ពីជីវិតក្មេងកំព្រា៣នាក់ដែលម្តាយស្លាប់ចោល និងឪពុកចោកចោលទៅរួមរស់ជាមួយស្រីថ្មីមក តារាចម្រៀងប្រចាំផលិតកម្ម M លោកសន វិជ្ជបុត្រ និងពិធីករ លោកអឹុម ជីវ៉ា បាននាំយកអំណោយជាប្រាក់និងសម្ភារមួយចំនួនទៅជួយឧបត្ថម្ភដល់ពួកគេ។ ការទៅសួរសុខទុក្ខនេះ កាលពីព្រឹកថ្ងៃទី៣០ ខែសីហា ឆ្នាំ២០១៥ នៅផ្ទះកុមារកំព្រាទាំង៣នាក់ ក្នុងភូមិបាក់ដាវលើ ឃុំបាក់ដាវ ស្រុកខ្សាច់កណ្តាល ខេត្តកណ្តាល ។
កុមារកំព្រាទាំង៣នាក់នោះជ្រកក្នុងផ្ទះចាស់ទ្រុឌទ្រោមមើលពីមុខធ្លុះទៅក្រោយ មិនមានសម្ភារអ្វីជាដុំកំភួនទេក្រៅពីសម្លៀកបំពាក់ ចានឆ្នាំងដែលទុកដាក់រាយប៉ាយ ។
លោកសោម សារិទ្ធិ ប្រធានភូមិបាក់ដាវលើ និងជាអ្នកជួយមើលការខុសត្រូវកុមារកំព្រាទាំង៣នាក់នោះឱ្យដឹងថា កុមារច្បងឈ្មោះផា បញ្ញា អាយុ១២ឆ្នាំ ប្អូនបន្ទាប់ឈ្មោះផា រតនា អាយុ១០ឆ្នាំ និងទី៣កុមារីផា ចន្ថា អាយុ៧ឆ្នាំ ។ ពួកគេមានឪពុកឈ្មោះផេង ផា អាយុ៤២ឆ្នាំ និងម្តាយឈ្មោះសឿន អូន អាយុ៤៥ឆ្នាំ។ កុមារទាំង៣នាក់រស់នៅក្នុងសភាពវេទនា និងខ្វះភាពកក់ក្តៅពីគ្រួសារបន្ទាប់ពីម្តាយពួកគេស្លាប់ទៅកាលពី៣ឆ្នាំមុន ព្រោះតែជំងឺរ៉ាំរ៉ៃជាច្រើនមុខ ។ អ្វីដែលកាន់តែខ្លោចផ្សាថែមទៀត គឺបុរសជាឪពុកបានគេចយករួចខ្លួនទៅមានប្រពន្ធថ្មីមិនដែលមកមើលកូនម្តងណាឡើយ ។ កុមារកំព្រាទាំង៣នាក់នៅសល់តែជីដូនម្នាក់ដែលនៅឆា្ងយ និងមានជំងឺប្រចាំកាយដែលស្ទើរតែយឹតយោងអាត្មាមិនរួចផង។ ក្នុងចំណោមក្មេងទាំង៣នាក់នោះប្អូនស្រីពៅមានជំងឺប្រចាំកាយ គឺជំងឺបេះដូងស្ពៀតមួយចំហៀង ប៉ុន្តែពេលនេះនាងត្រូវសប្បុរសជនជួយនាំទៅព្យាបាលជំងឺ និងថែមទាំងបន្តនៅអង្គការមួយ ។ ពួកគេគ្មានសាច់ញាតិទេ គឺមានតែមេភូមិមេឃុំដែលជួយមើលការខុសត្រូវ ប៉ុន្តែមិនបានគ្រប់ពេលវេលាឡើយ ។ ទាំងមន្ត្រីថ្នាក់ឃុំ និងសប្បុរសជនមួយចំនួនបានជួយឧបត្ថម្ភជាសម្ភារ និងគ្រឿងបរិភោគសម្រាប់កុមារទាំងនោះដែរប៉ុន្តែមិនគ្រប់គ្រាន់តាមតម្រូវការទេ ។ កុមារទាំងនឡមិនបានសិក្សាទេកាលពីមុន ព្រោះតែឪពុកម្តាយពួកគេមិនយកចិត្តទុកដាក់ ។
តារាចម្រៀងប្រចាំផលិតកម្ម M លោក សន វិជ្ជបុត្រ បញ្ជាក់ថា លោកបានដឹងដំណឹងពីក្មេងកំព្រាទាំងនោះតាមរយៈមិត្តភក្តិក្នុងហ្វេសប៊ុក ទើបលោកធ្វើដំណើរទៅជួប ដោយនាំសម្ភារ គ្រឿងឧបភោគបរិភោគមួយចំនួន ទៅឧបត្ថម្ភដោយចំណាយប្រាក់ផ្ទាល់ខ្លួន និងប្រាក់មួយចំនួនពីសប្បុរសជន ។ សប្បុរសជនដែលរួមជាមួយលោកសន វិជ្ជបុត្រ មានលោកឡេង ផល្លា និងអ្នកស្រីសេង គឹមឌួង រស់នៅសហរដ្ឋអាមេរិក និងអាជីវករផ្សារអូរឫស្សីផងដែរ ។
តារាចម្រៀងដែលគេស្គាល់ច្រើនទាំងតាមរយៈការងារសិល្បៈ និងការងារមនុស្សធម៌ជាហូរហែរូបនេះបញ្ជាក់ថា «ខ្ញុំពិតជាមានអារម្មណ៍អាណិតពួកគេជាពន់ពេកដែលក្រៅពីក្រីក្រគឺខ្វះភាពកក់ក្តៅពីក្រុមគ្រួសារថែមទៀត ។ សម្ភារគ្រឿងឧបភោគបរិភោគទាំងនេះទោះមិនច្រើនគ្រប់គ្រាន់អាចបំពេញតម្រូវការរបស់ពួកគេបានយូរអង្វែង ប៉ុន្តែនេះគឺជាទឹកចិត្តដែលខ្ញុំ និងសប្បុរសជនមានចំពោះពួកគេ ។ ការផ្តល់ឱ្យនេះជួយឲ្យពួកគេមានអារម្មណ៍កក់ក្តៅ ហើយខ្ញុំសន្យាថា នឹងបន្តសកម្មភាពការងារមនុស្សធម៌នេះឲ្យស្របគ្នានឹងការងារសិល្បៈ» ។
ពិធីករ និងជាតារាសម្តែង លោកអឹុម ជីវ៉ាដែលបានចូលរួមឧបត្ថម្ភដល់ក្មេងកំព្រាទាំងនោះដែរ បាននិយាយថា លោកមានអារម្មណ៍អាណិតកុមារកំព្រាទាំង៣នាក់កាន់តែខ្លាំង ខណៈបានឃើញផ្ទាល់ភ្នែក ។ ក្នុងនាមជាក្មេងកំព្រាឪពុក លោកក៏ធ្លាប់ទទួលអារម្មណ៍ខ្វះភាពកក់ក្តៅដែរ ដូច្នេះលោកដឹងពីជីវិតដែលមានស្ថានភាពដូចគ្នានេះ ។ ការចូលរួមចែករំលែកប្រាក់ ពេលវេលាផ្ទាល់ខ្លួន គឺជាអ្វីដែលលោកចង់ចួលរួមចំណែកជួយដល់សង្គម បើទោះបីជាវាមានទំហំតិចតួចក្តី ហើយលោកនឹងនៅតែបន្តការងារបែបនេះទៅតាមលទ្ធភាព ។
លោកមេភូមិបាក់ដាវលើឱ្យដឹងថា ពេលនេះកូនបងទាំងពីរនាក់ត្រូវបានបញ្ជូនទៅសាលាឱ្យរៀនគួរបន្ថែមដើម្បីពួកគេស៊ាំទៅនឹងស្ថានភាពសាលារៀនមុនពេលបញ្ជូនទៅសាលា ឬអង្គការនានានៅពេលខាងមុខ ។
លោកមេភូមិបានថ្លែងអំណរគុណចំពោះសិល្បករដែលបានចំណាយពេលវេលា និងប្រាក់ជួយសម្រួលការលំបាករបស់កុមារកំព្រាទាំង៣នាក់នោះ ។ ទន្ទឹមនេះលោកមេភូមិអំពាវនាវដល់សប្បុរសជនបន្តជួយឧបត្ថម្ភដល់ក្មេងកំព្រាទាំង៣នាក់នោះទៀត ដើម្បីពួកគេអាចរស់បាន ៕
ចែករំលែកព័តមាននេះ