AFP កាលពីពេល ថ្មីៗកន្លងមកផ្សាយថា ក្រុមហ៊ុនកសិកម្ម និងម្ហូបអាហារ«Hassad Food» របស់កាតា បានប្រកាសពីផលសម្រេចរបស់ខ្លួនក្នុងការពិសោធដាំបន្លែមិនប្រើដី ឬ «Hydroponic» ដោយប្រើបច្ចេកវិទ្យាទាន់សម័យ ។ ដោយសារបែបនោះធ្វើឱ្យកាតាក្លាយជាប្រទេសដែលមានផ្ទៃដីភាគច្រើនជាវាលខ្សាច់អាចដាំបន្លែបានដោយខ្លួនឯងប្រហែល៧០% នៃតម្រូវការប្រើប្រាស់សរុបក្នុងប្រទេសនៅឆ្នាំ២០២៣ ឬកើនលើស៤ដងពីពេលបច្ចុប្បន្ន ។
ការប្រកាសលទ្ធផលពិសោធន៍ដែលចំណាយពេល២ឆ្នាំនៅក្នុងគម្រោង «Zulal Oasis Hydroponic» លើផ្ទៃដីកសិកម្មភាគខាងលិចក្រុងដូហា ប្រទេសកាតា គឺមានដាំបន្លែនានាដូចជា ប៉េងបោះ ដាំដោយមិនប្រើដីនៅក្នុងផ្ទះកញ្ចក់ និងប្រើទឹក ។ អ្នកនាំពាក្យរបស់ក្រុមហ៊ុន Hassad Food និយាយថា ក្រុមហ៊ុននឹងបង្ហាញគម្រោងក្នុងពេល ឆាប់ៗនេះ និងតម្រូវឱ្យប្រទេសកាតាបង្កើនទិន្នផលបន្លែរបស់ខ្លួនឱ្យបានច្រើន ក្នុងរយៈពេល៨ឆ្នាំខាងមុខ ។ បច្ចុប្បន្ន កាតាដាំបន្លែបានប្រហែល១១%ទៅ១៦% និងបន្លែសរុបតាមរដូវកាល ។ ការពិសោធបានផ្តោតជាសំខាន់លើការដាំប៉េងប៉ោះ ប៉ុន្តែបច្ចេកវិទ្យានេះអាចប្រើបានទៅលើបន្លែផ្សេងទៀត ដែលអាចទទួលការពេញនិយមនៅកាតា រួមមានត្រសក់ ត្រប់ និងឃ្លោកជាដើម ។
ចំណែកលោកណាស់ស៊័រ ម៉ូហាម៉េដ អាល់ហាចរី ជាប្រធាន និងគណៈកម្មការចាត់ការរបស់ក្រុមហ៊ុន Hassad Food ថ្លែងថា គម្រោងពិសោធន៍ដ៏លេចធ្លោនៃបច្ចេកវិទ្យា Zulal នេះបានបង្ហាញឃើញថា មានការស៊ីសង្វាក់គ្នាទៅនឹងស្ថានភាពអាកាសធាតុរបស់កាតា ។ ក្រៅពីនេះថែមទាំងផ្តល់ទិន្នផល និងគុណភាពលើសការគ្រោងទុក ។
បច្ចេកវិទ្យានោះចាត់ទុកថាជារូបភាពនៃការផលិតដ៏យូរអង្វែង និងមានលទ្ធភាពអាចផលិតបន្លែមានគុណភាពខ្ពស់បាន១២ខែ ក្នុងមួយឆ្នាំដោយមិនអាស្រ័យលើរដូវកាល ។ ការមានស្ថិរភាពផ្នែកម្ហូបអាហារ គឺជាកត្តាចម្បងសម្រាប់កាតាដែលបាននាំចូលបន្លែស្ទើរគ្រប់មុខក្នុងការបរិភោគ ៕
ចែករំលែកព័តមាននេះ