មីយ៉ាន់ម៉ា ៖ កងកម្លាំងសន្តិសុខបានបំបែកភ្លាមៗបាតុកម្មនានានៅមីយ៉ាន់ម៉ា ក្រោយការឡោមព័ទ្ធពួកបាតុករច្រើនរយនាក់នាភាគកណ្ដាលក្រុងរ៉ង់ហ្គូន កាលពីយប់មុន ដោយអាជ្ញាធរបានបង្កើនការឆ្មក់ និងការចាប់ខ្លួនមនុស្ស។
ផ្ទុយពីមុនការប្រមូលផ្ដុំគ្នាធ្វើបាតុកម្ម ត្រូវបានបំបែកភ្លាមៗក្នុងប្រទេស ដោយប្រើជាពិសេសនូវឧស្ម័នបង្ហូរទឹកភ្នែក និងគ្រាប់បែកធ្វើឲ្យហឹងត្រចៀក។ ពុំមានអំពើហិង្សាណាមួយត្រូវបានរាយការណ៍ឡើយផ្ទុយពីពេលមុនៗ។
នាយប់ថ្ងៃទី៨មកទី៩មីនាអ្នកតវ៉ាច្រើនរយនាក់ ក្នុងនោះមានជនជាតិមីយ៉ាន់ម៉ាច្រើននាក់ បាននាំគ្នាចេញប្រារព្ធទិវាសិទ្ធិនារីអន្តរជាតិ់ ហើយត្រូវបានឡោមព័ទ្ធអស់ច្រើនម៉ោង ក្នុងសង្កាត់SANCHAUNGក្រុងរ៉ង់ហ្គូន ។ កងកម្លាំងសន្តិសុខបានលុកចូលឆែកឆេរ នៅតាមផ្ទះទាំងឡាយតាមរកពួកបាតុករ ហើយស្នូរផ្ទុះត្រូវបានស្ដាប់ឮ។
សារព័ត៌មានរដ្ឋព្រមានថា នរណាដែលលាក់បាតុករនឹងត្រូវមានទោស។ ប៉ូលិសបានតាមដានត្រួតពិនិត្យគ្រប់ផ្ទះ។ ពួកបាតុករដែលប៉ូលិសឡោមព័ទ្ធអាចចាកចេញពីសង្កាត់នោះនាពេលព្រលឹម។
ក្រោយបាតុកម្មរាល់ថ្ងៃចាប់តាំងពី៥សប្ដាហ៍មកហើយ បណ្ដាសារព័ត៌មានរដ្ឋព្រមានទៀតថា ភាពអត់ធ្មត់របស់រដ្ឋាភិបាលបានអស់ហើយ។ កាលពីថ្ងៃទី៨មីនាបាតុករ៣នាក់បានត្រូវស្លាប់និងច្រើននាក់រងរបួស ។
នៅទីក្រុងMYITKYINA ភាគខាងជើងប្រទេស បណ្ដារូបភាពផ្សាយតាមបណ្ដាញសង្គម បង្ហាញបាតុករមួយចំនួនមានឈាមហូរដាប និងឃើញបាតុករដែលបែកក្បាលហូរឈាម។ ដូនជីមួយរូបស្លៀកពាក់សបានលុតជង្គង់នៅតាមដងវិថី អង្វរប៉ូលិស សូមកុំបាញ់។ នៅទីក្រុងម៉ាន់ដាឡៃរថយន្ត២គ្រឿងរបស់ទាហាន បានបើកបុកបាតុករបណ្ដាលឲ្យរងរបួស៦នាក់ ក្នុងនោះ២នាក់របួសធ្ងន់។
រយៈពេលប៉ុន្មានសប្ដាហ៍ចុងក្រោយនេះមនុស្សជាង១.៨០០នាក់បានត្រូវចាប់ខ្លួន។របបយោធាបានព្រមាន ចំពោះបណ្ដាមន្ត្រីរដ្ឋការថា ពួកអ្នកដែលមិនវិលចូលធ្វើការ នឹងត្រូវដេញចេញ។ ពួកយោធាធ្វើរដ្ឋប្រហារបានធ្វើមិនដឹងមិនឮចំពោះការតវ៉ា និងការថ្កោល ទោសរបស់សហគមន៍អន្តរជាតិ ដែលមានការមិនចុះសម្រុងគ្នាលើការឆ្លើយតប៕
ចែករំលែកព័តមាននេះ