សភាយេម៉ែនបានអនុម័តកាលពីថ្ងៃទី២៣ មីនា លើការប្រកាសអាសន្នក្នុងប្រទេស ដែលការអនុម័តនេះ ត្រូវបានបដិសេធដោយពួកប្រឆាំងដែលនៅតែក្រាញបន្តធ្វើបាតុកម្មនៅកណ្តាលរដ្ឋធានីយេម៉ែន ។
ពួកប្រឆាំងគ្រោងរៀបចំធ្វើនាថ្ងៃទី២៥ មីនា នូវការដើរហែក្បួនមួយសំដៅទៅកាន់វិមានរបស់ប្រធានាធិបតីលោកអាលី អាប់ដាល់ឡាហ៍ សាឡេហ៍ ដោយនៅមុខវិមាននេះមានដាក់ពង្រាយរថក្រោះរបស់កងឆ្មាំប្រធានាធិបតីក្រោមបញ្ជាការរបស់កូនប្រុសម្នាក់ ក្នុងចំណោមកូនប្រុសរបស់ប្រធានាធិបតី។
លោកអាលី អាប់ដាល់ឡាហ៍ សាឡេហ៍ កាន់អំណាចចាប់តាំងពី៣២ឆ្នាំមកហើយ ពេលនេះកំពុងស្ថិតនៅឯកោខ្លាំងប្រឈមមុខនឹងការតវ៉ារបស់ប្រជាជនដែលពេលនេះទទួលការគាំទ្រពីបណ្តាឧត្តមសេនីយ៍ និងបណ្តានាយទាហានរបស់កងទ័ព បណ្តាមេដឹកនាំសាសនា និងប្រមុខកុលសម្ព័ន្ធទាំងឡាយ ។
សហរដ្ឋអាេមរិកដែលជាសម្ព័ន្ធមិត្តរបស់យេម៉ែនក្នុងសង្គ្រាមប្រឆាំងភេរវកម្មបានសម្តែងការព្រួយបារម្ភចំពោះផលប៉ះពាល់ទាំងឡាយដែលអាចកើតមានដោយសារចលាចលនាពេលបច្ចុប្បន្នដល់ការតស៊ូប្រឆាំងអាល់កៃដា ក្នុងឧបទ្វីបអារ៉ាប់ ។
យោងតាមអាជ្ញាធរយេម៉ែនថា សមាជិកសភា១៦៤រូប ក្នុងចំណោមសមាជិកសភា១៦៥រូប ក្នុងសភាបានអនុម័តលើការបង្កើតការប្រកាសអាសន្នដែលស្នើឡើងកាលពីថ្ងៃទី១៨ មីនា ដោយប្រមុខរដ្ឋក្រោយការស្លាប់បាតុករ៥២នាក់ ដោយសារការបាញ់ប្រហាររបស់ពួកអ្នកគាំទ្ររបបយេម៉ែន ។
ចំណែកប្រធានាធិបតីយេម៉ែនបានធ្វើសម្បទានថ្មីទៀតដល់ពួកប្រឆាំងដោយស្នើកាលពីថ្ងៃទី២៣ មីនា ឱ្យមានការរៀបចំបោះឆ្នោតប្រធានាធិបតីតាំងពីដំណាច់ឆ្នាំនេះទៅ ពុំបាច់រង់ចាំធ្វើដល់ឆ្នាំ២០១៣ ។ ក្នុងសំណើមួយដល់ពួកប្រឆាំងលោកសាឡេហ៍ អះអាងថា នឹងមានការបោះប្រជាមតិមួយលើរដ្ឋធម្មនុញ្ញថ្មី ហើយបន្ទាប់មកនឹងមានការបោះឆ្នោតសភាថ្មីនិងបង្កើតរដ្ឋាភិបាលមួយ រួចរៀបចំការបោះឆ្នោតប្រធានាធិបតីមុនដំណាច់ឆ្នាំ២០១១ ៕
ចែករំលែកព័តមាននេះ