ខេត្តព្រៃវែង ៖ មន្ត្រីសុខាភិបាលខេត្តព្រៃវែង បានឱ្យដឹងនៅព្រឹកថ្ងៃទី៩ ខែមីនា ឆ្នាំ២០២១នេះថា មនុស្សចំនួន១១នាក់ដែលបានប៉ះពាល់ផ្ទាល់ជាមួយលោកគ្រូពេទ្យ អ៊ឹម សុភី ត្រូវបាននាំទៅធ្វើតេស្តរកឃើញវិជ្ជមានជំងឺកូវីដ១៩ហើយ…
ខេត្តព្រៃវែង ៖ មន្ត្រីសុខាភិបាលខេត្តព្រៃវែង បានឱ្យដឹងនៅព្រឹកថ្ងៃទី៩ ខែមីនា ឆ្នាំ២០២១នេះថា មនុស្សចំនួន១១នាក់ដែលបានប៉ះពាល់ផ្ទាល់ជាមួយលោកគ្រូពេទ្យ អ៊ឹម សុភី ត្រូវបាននាំទៅធ្វើតេស្តរកឃើញវិជ្ជមានជំងឺកូវីដ១៩ហើយ ដែលអ្នកទាំងនោះ គឺជាក្រុមគ្រួសាររបស់លោកគ្រូពេទ្យផ្ទាល់ និងអ្នកជំងឺដែលបានចូលមកសំរាកព្យាបាលនៅក្នុងគ្លីនិករបស់គាត់។
លោកវិជ្ជបណ្ឌិត អ៊ិន ពៅ ប្រធានការិយាល័យសុខាភិបាលស្រុកពាមរក៌ បានឱ្យដឹងថា ក្រោយពីចេញលទ្ធផលតេស្តកំហាករបស់លោកគ្រូពេទ្យ អ៊ឹម សុភី ឃើញវិជ្ជមានជំងឺកូវីដ១៩ភ្លាម ក្រុមគ្រូពេទ្យជំនាញមន្ទីរសុខាភិបាលខេត្ត និងស្រុក បានចុះមកធ្វើការហ៊ុមព័ទ្ធគ្លីនិករបស់គាត់ភ្លាមផងដែរ ព្រមទាំងបាននាំយកលោក អ៊ឹម សុភី ព្រមទាំងក្រុមគ្រួសារសរុបចំនួន៥នាក់ទៅដាក់ធ្វើចត្តាឡីស័កនៅមន្ទីរពេទ្យខេត្តភ្លាម។
ជាមួយគ្នានោះ ក៏បានប្រមូលយកកំហាកអ្នកពាក់ព័ន្ធផ្សេងៗទៀត សរុបជាង២០០នាក់ យកទៅពិនិត្យផងដែរ ដោយនៅថ្ងៃទី៧ មីនាកន្លងទៅ យកបានចំនួនជាង១០០នាក់ និងនៅថ្ងៃទី៨ ខែមីនា យកបាន១០២នាក់ ហើយនៅថ្ងៃទី៩ ខែមីនានេះ ក្រុមគ្រូពេទ្យកំពុងចុះយកសំណាកនៅស្រុកព្រះស្តេច និងនៅឃុំអ្នកលឿង ស្រុកពាមរក៌បន្ថែមទៀត ដូច្នេះតួលេខអ្នកពាក់ព័ន្ធអាចនឹងកើនឡើងច្រើនថែមទៀត។
លោកវេជ្ជបណ្ឌិតបានបន្តទៀតថា យោងតាមការប្រកាសរបស់ក្រសួងសុខាភិបាល លទ្ធផលពិនិត្យសំណាកលើកទី១ ក្នុងចំណោមមនុស្សជាង១០០នាក់នោះ គឺមាន១១នាក់មានវិជ្ជមានជំងឺកូវីដ១៩ ដែលអ្នកទាំងនោះជាមនុស្សនៅក្នុងគ្លីនិករបស់លោក អ៊ឹម សុភី ទាំងអស់ គឺប្រពន្ធកូនរបស់គាត់ និងអ្នកជំងឺដែលមកសំរាកព្យាបាលនៅក្នុងគ្លីនិក រីឯអ្នកផ្សេងទៀត គឺអវិជ្ជមាន។
ដោយឡែក សំណាកដែលប្រមូលយកទៅពិនិត្យលើកទី២ គឺនៅមិនទាន់ចេញលទ្ធផលនៅឡើយទេ បើគិតត្រឹមរសៀលថ្ងៃទី៩ ខែមីនានេះ។
គួរបញ្ជាក់ផងដែរថា នៅក្នុងព្រឹត្តិការណ៍ផ្ទុះឆ្លងជំងឺកូវីដ១៩ នៅក្នុងសហគមន៍ ស្រុកពាមរក៌នេះ ដោយសារតែមានអ្នកឆ្លង និងពាក់ព័ន្ធច្រើនបែបនេះ ទើបអាជ្ញាធរខេត្តព្រៃវែង បានសំរេចបិទមន្ទីរពេទ្យបង្អែកអ្នកលឿងជាបណ្តោះអាសន្ន ដោយឱ្យអ្នកជំងឺ និងគ្រូពេទ្យទាំងអស់ ត្រូវបង្ខាំងឱ្យនៅក្នុងមន្ទីរពេទ្យ មិនឱ្យចេញក្រៅ ហើយអ្នកខាងក្រៅក៏មិនឱ្យចូលដែរ។
ដោយឡែកក្រសួងអប់រំ នៅយប់ថ្ងៃទី៨ ខែមីនានេះ ក៏បានចេញប្រកាសបិទគ្រឹះស្ថានសិក្សាទាំងរដ្ឋ និងឯកជនទាំងអស់នៅក្នុងស្រុកពាមរក៌ជាបណ្តោះអាសន្នផងដែរ ដោយមិនមានការកំណត់ពេលវេលានោះទេ៕
ចែករំលែកព័តមាននេះ