រាជធានីភ្នំពេញ ៖ បុរសពីរនាក់ជាអ្នកលក់គ្រឿងសមុទ្រទល់មុខគ្នាបានឈ្លោះប្រកែកគ្នា សង្ស័យមកពីខឹងរឿងជះទឹកនៅមុខកន្លែងលក់ដូរ បង្កការភ្ញាក់ផ្អើលដល់សមត្ថកិច្ចហៅយកទៅធ្វើការណែនាំ កាលពីវេលាម៉ោង៦យប់ថ្ងៃទី៧ ខែមិនា ឆ្នាំ២០២១ នៅក្នុងផ្សារទួលពង្រ ភូមិទួលពង្រ…
រាជធានីភ្នំពេញ ៖ បុរសពីរនាក់ជាអ្នកលក់គ្រឿងសមុទ្រទល់មុខគ្នាបានឈ្លោះប្រកែកគ្នា សង្ស័យមកពីខឹងរឿងជះទឹកនៅមុខកន្លែងលក់ដូរ បង្កការភ្ញាក់ផ្អើលដល់សមត្ថកិច្ចហៅយកទៅធ្វើការណែនាំ កាលពីវេលាម៉ោង៦យប់ថ្ងៃទី៧ ខែមិនា ឆ្នាំ២០២១ នៅក្នុងផ្សារទួលពង្រ ភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
ភាគីទាំងសង្ខាងមិនបានស្គាល់ឈ្មោះនោះទេ គ្រាន់តែដឹងថាជាអ្នកលក់គ្រឿងសមុទ្រទាំង២នាក់នៅក្នុងផ្សារទួលពង្រ ហើយលក់នៅទល់មុខគ្នា ។
តាមប្រភពព័ត៌មានពីសមត្ថកិច្ចនគរបាលប៉ុស្តិ៍បានអោយដឹងថា នៅមុនពេលកើតហេតុ បុរស២នាក់ជាអ្នកលក់គ្រឿងសមុទ្រនៅក្នុងផ្សារទួលពង្រ លក់ទល់មុខគ្នា ស្រាប់តែមានបុរសម្នាក់បានជះទឹកនៅមុខកន្លែងលក់ ទើបបង្កឲ្យទាស់ពាក្យសម្ដីឌឺដងដាក់គ្នា ទៅវិញទៅមក ។ លុះបន្ទាប់មកមានបុរសម្នាក់បានទៅប្តឹងប្រធានផ្សារ ដើម្បីជួយណែនាំ លុះប្រធានផ្សារចុះមកដល់ និងណែនាំ ក៏អត់ស្តាប់ទៀត ទើបបានទៅប្តឹងដល់សមត្ថកិច្ច ឱ្យចុះមកភ្លាមៗផងដែរ ។
តាមប្រភពខាងលើបានបន្តថា លុះកំលាំងសមត្ថកិច្ចបានចុះទៅដល់ ក៏បានហៅភាគីទាំងសងខាងទៅសួរនាំនៅប៉ុស្តិ៍នគរបាល តែភាគីម្ខាងទៀតមិនព្រមទៅ ដោយយកឡេះថាអត់មានអីជិះ រង់ចាំជិះជាមួយបងប្អូន លុះកំលាំងសមត្ថកិច្ចចាំមួយសន្ទុះមិនឃើញបងប្អូនមកឌុប ដោយចាំយូរពេក សមត្ថកិច្ចប្រាប់អោយឡើងជិះម៉ូតូជាមួយកំលាំងសមត្ថកិច្ចដែរ ប៉ុន្តែខាងភាគីរូបនោះមិនព្រមជិះឡើយ ធ្វើអោយសមត្ថកិច្ចខឹងក៏ប្រើពាក្យសម្ដីខ្លាំងៗ ធ្វើឲ្យភាគីរូបនោះខឹងសម្បារនឹងសមត្ថកិច្ច ដោយនិយាយថា គ្រាន់តែឈ្លោះពាក្យសម្ដីសោះ ម្តេចក៏ចាប់ដូចបទល្មើសឧក្រិដ្ឋម្ល៉េះ? ព្រមទាំងមាននារីម្នាក់ទៀតជេរប្រមាថមើលងាយសមត្ថកិច្ចផងដែរ រហូតមានប្រជាពលរដ្ឋបានប្រទូស្តរ៉ាយជាមួយសសមត្ថកិច្ច ទើបភាគីទាំងសងខាងបាននាំគ្នាទៅប៉ុស្តិ៍នគរបាលជាបន្តបន្ទាប់ ។
ក្រោយពេលកើតហេតុ ភាគីអ្នកលក់គ្រឿងសមុទ្រទាំងសងខាងត្រូវបានសមត្ថកិច្ចធ្វើការណែនាំរួចអោយត្រឡប់ទៅផ្ទះវិញភ្លាមៗផងដែរ ៕
ចែករំលែកព័តមាននេះ