ខេត្តបាត់ដំបង ៖ កម្លាំងការិយាល័យប្រឆាំងគ្រឿងញៀន នឹងបញ្ជូនក្រុមអ្នកច្រៀងខារ៉ាអូខេក្លែមគ្រឿងញៀនចំនួន១០នាក់ ក្នុងចំណោម១៤នាក់ រាប់ទាំងលោកយាយវ័យ៧៨ឆ្នាំ មេការខារ៉ាអូខេម្នាក់ផង ទៅកាន់សាលាដំបូងខេត្ត ដើម្បីចាត់ការតាមផ្លូវច្បាប់នៅព្រឹកថ្ងៃទី៨ មីនា…
ខេត្តបាត់ដំបង ៖ កម្លាំងការិយាល័យប្រឆាំងគ្រឿងញៀន នឹងបញ្ជូនក្រុមអ្នកច្រៀងខារ៉ាអូខេក្លែមគ្រឿងញៀនចំនួន១០នាក់ ក្នុងចំណោម១៤នាក់ រាប់ទាំងលោកយាយវ័យ៧៨ឆ្នាំ មេការខារ៉ាអូខេម្នាក់ផង ទៅកាន់សាលាដំបូងខេត្ត ដើម្បីចាត់ការតាមផ្លូវច្បាប់នៅព្រឹកថ្ងៃទី៨ មីនា ។ នេះបើតាមការឱ្យដឹងពីមន្ត្រី នៃការិយាល័យជំនាញ ។
លោក សុខ និមល នាយការិយាល័យប្រឆាំងបទល្មើសគ្រឿងញៀន បានឱ្យដឹងថា ក្រុមអ្នកពាក់ព័ន្ធនឹងបទល្មើសគ្រឿងញៀនដែលកម្លាំងការិយាល័យរបស់លោកនិងកម្លាំងជំនាញអធិការដ្ឋានក្រុងបង្ក្រាបបាននោះ សរុបមានចំនួន១៤នាក់ ក្នុងនោះមានស្រីចំនួន៥នាក់ ។ លោកបានប្រាប់ថា ក្រុមត្រូវបានបង្ក្រាបកាលពីវេលាម៉ោង៥និង៣០នាទីទៀបភ្លឺថ្ងៃទី៧ មីនា ខណ:ដែលពួកគេកំពុងប្រមូលផ្ដុំគ្នាយ៉ាងពពាក់ពពូន ជូញដូរថ្មាំញៀនផង ប្រើប្រាស់ផង និងច្រៀងខារ៉ាអូខេផង នៅក្នុងបន្ទប់មួយដែលមានយីហោThe Voice ស្ថិតនៅក្នុងភូមិនំក្រៀប សង្កាត់ព្រែកព្រះស្ដេច ក្រុងបាត់ដំបង ដែលមានគ្រប់គ្រង ឬមេការឈ្មោះ ស្រ៊ុន ឡាយ ស្រីអាយុ៧៨ឆ្នាំ ជាអ្នកសម្របសម្រូលឱ្យមានការប្រព្រឹត្តបទល្មើសគ្រឿងញៀននៅទីនោះ ។
ប៉ុន្តែលោក សុខ និមល បានបញ្ជាក់ថា ក្រោយពីប្រមូលនិងបញ្ជូនទៅកាន់ការិយាល័យជំនាញ និងបន្ទាប់ពីសួរនាំដោយយោងតាមគោលការណ៍លោកស្នងការខេត្តនិងលោកព្រះរាជអាជ្ញា យើងបានសម្រេចកសាងសំណុំរឿងបញ្ជូនជនពាក់ព័ន្ធនឹងបទល្មើសនេះចំនូន១០នាក់ទៅកាន់តុលាការរាប់ទាំងស្ត្រីមេការវ័យ៧៨ឆ្នាំផង ។ ដោយឡែកក្មេងស្រីៗវង្វែងផ្ទះចំនួន៤នាក់ទៀត ត្រូវបានធ្វើការអប់រំនិងធ្វើកិច្ចសន្យាឱ្យត្រឡប់ទៅផ្ទះវិញ ។
បើយោងតាមរបាយការណ៏ ជនសង្ស័យដែលត្រូវបញ្ជូនទៅតុលាការរួមមាន ១-ឈ្មោះស្រ៊ុន ឡាយ ហៅ យាយឡាយ អាយុ៧៨ឆ្នាំ មេការខារ៉ាអូខេ ឬ អ្នកសម្របសម្រួលឱ្យមានបទល្មើសគ្រឿងញៀននៅក្នុងទីតាំងខ្លួន ។ ២-ឈ្មោះ ស្រេត ភារ៉ង់ ប្រុសអាយុ២១ឆ្នាំ ។ ៣-ឈ្មោះ ឈុន ម៉ារ៉ាឌី ភេទប្រុស អាយុ៣៧ឆ្នាំ ។ ៤-ឈ្មោះថន ម៉ារ៉ាឌី ភេទប្រុស អាយុ១៧ឆ្នាំ ។ ៥-ឈ្មោះ ឡន លាបសុខហេង ភេទប្រុស អាយុ១៩ឆ្នាំ ។ ៦-ឈ្មោះមាន សុភានុ ភេទប្រុស អាយុ២៤ឆ្នាំ ។ ៧-ឈ្មោះសេង ឆេង ភេទប្រុស អាយុ១៦ឆ្នាំ ។ ៨-ឈ្មោះ ឆេង ប៊ុនហេង ភេទប្រុស អាយុ១៦ឆ្នាំ ។ ៩-ឈ្មោះ តាំង ជីងជា អាយុ១៧ឆ្នាំ និង១០-ឈ្មោះខៀវ ដេវីត ប្រុសអាយុ១៧ឆ្នាំ ។
ដោយឡែកជនដែលត្រូវអប់រំមាន ១-ឈ្មោះ ដាង ស្រីមុំ ភេទស្រី អាយុ១៧ឆ្នាំ ។ ២-ឈ្មោះ ភ័ណ្ឌ បញ្ញាពេជ្រ ភេទស្រី អាយុ១៧ឆ្នាំ ។ ៣-ឈ្មោះ លីន លីតា ភេទស្រីអាយុ១៧ឆ្នាំ និង៤-ឈ្មោះហាក់ ស្រីម៉ី ភេទស្រី អាយុ១៧ឆ្នាំ ។
បើតាមប្រភពនានា បានទម្លាយពីប្រវត្តិ ខារ៉ាអូខេ The Vioce របស់យាយឡាយ មេការដ៏ចំណាស់ផុតលេខខាងលើនេះថា កន្លងមកខារ៉ាអូខេនេះសំបូរតែក្រុមយុវជនក្មេងៗ ចូលច្រៀងនិងប្រព្រឹត្តបទល្មើសគ្រឿងញៀនយ៉ាងពពាក់ពពូន បើទោះជាអាជ្ញាធរបានចេញបម្រាមឱ្យបិទហាងខារ៉ាអូខេទាំងអស់ ដើម្បីទប់ស្កាត់ជំងឺកូវីដ១៩ក្ដី ។ ប៉ុន្តែទីតាំងខារ៉ាអូខេរបស់យាយឡាយនៅតែបើកទ្វារស្វាគមន៍អតិថិជនដដែល ។
លោក សុខ និមល ប្រធានការិយាល័យប្រឆាំងគ្រឿងញៀន បាននិយាយថា បើតាមការសាកសួរ ឈ្មោះ ស្រ៊ុន ឡាយ (មេការ) គឺជាអ្នកមើលការខុសត្រូវខារ៉ាអូខេផង និងជាអ្នកសម្របសម្រូលលឱ្យមានការលក់ដូរថ្នាំញៀនផង និងប្រើប្រាស់ថ្នាំញៀននៅក្នុងបន្ទប់ខារ៉ាអូខេរបស់គាត់ផង។
លោក សុខ និមល បានបញ្ជាក់ថា បើតាមចម្លើយពួកអ្នកចូលខារ៉ាអូខេ នៅកន្លែងយាយឡាយគ្មានថ្នាំញៀនលក់ទេ ។ ប៉ុន្តែបើអតិថិជនត្រូវការអាចប្រាប់យាយឡាយ យាយឡាយ នឹងទាក់ទងហៅអ្នកលក់ថ្នាំញៀនដឹកជញ្ជូនយកមកដល់បន្ទប់តែម្ដង ចង់ត្រូវការថ្នាំប្រភេទណាក៏មានដែរ។
ជុំវិញការបង្ក្រាបក្រុមអ្នកច្រៀងខារ៉ាអូខេក្លែមគ្រឿងញៀនខាងលើនេះ បើតាមលោក សុខ និមល បានប្រាប់ថា ជាមួយនឹងការឃាត់ខ្លួនមនុស្សប្រុសស្រីចំនួន១៤នាក់ខាងលើនេះ កម្លាំងជំនាញដកហូតបានវត្ថុតាងរួមមាន ថ្មាំញៀនប្រភេទ Ketamin ចំនួន៣ថង់, ថ្នាំញៀនប្រភេទMdmaចំនួន២គ្រាប់, បន្ទះថ្នាំពណ៌ក្រហមមានអក្សរFER VIT ចំនួន៦គ្រាប់, សម្ភារ:សម្រាប់វេចខ្ចប់និងប្រើប្រាស់ថ្មាំញៀនមួយចំនួន រួមទាំងឧបករណ៍ខារ៉ាអូខេមួយចំនួនផងដែរ ។
ប៉ុន្តែយ៉ាងណាក្ដី ពេលនេះលោកស្នងការខេត្ត បានបញ្ជាឱ្យបញ្ជូនជនពាក់ព័ន្ធចំនួន១០នាក់ទៅកាន់សាលាដំបូងខេត្តហើយ ។ ដោយឡែកស្រីៗវង្វែងផ្ទះចំនួន៤នាក់ ត្រូវបានធ្វើការអប់រំ និងធ្វើកិច្ចសន្យាអនុញាតឱ្យត្រឡប់ទៅស្គាល់ផ្ទះសម្បែងនិងស្គាល់មុខឪពុកម្ដាយវិញ ៕
ចែករំលែកព័តមាននេះ