ប្រទេសចិន ៖ ចិនហាក់មិនប្រញាប់ប្រញាល់ចាក់វ៉ាក់សាំងប្រឆាំងវីរុសកូវីដ-១៩ ដល់ប្រជាជនខ្លួន ខណៈប្រទេសនោះជាអ្នកផលិតវ៉ាក់សាំងបានច្រើនមុខ ។
ពិតណាស់ចិនមិនមានភាពចាំបាច់បន្ទាន់ណាមួយក្នុងការសម្រុកចាក់វ៉ាក់សាំង ព្រោះប្រទេសនេះអាចត្រួតត្រាបានការឆ្លងដោយអ្នកឆ្លងថ្មីប្រចាំថ្ងៃមកដល់ពេលនេះមានមិនលើសពីខ្ទង់១០
ឡើយ ហើយក្នុងចំណោមអ្នកឆ្លងថ្មីទាំងនោះភាគច្រើនជាអ្នកនាំចូល ។ មូលហេតុមួយទៀតមកពីចិនយល់ថា បរិមាណនៃការផលិតវ៉ាក់សាំងនោះលើពិភពលោកនៅមានកម្រិតមធ្យម ហើយចិនប្រកាន់យកផ្នែកការទូតវ៉ាក់សាំង ដោយបញ្ជូនវ៉ាក់សាំងច្រើនដូសទៅកាន់បរទេស ។ ចំណែកការចាក់វ៉ាក់សាំងនៅចិនធ្វើដោយយឺតៗ ។
ប្រទេសមហាអំណាចអាស៊ីនេះជាអ្នកនាំមុខគេក្នុងការផលិតវ៉ាក់សាំង ចង់ឃើញបណ្ដាប្រទេសកំពុងអភិវឌ្ឍន៍ទទួលបានការចាក់វ៉ាក់សាំងការពារ មានភាពស៊ាំ ឬប្រព័ន្ធការពារជាសមូហភាពអាចបើកឡើងវិញព្រំដែនរបស់ពួកគេជាមួយចិន ។ យោងតាមការសិក្សាមួយរបស់វិទ្យាស្ថាន IPSOS ថា ប្រជាជនចិន ដែលមានបំណងចាក់វ៉ាក់សាំងមានដល់៨៥% ពោលច្រើនជាងពលរដ្ឋអាមេរិកទៅទៀតដែលមានត្រឹម៧១% ។ ពលរដ្ឋបារាំងចង់ចាក់វ៉ាក់សាំងមានតែ៥៧% ។
លោក MATHIEU DUCHATEL នាយកកម្មវិធីអាស៊ីនៃក្រុមប្រឹក្សាយោបល់របស់វិទ្យាស្ថាន MONTAIGNE ក្រុងបារីសបានធ្វើការកត់សម្គាល់ថា ជាមួយមនុស្សស្លាប់តែ២នាក់ចាប់តាំងពីខែឧសភាមក ដោយសារវីរុសជីវភាពហាក់មានប្រក្រតីភាពឡើងវិញស្ទើរទាំងស្រុង ។ យុទ្ធសាស្ត្ររបស់ចិនមានប្រសិទ្ធភាពបំផុតនិងផ្ដល់អារម្មណ៍កក់ក្ដៅដល់ប្រជាជនខ្លួន ។
ចិនបានចាក់រួចហើយនូវវ៉ាក់សាំងប្រឆាំងវីរុសកូវីដ-១៩ ដល់ប្រជាជនជាង៥២លាននាក់គឺស្ថិតក្នុងលំដាប់ទី២លើពិភពលោកបន្ទាប់ពីសហរដ្ឋអាមេរិក ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ