ខេត្តប៉ៃលិន ៖ កាលពីពេលថ្មីៗមកនេះប្រជាកសិករម្នាក់ ដែលប្រកបមុខរបរកសិកម្មដាំបន្លែស្ពៃក្តោប និងដាំដើមខ្ទឹម នៅលើដីចម្ការដែលខ្លួនបានជួលគេក្បែរផ្លូវជាតិលេខ ៥៧ស្ថិតក្នុងភូមិប៉ាងរលឹម សង្កាត់អូរតាវ៉ៅ ក្រុងប៉សលិន ខេត្តប៉ៃលិន…
ខេត្តប៉ៃលិន ៖ កាលពីពេលថ្មីៗមកនេះប្រជាកសិករម្នាក់ ដែលប្រកបមុខរបរកសិកម្មដាំបន្លែស្ពៃក្តោប និងដាំដើមខ្ទឹម នៅលើដីចម្ការដែលខ្លួនបានជួលគេក្បែរផ្លូវជាតិលេខ ៥៧ស្ថិតក្នុងភូមិប៉ាងរលឹម សង្កាត់អូរតាវ៉ៅ ក្រុងប៉សលិន ខេត្តប៉ៃលិន បានត្អូញត្អែរ និងព្រួយបារម្មណ៍ចំពោះជីវភាព ខណ:កាប្រមូលផលបន្លែកសិកម្មនៅពេលនេះមានតម្លៃធ្លាក់ចុះខ្លាំង ស្ទើរតែលែងចង់ដាំបន្តទៀត ។ នេះបើតាមការរៀបរាប់ពីប្រជាកសិករឈ្មោះ ប៊ុន សុខ ភេទប្រុស អាយុ ៤៨ឆ្នាំ ។
លោក ប៊ុន សុខ បានប្រាប់ឱ្យដឹងថា គាត់ជាប្រជាកសិករ រស់នៅភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ហើយមានគ្នាប្រមាណពី ៥ ទៅ ៦គ្រួសារ បានដាំដំណាំបន្លែស្ពៃក្តោបជារៀងរាល់ឆ្នាំ ដែលកាលពីឆ្នាំ ២០២០ ឈ្មួញទិញបន្លែរបស់ខ្លួនក្នុង ១គីទ្បូក្រាម តម្លៃ ២៥០០រៀល តែរហូតមកដល់ដើមឆ្នាំ ២០២១ នេះ ឈ្មួញទិញត្រឹមតែ ១គីទ្បូក្រាម តម្លៃ ៣០០រៀលប៉ុណ្ណោះ ពោលគឺមានការធ្លាក់ចុះរហូតដល់ពី ៧ ទៅ ៨ដងនៃឆ្នាំមុនឯណោះ ដូច្នេះពួកគាត់ចង់សើចក៏សើចលែងចេញ ដោយលំបាករកប្រាក់សងថ្លៃជំពាក់គេតែម្តង ។
ប្រភពដដែលបានបន្តទៀតថា ក្នុងនោះតម្លៃដើមខ្ទឹមកាលពីមុនឈ្មួញទិញ ១គីទ្បូក្រាម តម្លៃ ៦០០០រៀល រីឯនៅដើមឆ្នាំថ្មីនេះឈ្មួញទិញត្រឹមតែ ១គីទ្បូក្រាម តម្លៃតែ ២៥០០រៀលប៉ុណ្ណោះ ដោយកាត់កងថ្លៃចំណាយចុះឡើង គឺខាតខ្លាំងណាស់ មិនអាចទទួលយកបាននោះទេ ហើយឈ្មួញកណ្ដាលគាត់មកទិញដល់ក្នុងចម្ការ ព្រោះកសិករមិនបានដឹកយកទៅលក់ដូរនៅទីផ្សារខ្លួនឯងនោះទេ ព្រោះគ្មានម៉ូតូរ៉ឺម៉ក ឬ រថយន្តសម្រាប់ដឹកលក់ ។
ទោះបីជាយ៉ាងណាប្រជាកសិករខាងលើបានបញ្ជាក់ថា ការដាំដំណាំបន្លែស្ពៃក្តោប និងដើមខ្ទឹមនេះ គឺងាយស្រួលក្នុងការថែទាំជាងដំណាំផ្សេងៗ ហើយឆាប់បានប្រមូលផល ដោយគ្រាន់តែមើលថែស្រោចទឹក ដាក់ជីបន្តិចបន្តួចប៉ុណ្ណោះ ដើម្បីការពារមិនឲ្យសត្វល្អិតចូលមកយាយីបំផ្លាញមុនពេលប្រមូលផល ចំពោះអាយុកាលនៃការចាប់ផ្តើមដាំរហូតដល់ប្រមូលផលមានរយៈពេលត្រឹមតែជាងពីរខែប៉ុណ្ណោះ គឺប្រមូលផលបានលក់ឱ្យឈ្មួញក្នុងក្រុងប៉ៃលិន ដឹកយកទៅលក់បន្តនៅផ្សារ ។
លើសពីនេះកសិករទាំងអស់អំពាវនាវដល់មន្ត្រីជំនាញ នៃមន្ទីរកសិកម្មខេត្ត ឱ្យចុះទៅជួយពន្យល់ណែនាំពួកគាត់ពីលក្ខណៈបច្ចេកទេសនៃការដាំដុះ និងជួយបណ្ដុះបណ្ដាលពីវិធីថែទាំដំណាំកសិកម្ម ព្រមទាំងរកទីផ្សារលក់ដូរឱ្យបានតម្លៃខ្ពស់ជាងនេះផងដែរ ព្រោះពួកគាត់ប្រាប់ថា ការប្រកបរបរកសិកម្មរាល់ថ្ងៃនេះ អស់រយៈពេលជិត ២០ឆ្នាំមកហើយ ពុំដែលឃើញមានមន្ត្រីជំនាញណាម្នាក់ចុះទៅជួយពន្យល់ណែនាំដល់ពួកគាត់ក្នុងការដាំដុះនោះទេ ឃើញតែធ្វើការនៅក្នុងមន្ទីរប៉ុណ្ណោះ ។
ពួកគាត់ក៏អំពាវបន្ថែមទៀតឱ្យប្រជាពលរដ្ឋនៅតាមភូមិ ជួយគាំទ្របន្លែរបស់កសិករយើង ជាបន្លែធម្មជាតិ គ្មានសារធាតុគីមី ដើម្បីជាកម្លាំងចិត្តដល់ពួកគាត់ក្នុងការដាំបន្លែគ្រប់មុខឱ្យមានតម្លៃនៅលើទីផ្សារ ដើម្បីលក់បានប្រាក់សម្រាប់ផ្គង់ផ្គង់ជីវភាព និងសងបំណុលគេ ៕
ចែករំលែកព័តមាននេះ