រាជធានីភ្នំពេញ ៖ ក្រោយមានការអន្តរាគមន៍ពីរាជរដ្ឋាភិបាលក្នុងការចែកជូនពូជស្រូវក្រោយទឹកជំនាន់កាលពីអំឡុងខែតុលា រួចមកតាមការគណនាកសិករកម្ពុជាអាចទទួលបានប្រាក់ចំណូលប្រមាណ ៧៨លានដុល្លារអាមេរិក ។ នេះបើតាមឯកឧត្តម វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ…
រាជធានីភ្នំពេញ ៖ ក្រោយមានការអន្តរាគមន៍ពីរាជរដ្ឋាភិបាលក្នុងការចែកជូនពូជស្រូវក្រោយទឹកជំនាន់កាលពីអំឡុងខែតុលា រួចមកតាមការគណនាកសិករកម្ពុជាអាចទទួលបានប្រាក់ចំណូលប្រមាណ ៧៨លានដុល្លារអាមេរិក ។ នេះបើតាមឯកឧត្តម វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ ។
ឯកឧត្តមមានប្រសាសន៍ថា តាមរយៈការចុះពិនិត្យ និងវាយតម្លៃកន្លងមកបានឱ្យដឹងថា កម្ពុជា នៅក្នុងឆ្នាំ ២០២០ កន្លងទៅបានជួបប្រទះនឹងគ្រោះធម្មជាតិចំនួនពីរដង គឺគ្រោះរាំងស្ងួតដើមរដូវវស្សា និងគ្រោះជំនន់ទឹកភ្លៀងនៅចុងរដូវវស្សា ដែលធ្វើឱ្យប៉ះពាល់ដល់ផ្ទៃដីដាំដុះដំណាំកសិកម្មប្រមាណជា ៥៦០,០០០ហិកតា ជាពិសេសដំណាំស្រូវបានប៉ះពាល់សរុបចំនួន ៤៤៩៧៩៧ហិកតា ដែលក្នុងនោះខូចខាតទាំងស្រុងចំនួន ១៥៤.៣២៨ហិកតា ស្ថិតនៅក្នុង ១៩ ខេត្ត ។
ឯកឧត្តមបន្ថែមថា ដើម្បីចូលរួមរំលែកទុក្ខលំបាករបស់ប្រជាកសិករ និងក្នុងគោលបំណងជំរុញផលិតកម្មស្បៀង បន្ទាប់ពីទទួលរងគ្រោះទឹកជំនន់ សម្តេចតេជោ បានដាក់ចេញបទបញ្ជារឲ្យបញ្ចេញគ្រាប់ពូជស្រូវស្រាលមិនប្រកាន់រដូវជាបន្ទាន់ បន្តបន្ទាប់អស់គ្រាប់ពូជស្រូវចំនួន ៦៥៧៦តោន ដើម្បីអន្តរាគមន៍ចែកជូនដល់គ្រួសារកសិករចំនួន ៦៩ ៨១៦គ្រួសារ សម្រាប់ធ្វើការស្តារដំណាំស្រូវឡើងវិញលើផ្ទៃដីប្រមាណ ៦៥ ៧៦០ហិកតា ។
ដោយមានកិច្ចសហការយ៉ាងជិតស្និត ជាមួយគណៈកម្មាធិការជាតិគ្រប់គ្រងគ្រោះមហន្តរាយ ស្ថាប័នពាក់ព័ន្ធ និងអាជ្ញាធរមូលដ្ឋានដីគ្រប់លំដាប់ថ្នាក់បានធ្វើអន្តរាគមន៍ផ្តល់គ្រាប់ពូជស្រូវជូនកសិករ ធ្វើការស្តារលើការដាំដុះឡើងវិញបានទាន់ពេលវេលា ហើយបានប្រព្រឹត្តទៅដោយរលូន ។ តាមការគណនាការចំណាយសម្រាប់ទិញគ្រាប់ពូជស្រូវ និងការដឹកជញ្ជូនគ្រាប់ពូជសម្រាប់ចែកកសិករអស់ថវិកាប្រមាណ ៤,៥៣ លានដុល្លារ ។
ឯកឧត្តមបន្ថែមថា ក្នុងការឆ្លើយតបទៅនឹងអនុសាសន៍ដ៏ខ្ពង់ខ្ពស់ពីសំណាក់សម្តេចតេជោនាយករដ្ឋមន្ត្រី ការស្តារការខូចខាតដំណាំស្រូវឡើងវិញក្រោយទឹកជំនន់បានចាប់ផ្តើមពីដើមខែវិច្ឆិកា រហូតដល់ដើមខែធ្នូ ឆ្នាំ ២០២០ ។ លទ្ធផលនៃការស្តារឡើងវិញមកដល់ពេលនេះ គឺបានប្រមូលផលបណ្តើរៗ និងអាចបញ្ចប់នៅដើមខែមេសា ឆ្នាំ ២០២១ ខាងមុខនេះ ។
តាមរយៈការចុះពិនិត្យនិងវាយតម្លៃកន្លងមកបានបញ្ជាក់ឱ្យដឹងថា ស្ថានភាពលូតលាស់របស់ដំណាំស្រូវដែលបានស្តារឡើងវិញ ស្ទើតែទាំងអស់មានការលូតលាស់បានល្អប្រសើរ ហើយនៅតំបន់មួយចំនួន ក៏បានការប្រមូលផលស្រូវជាបណ្តើរៗហើយដែរ រីឯទិន្នផលស្រូវសើម ដែលទទួលបានពី ៣ ទៅ ៦,៥តោនក្នុងមួយហិកតា (មធ្យម ៤,៥តោនក្នុងមួយហិកតា) អាស្រ័យលើស្ថានភាពដី និងលទ្ធភាពផ្គត់ផ្គង់ទឹកសម្រាប់ស្រោចស្រព ។
យោងតាមរបាយការណ៍របស់អគ្គនាយកដ្ឋានកសិកម្ម ដោយផ្អែកលើប្រព័ន្ធទិន្នន័យគ្រឹះ ភូតគាមអនាម័យ បានឱ្យដឹងថា ការនាំចេញផលិតផលស្រូវពីកម្ពុជា ទៅកាន់ប្រទេសវៀតណាម ក្នុងរយៈពេល ២ខែ ៤ថ្ងៃ ដើមឆ្នាំ ២០២១ នេះសម្រេចបានចំនួន ៧០៧ ៥៩៥តោន ក្នុងនេះការនាំចេញស្រូវផ្លូវការមានចំនួន ៣៤៥ ៦០០តោន ។ ដោយឡែកចំពោះទីផ្សារស្រូវវិញឆ្នាំនេះវិញ គឺកសិករភាគច្រើនសប្បាយចិត្ត ព្រោះតម្លៃស្រូវថ្លៃជាងរាល់ឆ្នាំ គឺពី ៩៥០ ដល់ ១១៧០ រៀលក្នុងមួយគីឡូក្រាម ៕
ចែករំលែកព័តមាននេះ