ខេត្តសៀមរាប ៖ ស្ត្រីកម្មករចេញពីស្រុកកំណើតទៅស៊ីឈ្នួលរើសគ្រាប់ស្វាយចន្ទីម្នាក់ បានយកសត្វគីង្គក់យកមកខ្ចប់អាំងហូបបាយ បណ្តាលឱ្យពុលស្លា.ប់ភ្លាមៗ បង្កឱ្យភ្ញាក់ផ្អើលពេញចម្ការស្វាយចន្ទីរហូតដល់សមត្ថកិច្ច។ ហេតុការណ៍ពុលគីង្គក់ស្លាប់នោះបានកើតឡើងនៅវេលាម៉ោង០៩ និង១៥នាទីព្រឹក ថ្ងៃទី៦ ខែមីនា ឆ្នាំ២០២១ ស្ថិតនៅក្នុងបរិវេណចម្ការស្វាយចន្ទីក្នុងភូមិត្រពាំងថ្ម ឃុំតាសៀម ស្រុកស្វាយលើ ខេត្តសៀមរាប។
បើតាមការឱ្យដឹងពីលោក អៀង ពិសិទ្ធ អភិបាលស្រុកស្វាយលើបានប្រាប់កោះសន្តិភាពតាមទូរស័ព្ទ នៅវេលាម៉ោង១០ និង៣០នាទីព្រឹក ថ្ងៃទី៧ ខែមីនា ឆ្នាំ២០២១នេះថា ក្រោយទទួលព័ត៌មានពីម្ចាស់ចម្ការឈ្មោះ សុក ហុង ភេទប្រុស អាយុ៦៣ឆ្នាំ រស់នៅភូមិត្រពាំងថ្ម ឃុំតាសៀម ស្រុកស្វាយលើ ខេត្តសៀមរាប បានរាយការណ៍មកថា មានមនុស្សពុលគីង្គក់ស្លាប់ភ្លាម កម្លាំងជំនាញបច្ចេកទេសស្រុក និងកម្លាំងព្រហ្មទណ្ឌស្រុក បានសហការជាមួយ កម្លាំងប៉ុស្ដិ៍តាសៀម, មេភូមិត្រពាំងថ្ម កម្លាំងប្រជាការពារចុះទៅដល់កន្លែងកើតហេតុ រួចធ្វើការពិនិត្យទៅលើសពភ្លាមៗផងដែរ។
លោកបានបញ្ជាក់ថា សពជនរងគ្រោះឈ្មោះ ស្រេង ភារម្យ ភេទស្រី អាយុ៤០ឆ្នាំ មានស្រុកកំណើតភូមិអណ្ដូងឡឹង ឃុំថ្មពួន ស្រុក ព្រៃឈរ ខេត្តកំពង់ចាម បច្ចុប្បន្នរស់នៅភូមិបឹងង៉ត ឃុំតាយ៉ែក ស្រុកសូទ្រនិគម ខេត្តសៀមរា មកធ្វើការជាកម្មកររើសគ្រាប់ស្វាយចន្ទីឱ្យម្ចាស់ឈ្មោះ សុក ហុង នៅភូមិត្រពាំងថ្ម ឃុំតាសៀម ស្រុកស្វាយលើ ខេត្តសៀមរាប។ លោកបានបញ្ជាក់ទៀតថា បើតាមការបំភ្លឺរបស់ឈ្មោះ ឈឿន វ៉ូន ភេទប្រុស អាយុ៥៦ឆ្នាំ រស់នៅភូមិបឹងង៉តដូចគ្នា ដែលមកធ្វើការជុំគ្នា បានប្រាប់សមត្ថកិច្ចឱ្យដឹងថា៖
នៅមុនពេលកើតហេតុ ម៉ោង០៨ និង១០នាទីព្រឹក ខ្លួន និងជនរងគ្រោះបាននាំគ្នាដើររើសគ្រាប់ស្វាយចន្ទីឲ្យឈ្មោះ សុក ហុង ជុំគ្នានៅពេលកំពុងតែរើស ស្រាប់តែជនរងគ្រោះមានសភាពក្អួតចង្អោរ ខ្លួនក៏នាំជនរងគ្រោះមកខ្ទមដែលពួកគេស្នាក់នៅហើយក៏រាយការណ៍ប្រាប់ទៅថៅកែឈ្មោះ សុក ហុង ពេលនោះថៅកែឈ្មោះ សុង ហុង បានបបួលទៅមន្ទីពេទ្យ តែជនរងគ្រោះបានប្រាប់ថា មិនទៅទេព្រោះខ្លួនប្រហែលជាពុលពងគីង្គក់ព្រឹកមិញ ដែលបានខ្ចប់អាំងគីង្គក់ហូបជាមួយបាយ តែពេលនេះក្អួតចេញមកអស់ហើយសម្រាកបន្ដិចលែងអីហើយ។
ឃើញដូចនោះឈ្មោះ ឈឿន វ៉ូន បានទៅយកក្រូចឆ្មាមកច្របាច់យកទឹកដាក់លាយជាមួយស្ករសឱ្យផឹក បន្ទាប់មកជនរគ្រោះបានទៅដេកសម្រាកលើដីក្បែរគល់ដូង។ ចំណែកខ្លួនក៏ទៅហៅប្រជាការពារភូមិឱ្យមកជួយមើល ពេលជនរងគ្រោះកំពុងតែដេកៗស្រាប់តែជនរងគ្រោះមានសភាពខាំសង្គួតធ្មេញហើយដាច់ខ្យល់ស្លាប់តែម្ដង ខ្លួនក៏បានតេទូរស័ព្ទទៅប្រាប់សាច់ញាតិនៅឯស្រុកកំណើត។ ចំណែកថៅកែឈ្មោះ សុក ហុង ក៏បានរាយការណ៍ជូនសមត្ថកិច្ចដែរ។
ក្រោយការពិនិត្យ និងធ្វើកោសល្យវិច្ច័យទៅលើដងខ្លួនសាកសពរួចមក យើងរកឃើញក្បាល និង ស្បែកគីង្គក់នៅលើជ្រុញខ្ចប់ពងគីង្គក់ និងសត្វគីង្គក់អាំងពីរក្បាលនៅលើតុក្បែរចង្ក្រាន។ហើយការពិនិត្យផ្នែកក្បាល ដងខ្លួន និងអវៈយវៈពុំមានស្លាកស្នាមអ្វីគួរឱ្យកត់សម្គាល់ឡើយ ហើយសាច់ញាតិក៏បានសន្និដ្ឋានថា សពពិតជាស្លាប់ដោយសារពុលពងគីង្គក់មែន ហើយក៏មិនបានប្ដឹងទាមទារទៅណានៅថ្ងៃក្រោយឡើយ។ លោកបានបន្ថែមទៀតថា បន្ទាប់មកយើងបានធ្វើកំណត់ហេតុបច្ចុប្បន្នកម្លាំងជំនាញបានធ្វើការប្រគល់សពជូនសាច់ញាតិដើម្បីយកទៅធ្វើបុណ្យតាមប្រពៃណី៕ ដោយ ៖ ច័ន្ទ រស្មី
ចែករំលែកព័តមាននេះ