ប្រទេសយេម៉ែន ៖ យោងតាមប្រភពយោធារដ្ឋាភិបាលថាការប្រយុទ្ធដ៏សាហាវនានាបណ្ដាលឲ្យយុទ្ធជនបាត់បង់ជីវិតយ៉ាងតិច៩០នាក់រយៈពេល២៤ម៉ោងចុងក្រោយនេះក្នុងតំបន់ប្រេងកាតយុទ្ធសាស្ត្រម៉ារីប នាភាគខាងជើងយេម៉ែនដែលពួកឧទ្ទាមហ៊ូធីប៉ុនប៉ងវាយដណ្ដើមយកចាប់តាំងពី១ខែមកហើយពីកងកម្លាំងរដ្ឋាភិបាល ។
គាំទ្រដោយអ៊ីរ៉ង់ពួកឧទ្ទាមបានបើកធ្វើតាំងពីដើមខែកុម្ភៈមក ការវាយលុកថ្មីដើម្បីដណ្ដើមយក
ខេត្តម៉ារីប ជាខេត្តចុងក្រោយស្ថិតក្រោមការកាន់កាប់របស់រដ្ឋាភិបាលគាំទ្រដោយក្រុមចម្រុះដឹក
នាំដោយអារ៉ាប៊ីសាអូឌីតនៅភាគខាងជើងយេម៉ែន ។
ប្រភពយោធារដ្ឋាភិបាលគូសបញ្ជាក់ថា យុទ្ធជនយ៉ាងតិច៩០នាក់ ក្នុងនោះ៣២នាក់ជាសមាជិកកងកម្លាំងរដ្ឋាភិបាលនិងកុលសម្ព័ន្ធ បានត្រូវបាត់បង់ជីវិតក្នុងការប៉ះទង្គិចគ្នាជាមួយពួកឧទ្ទាមហ៊ូធី ។
ចំណែកអារ៉ាប៊ីសាអូឌីតបានវាយប្រហារតាមអាកាសកាលពីយប់ថ្ងៃទី៥មក៦មីនា ប្រឆាំងពួក
ឧទ្ទាម ។ ប្រភពនោះបន្តថាការប៉ះទង្គិចគ្នាមានសភាពខ្លាំងក្លាជាពិសេសនៅលើរណសិរ្សប្រយុទ្ធ៦ ដោយកងកម្លាំងរដ្ឋាភិបាលអាចទប់ការវាយរុលទៅមុខលើរណសិរ្ស KASSARA ភាគពាយ័ព្យទីក្រុងម៉ារីប ។ ការប្រយុទ្ធគ្នាក៏បណ្ដាលឲ្យមានអ្នករបួសច្រើនសិបនាក់ផងដែរ ។
កងយន្តហោះរបស់អារ៉ាប៊ីសាអូឌីតបានចេញវាយប្រហារជាច្រើនលើកប្រឆាំងបណ្ដាគោលដៅពួកឧទ្ទាមលើរណសិរ្សជាច្រើនដោយផ្តាច់ជីវិតពួកឧទ្ទាមយ៉ាងតិច៥៨នាក់ និងធ្វើឲ្យរបួសច្រើនសិបនាក់ទៀត ។
ចំណែកពួកឧទ្ទាមក្នុងសេចក្ដីប្រកាសមួយនិយាយថា បានបាត់បង់យុទ្ធជនខ្លួនច្រើននាក់តែមិនបញ្ជាក់ពីចំនួនពិតប្រាកដឡើយ ។ ជាង៦ឆ្នាំនៃសង្គ្រាមកងកម្លាំងពួកឧទ្ទាមអាចវាយដណ្ដើមកាន់កាប់ត្រួតត្រា ផ្នែកដ៏ធំនាភាគខាងជើងប្រទេសក្នុងនោះមានរដ្ឋធានីទីក្រុងសាណាផងដែរ ។ ទន្ទឹមនឹងការវាយលុកលើទីក្រុងម៉ារីប ពួកហ៊ូធីបានបង្កើនការវាយប្រហារសំដៅលើអារ៉ាប៊ីសាអូឌីតផងដែរ ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ