ខេត្តកំពង់ធំ ៖ មានករណីប្រទះឃើញលោកតាវ័យ៨១ឆ្នាំម្នាក់បានបញ្ចប់ជីវិតនៅលើដើមតាសេក បានបង្កឲ្យមានការភ្ញាក់ផ្អើលមួយកើតឡើងកាលពីព្រឹកថ្ងៃទី៦ ខែមីនា ឆ្នាំ២០២១ នៅចំណុចត្រពាំងកកោះ ស្ថិតក្នុងភូមិទួលវិហ៊ា ឃុំជ្រាប់ ស្រុកសន្ទុក ខេត្តកំពង់ធំ ។
លោកតារងគ្រោះឈ្មោះ លន់ វង់ អាយុ៨១ឆ្នាំ មុខរបរកសិករ រស់នៅភូមិឃុំកើតហេតុខាងលើ ។
តាមការឲ្យដឹងពីសាក្សីឈ្មោះ បិន សំអុល ភេទប្រុស អាយុ៤៣ឆ្នាំ រស់នៅភូមិជាមួយនឹងជនរងគ្រោះបានឱ្យដឹងថា នៅព្រឹកថ្ងៃកើតហេតុ រូបគាត់បានដឹកក្របីយកទៅចងឲ្យស៊ីស្មៅនៅក្បែរកន្លែងកើតហេតុខាងលើ ស្រាប់តែប្រទះឃើញជនរងគ្រោះយកខ្សែស្មាច់ចងនឹងដើមតាសេក (ដែលជាកន្លែងកប់ខ្មោច) មិនដឹងជនរងគ្រោះបាត់បង់ជីវិតតាំងពីពេលណានោះទេ ។
តាមប្រភពដដែលបានបន្តថា បន្ទាប់ពីឃើញហេតុការណ៍បែបនេះ គាត់ក៏បានអោយប្អូនឈ្មោះ ម៉េង ជិះម៉ូតូទៅប្រាប់អ្នកភូមិ និងក្រុមគ្រួសារជនរងគ្រោះអោយបានដឹង ។ នៅពេលឮដំណឹងនេះ ក្រុមគ្រួសារជនរងគ្រោះក៏ឆោឡោឡើង ហើយអ្នកភូមិក៏មកជួយមើលនិងជួយសង្គ្រោះដែរ ប៉ុន្តែជនរងគ្រោះបានបាត់ជីវិតទៅហើយ ។
តាមប្រភពពីកូនបង្កើតរបស់ជនរងគ្រោះឈ្មោះ លន់ ចេន ភេទស្រី អាយុ៣៨ឆ្នាំ បានប្រាប់ឱ្យដឹងថា កន្លងមក ឪពុករបស់គាត់មានជម្ងឺប្រចាំកាយជាយូរមកហើយ គឺជំងឺទឹកនោមផ្អែមផង និងជំងឺលើសឈាមផង ហើយគាត់បានព្យាយាមបញ្ចប់ជីវិតចំនួន៣ដងរួចមកហើយ តែត្រូវបានសាច់ញាតិនិងកូនចៅជួយទាន់ ហើយឪពុករបស់គាត់ចេះតែនិយាយថា «ពុកប្រហែលជារស់មិនបានយូទេមើលទៅ» ។
តាមប្រភពដដែលបានបន្តថា លុះនៅវេលាទៀបភ្លឺថ្ងៃទី៦ ខែមីនា ឆ្នាំ២០២១ ពេលគាត់ភ្ញាក់ដឹងខ្លួនមិនឃើញឪពុកដេកនៅលើផ្ទះនោះទេ ហើយគាត់ក៏បានចុះពីលើផ្ទះដើររកមើលឪពុកដែរ តែរកមិនឃើញ និងនឹកស្មានតែឪពុកទៅផ្ទះបងប្អូន ទាល់តែមានគេមកប្រាប់ថា បានឃើញឪពុកបញ្ចប់ជីវិត ទើបបានដឹង ។
ពេលទទួលបានព័ត៌មានខាងលើនេះភ្លាម សមត្ថកិច្ចជំនាញបានសហការ ជាមួយប៉ុស្តិ៍នគរបាលរដ្ឋបាល ក្រុមប្រឹក្សាឃុំ មេភូមិ និងក្រុមគ្រួសារស.ព ដើម្បីចូលរួមពិនិត្យទីកន្លែងកើតហេតុ និងសព រកឃើញនៅលើ.កមានស្នាមទ្រុតទំហំ១សង្ទីម៉ែត្តព័ទ្ធកបញ្ឆិតទៅក្រោយ ក្រៅពីនេះពុំមានស្លាកស្នាមអ្វីគួរឱ្យកត់សម្គាល់ឡើយ ដោយសមត្ថកិច្ចធ្វើការសន្និដ្ឋានថា ជនរងគ្រោះបានបញ្ចប់ជីវិតដោយខ្លួនឯង ហើយមូលហេតុ មកពីមានជំងឺប្រចាំកាយ ។
ក្រោយពីពិនិត្យចប់ សមត្ថកិច្ចបានធ្វើកំណត់ហេតុប្រគល់ស.ពជូនទៅក្រុមគ្រួសារ យកទៅធ្វើបុណ្យតាមប្រពៃណី ៕
ចែករំលែកព័តមាននេះ