ខេត្តបាត់ដំបង ៖ រដ្ឋបាលស្រុកសំពៅលូន សូមធ្វើការបដិសេធទាំងស្រុងចំពោះព័ត៌មានដែលផ្សព្វផ្សាយថា ប្រជាពលរដ្ឋដែលកំពុងធ្វើចត្តាឡីស័កនៅមណ្ឌលក្នុងស្រុកសំពៅលូន ខេត្តបាត់ដំបង មានបញ្ហាសុខភាព ហើយថ្នាក់ដឹកនាំក្រុមគ្រូពេទ្យ អាជ្ញាធរមាន សមត្ថកិច្ចមិនយកចិត្តទុកដាក់…
ខេត្តបាត់ដំបង ៖ រដ្ឋបាលស្រុកសំពៅលូន សូមធ្វើការបដិសេធទាំងស្រុងចំពោះព័ត៌មានដែលផ្សព្វផ្សាយថា ប្រជាពលរដ្ឋដែលកំពុងធ្វើចត្តាឡីស័កនៅមណ្ឌលក្នុងស្រុកសំពៅលូន ខេត្តបាត់ដំបង មានបញ្ហាសុខភាព ហើយថ្នាក់ដឹកនាំក្រុមគ្រូពេទ្យ អាជ្ញាធរមាន សមត្ថកិច្ចមិនយកចិត្តទុកដាក់ ។
នេះបើយោងតាមលិខិតរបស់រដ្ឋបាលខេត្តស្រុកសំពៅលូន ចេញផ្សាយថ្ងៃទី៦ ខែមីនានេះ ដោយរដ្ឋបាលស្រុកសំពៅលូនក្រោយពីបានឃើញព័ត៌មានលើបណ្តាញសង្គមគេហទំព័រហ្វេសប៊ុក (Facbook Page ) ឈ្មោះ អ៊ឹម ជីវន្ត កាលពីព្រឹកថ្ងៃទី០៦ ខែមីនា ឆ្នាំ២០២១ ដែលបានបង្ហោះមានខ្លឹមសារថា មានបុរសម្នាក់ដែលជាប្រជាពលរដ្ឋខ្មែរ កំពុងធ្វើចត្តាឡីស័ក នៅមណ្ឌលចត្តាឡីស័កសាលាបឋម- អនុវិទ្យាល័យកូនភ្នំ៣២ ស្រុកសំពៅលូន ខេត្តបាត់ដំបង មានបញ្ហាសុខភាព (ដើររអិលដួលខ្លួនឯង ) ដោយសារតែបណ្តាលមកពីគ្រូពេទ្យប្រចាំការទីនោះមិនយកចិត្តទុកដាក់មើលថែ ពិនិត្យ ព្យាបាលពួកគាត់ ។
រដ្ឋបាលស្រុកសំពៅលូន សូមធ្វើការបញ្ជាក់ដល់សាធារណជនទាំងអស់ មេត្តាជ្រាបថា កាលពីព្រឹក ថ្ងៃទី០៦ ខែមីនា ឆ្នាំ២០២១ វេលាម៉ោង០៨និង៣០នាទី នៅមណ្ឌលចត្តាឡីស័ក សាលាបឋម-អនុវិទ្យាល័យកូន ភ្នំ៣២ ស្រុកសំពៅលូន ខេត្តបាត់ដំបង មានបុរសម្នាក់ដែលជាប្រជាពលរដ្ឋខ្មែរកំពុងធ្វើចត្តាឡីស័កដែលមានឈ្មោះ សើយ ស៊ុម ភេទប្រុស អាយុ៤១ឆ្នាំ មានទីលំនៅភូមិសុភី សង្កាត់សុភី ក្រុងសិរីសោភ័ណ ខេត្តបន្ទាយមានជ័យ បានដើរដួលដោយខ្លួនឯង បណ្តាលឱ្យមានរបួសក្បាលពិតប្រាកដមែន ។
ក្រោយពេលដួលភ្លាមៗនោះ ក្រុមគ្រូពេទ្យប្រចាំការបានស្លៀកពាក់សំលៀកបំពាក់ PPE សម្ភារៈ ការពារខ្លួន ដើម្បីចូលទៅពិនិត្យស្ថានភាពរបួសរបស់គាត់ និងបានបញ្ចូនគាត់ទៅមន្ទីរពេទ្យបង្អែកសំពៅលូន ដើម្បីជួយព្យាលគាត់ឱ្យទាន់ពេលវេលា ។
បន្ទាប់ពីការពិនិត្យរបស់លោកគ្រូពេទ្យនៃមន្ទីរពេទ្យបង្អែកសំពៅលូន បើអ្នកជំងឺរួចមក លោកគ្រូ ពេទ្យបានបញ្ជាក់ថា ស្ថានភាពអ្នកជំងឺពុំមានអ្វីធ្ងន់ធ្ងរទេ ។ បច្ចុប្បន្នអ្នកជំងឺត្រូវបានចេញពីមន្ទីរពេទ្យ ស្របពេលដែលលទ្ធផលសំណាករបស់គាត់បានមកដល់ ដែលគាត់អាចវិលត្រឡប់ទៅកាន់គេហដ្ឋានរបស់គាត់វិញបាន ។
ដូចនេះចំពោះព័ត៌មានដែលផ្សព្វផ្សាយថា ប្រជាពលរដ្ឋដែលកំពុងធ្វើចត្តាឡីស័កនៅមណ្ឌលចត្តាឡីស័ក ក្នុងស្រុកសំពៅលូន ខេត្តបាត់ដំបង មានបញ្ហាសុខភាព ហើយថ្នាក់ដឹកនាំក្រុមគ្រូពេទ្យ អាជ្ញាធរមាន សមត្ថកិច្ចមិនយកចិត្តទុកដាក់នោះមិនមែនជាការពិតទេ ។ រដ្ឋបាលស្រុកសំពៅលូន សូមធ្វើការបដិសេធទាំងស្រុង ។
សេចក្តីដូចបានជម្រាបជូនខាងលើ សូមសាធារណជនទាំងអស់ ពិសេសសាធារណជនដែលនិយម ប្រើប្រាស់បណ្តាញសង្គម ហ្វេសប៊ុក (Facebook) មេត្តាជ្រាបជាព័ត៌មាន សូមអរគុណ៕
ចែករំលែកព័តមាននេះ