ភ្នំពេញ៖ យុវជនពីរនាក់ ត្រូវបានសមត្ថកិច្ចប៉ុស្តិ៍នគរបាលរដ្ឋបាលអូរបែកក្អម នាំយកទៅសាកសួរ បន្ទាប់ពីជិះម៉ូតូមួយគ្រឿង បោះពួយយ៉ាងលឿន ឡើងស្ពានអាកាសស្ទឹងមានជ័យ បញ្ច្រាសទិសដៅចរាចរណ៍ ទៅបុកម៉ូតូមួយគ្រឿងទៀត ស្រាប់តែមានបុរសម្នាក់ទៀតបានជិះដេញតាមពីក្រោយ និងបានចោទប្រកាន់ថា យុវជនទាំងពីរនោះ ថាជាបក្ខពួករបស់ជនសង្ស័យពីរនាក់ផ្សេងទៀត ដែលបានឆក់ទូរស័ព្ទដៃរបស់គាត់ បានសម្រេច ហើយជិះគេចខ្លួនបាត់ស្រមោល។
ហេតុការណ៍នោះ បានកើតឡើង កាលពីវេលាម៉ោង ១១យប់ ថ្ងៃទី៤ ខែមីនា ឆ្នាំ២០២១ត្រង់ចំណុចខាងលើ ស្ពានអាកាសស្ទឹងមានជ័យ ក្នុងសង្កាត់ស្ទឹងមានជ័យទី១ ខណ្ឌមានជ័យ។
យុវជន ដែលសង្ស័យជាបក្ខពួកចោរ ទី១ មានឈ្មោះ ស៊ុន ណាក់ ភេទប្រុស អាយុ ១៨ឆ្នាំ មុខរបរ និងស្នាក់នៅ មិនពិតប្រាកដ។ ទី២ មានឈ្មោះ ម៉ុច ម៉ាក់ ភេទប្រុស អាយុ ២៣ឆ្នាំ មុខរបរ និងស្នាក់នៅ មិនពិតប្រាកដ។
ប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញយុវជនពីរនាក់ ជិះម៉ូតូមួយគ្រឿងម៉ាក ហុងដាប៊ីត ពណ៌ស គ្មានស្លាកលេខ ដោយធ្វើដំណើរតាមបណ្ដោយផ្លូវ២៧១ ក្នុងល្បឿនយ៉ាងលឿន ទិសដៅពីវិទ្យាល័យជាស៊ីមសាមគ្គី ឆ្ពោះទៅស្ពានអាកាសស្ទឹងមានជ័យ។ យុវជនទាំងពីរនាក់នោះ ក៏បានជិះបញ្ច្រាសទិសដៅចរាចរណ៍ឡើងទៅលើស្ពានអាកាសស្ទឹងមានជ័យ ទាំងសភាពភ័យស្លន់ស្លោ។ លុះដល់ចំណុចកើតហេតុ ក៏បានជ្រុលទៅបុកម៉ូតូមួយគ្រឿងទៀត មិនចាំម៉ាក ដែលធ្វើដំណើរចុះពីលើស្ពានស្របទិសដៅចរាចរណ៍ បណ្ដាលឲ្យយុវជនទាំងពីរនាក់ រងរបួសស្រាល។ ចំណែកម៉ូតូបានរងការខូចខាតយ៉ាងដំណំ។
ភ្លាមៗនោះ ក៏ស្រាប់តែមានបុរសម្នាក់ទៀត ជិះម៉ូតូមួយគ្រឿងម៉ាក ហុងដាស្កុបពី ពណ៌ក្រហម ពាក់ស្លាកលេខ ភ្នំពេញ1GE-0579 បានស្រែកចោរៗ ជិះដេញតាមពីក្រោយយុវជនទាំងពីរនាក់នោះ និងបានចោទប្រកាន់ទៅលើយុវជនទាំងពីរនាក់ ថាជាបក្ខពួករបស់ជនសង្ស័យចំនួនពីរនាក់ផ្សេងទៀត ដែលធ្វើសកម្មភាពឆក់ទូរស័ព្ទដៃរបស់គាត់ បានសម្រេច ហើយជិះគេចខ្លួនបាត់ស្រមោលថែមទៀតផង។
ហេតុការណ៍នោះ បានបង្កឲ្យមានការភ្ញាក់ផ្អើលដល់សមត្ថកិច្ចមូលដ្ឋានប៉ុស្តិ៍នគរបាលរដ្ឋបាលស្ទឹងមានជ័យទី១ ក៏បានចុះមកធ្វើអន្តរាគមន៍ភ្លាមៗតែម្ដង។
បុរសឈ្មោះ រ័ត្ន អាយុ ៣៨ឆ្នាំ មុខរបរលក់ដូរ ស្នាក់នៅសង្កាត់បឹងទំពុនទី១ ខណ្ឌមានជ័យ ដែលបានអះអាងថា ខ្លួនជាជនរងគ្រោះ បានរៀបរាប់ប្រាប់ឲ្យដឹងថា នៅមុនពេលកើតហេតុ គាត់បានជិះម៉ូតូតែម្នាក់ឯង តាមបណ្ដោយផ្លូវ២០០៤ ទិសដៅពីលិចទៅកើត បំណងជិះត្រឡប់ទៅផ្ទះ នៅក្បែរវត្តសន្សំកុសល។ លុះពេលដែលជិះដល់ចំណុចក្បែរផ្សារទំនើបមីតថោន ស្ថិតក្នុងសង្កាត់អូរបែកក្អម ខណ្ឌសែនសុខ។ ស្រាប់តែប្រពន្ធរបស់គាត់ បានទូរស័ព្ទមក ហើយគាត់ ក៏បានលើកទូរស័ព្ទដៃមួយគ្រឿងម៉ាក samsung note 9 មកនិយាយ។ បន្ទាប់ពីនិយាយចប់ គាត់ក៏បំរុងដាក់ទូរស័ព្ទដៃចូលក្នុងហោប៉ៅវិញ ស្របពេលនោះដែរ ក៏ស្រាប់តែមានជនសង្ស័យចំនួនពីរនាក់ បានជិះម៉ូតូមួយគ្រឿង មិនចាំម៉ាក ដែលជាបក្ខពួករបស់យុវជនទាំងពីរនាក់ខាងលើ បានជិះតាមមកពីក្រោយ និងបានធ្វើសកម្មភាពឆក់ទូរស័ព្ទដៃរបស់គាត់ បានសម្រេច។
ភ្លាមៗនោះជនសង្ស័យក៏ព្យាយាមបន្ថែមល្បឿនជិះរត់គេចខ្លួន រួមជាមួយយុវជនទាំងពីរនាក់ ដែលជិះម៉ូតូតាមបិទគូទពីក្រោយផងដែរ។ គាត់ក៏បានជិះដេញតាមពីក្រោយ និងស្រែកចោរៗ រហូតដល់ចំណុចកើតហេតុតែម្តង។ ដោយឡែក ជនសង្ស័យ ដែលជាបក្ខពួកបានយកទូរស័ព្ទដៃរបស់គាត់ជិះគេចខ្លួនបាត់ស្រមោល ដោយសុវត្ថិភាព។
ចំណេកយុវជនទាំងពីរ បានឆ្លើយបដិសេធថា ពួកគេមិនមែនជាបក្ខពួករបស់ជនសង្ស័យ ដែលធ្វើសកម្មភាពឆក់ទូរស័ព្ទដៃបុរសរងគ្រោះខាងលើនោះទេ។ គឺនៅមុនពេលកើតហេតុ ពួកគេទាំងពីរ បានជិះម៉ូតូចេញពីផឹក នៅម្តុំទួលពង្រ ពេលដែលជិះបានបន្តិច ក៏ស្រាប់តែមានក្មេងស្ទាវមួយក្រុមជិះម៉ូតូ ៣ ទៅ ៤គ្រឿង មិនចាំម៉ាក បានជិះដេញវាយមកលើពួកគេ។ ពេលនោះ ពួកគេក៏ព្យាយាមជិះរត់គេច ពីក្រុមក្មេងស្ទាវទាំងនោះ រហូតមកដល់ចំណុចកើតហេតុ ដោយភ័យស្លន់ស្លោខ្លាំងពេក ពួកគេក៏ជិះបញ្ច្រាសទិសដៅចរាចរណ៍ឡើងស្ពានបណ្ដាលឲ្យជ្រុលទៅបុកម៉ូតូមួយគ្រឿងទៀតតែម្តង។
ក្រោយពេលកើតហេតុ សមត្ថកិច្ចមូលដ្ឋាន ក៏បានប្រគល់យុវជនទាំងពីរនាក់ និងបុរសជាជនរងគ្រោះ រួមទាំងវត្ថុតាំង ទៅឲ្យសមត្ថកិច្ចប៉ុស្តិ៍នគរបាលរដ្ឋបាលអូរបែកក្អម នាំយកទៅធ្វើការសាកសួរ និងដាក់ពាក្យបណ្ដឹង ចាត់ការទៅតាមនីតិវិធី៕ ដោយ៖ យឹម ឈឿន
ចែករំលែកព័តមាននេះ