ខេត្តរតនគិរី ៖ អ្នកយកព័ត៌មានមួយក្រុមនៅក្នុងខេត្តរតនគិរី បានប្រមូលគ្នាផ្តិតមេដៃដើម្បីធ្វើបណ្តឹងមួយដាក់ទៅប្រធានក្រុមប្រឹក្សាអ្នកសារព័ត៌មានកម្ពុជា និងក្លិបអ្នកកាសែតកម្ពុជា បន្ទាប់ពីអ្នកសារព័ត៌មានមួយចំនួនទទួលសារអេឡិចត្រូនិកពីលោកអភិបាលខេត្តរតនគិរី
ខេត្តរតនគិរី ៖ អ្នកយកព័ត៌មានមួយក្រុមនៅក្នុងខេត្តរតនគិរី បានប្រមូលគ្នាផ្តិតមេដៃដើម្បីធ្វើបណ្តឹងមួយដាក់ទៅប្រធានក្រុមប្រឹក្សាអ្នកសារព័ត៌មានកម្ពុជា និងក្លិបអ្នកកាសែតកម្ពុជា បន្ទាប់ពីអ្នកសារព័ត៌មានមួយចំនួនទទួលសារអេឡិចត្រូនិកពីលោកអភិបាលខេត្តរតនគិរី ពីបទគំរាមកំហែងអាយុជីវិតក្រុមគ្រួសារអ្នកកាសែត និងសេរីភាពអ្នកសារព័ត៌មាន ។
អ្នកយកព័ត៌មានឱ្យទូរទស្សន៍បាយ័នប្រចាំខេត្តរតនគិរី លោក សុខ គឹមសន កាលពីយប់ថ្ងៃទី២៤ សីហា កន្លងទៅនេះ ត្រូវអភិបាលខេត្តរតនគិរី លោក ថង សាវុន ផ្ញើសារតាមប្រព័ន្ធ Line ។ នៅក្នុងសារនោះលោកបានសរសេរពីសកម្មភាពរបស់អ្នកកាសែត ដែលធ្វើហួសដែនសមត្ថកិច្ចរបស់ខ្លួនដូចជា ប្រមូលផ្តុំគ្នានៅតាមដងផ្លូវ ដេញប្រមាញ់ម៉ូតូដឹកឈើ និងរថយន្តដឹកឈើ ហើយមួយចំនួនទៀត អង្គុយនៅតាមហាងកាហ្វេដើម្បីប្រមាញ់អ្នកប្រព្រឹត្តល្មើស ដែលអាចផ្តល់ផលប្រយោជន៍ដល់ខ្លួនជាដើម ។
សារលោកអភិបាលខេត្តបន្តថា បើតាំងចិត្តជាអ្នកយកព័ត៌មាន ត្រូវធ្វើឱ្យគ្រប់ជ្រុងជ្រោយ ឈរលើការទទួលខុសត្រូវក្នុងការបញ្ចេញព័ត៌មាន ដែលការផ្សាយព័ត៌មានមិនពិតធ្វើឱ្យប៉ះពាល់ដល់កិត្តិយស និងវាសនាអ្នកដទៃ ដែលទាំងនេះ ធ្វើឱ្យអ្នកសារព័ត៌មានឃ្លាតឆ្ងាយពីសង្គម ហើយអ្នកដែលទទួលរងផលប៉ះពាល់ គឺប្រពន្ធ និងកូនៗរបស់ខ្លួន ។ លោកមិនអនុញ្ញាតឱ្យក្រុមអ្នកកាសែតធ្វើអំពើខុសច្បាប់សម្រាប់ក្រពះ យកស្លាកអ្នកកាសែតធ្វើអ៊ីចឹងតទៅទៀតទេ ។
ក្រោយពីបានឃើញសារតាម Line របស់លោកអភិបាលខេត្តដូចបានរៀបរាប់ខាងលើ ទើបនៅព្រឹកថ្ងៃទី២៧ សីហា ក្រុមអ្នកកាសែតមួយចំនួនបានផ្តិតមេដៃធ្វើបណ្តឹងដាក់ចូលទៅប្រធានក្រុមប្រឹក្សាអ្នកសារព័ត៌មានកម្ពុជា និងក្លិបអ្នកកាសែតកម្ពុជា ដើម្បីឱ្យជួយអន្តរាគមន៍ក្នុងករណីនេះ ។
មានការកត់សម្គាល់ថា មុននឹងលោកអភិបាលខេត្តចេញសារព្រមានបែបនេះ គឺបន្ទាប់ពីមានអ្នកកាសែតមួយក្រុមអះអាងថា ខ្លួនមកពីភ្នំពេញ បានបើករថយន្តតាមប្រមាញ់រថយន្តដឹកឈើ២គ្រឿងកាលពីរសៀលថ្ងៃទី២២ សីហា ហើយក៏ត្រូវបានបង្ក្រាបទៅលើរថយន្តបទល្មើសនោះភ្លាមៗដែរ នៅរោងសិប្បកម្មកែច្នៃឈើប្រណីតមួយកន្លែង ស្ថិតក្នុងភូមិជ្រី សង្កាត់យក្សឡោម ក្រុងបានលុង ។
ជារឿយៗ គេតែងឃើញក្រុមអ្នកកាសែតទៅពីភ្នំពេញ មិនដឹងថានៅអង្គភាពសារព័ត៌មានណានោះទេ តែងជិះរថយន្តស៊េរីទំនើបៗជាច្រើនគ្រឿងដេញប្រមាញ់រថយន្តបទល្មើស ឬទូរស័ព្ទទៅថ្នាក់ដឹកនាំនៅរាជធានីភ្នំពេញ ឱ្យជួយអន្តរាគមន៍ចាប់រថយន្តដឹកបទល្មើសទាំងនោះ ។ ចំណែកអ្នកកាសែតនៅខេត្តរតនគិរីវិញ មិនដែលបានធ្វើសកម្មភាពដេញប្រមាញ់ម៉ូតូ ឬរថយន្តដឹកឈើដូចការចោទប្រកាន់ក្នុងសាររបស់លោកអភិបាលខេត្តនោះទេ ។
ទោះជាមានការអង្គុយជុំគ្នាតាមហាងកាហ្វេ ក៏មិនមែនជាការដាក់កុងត្រូលជជុះ ឬមានក្រុមអ្នករកស៊ីបទល្មើសណាមួយមកបង់លុយឱ្យដែរ គ្រាន់តែអ្នកកាសែតមួយចំនួនអង្គុយចំច្រក ដែលក្រុមឈ្មួញតែងដឹកជញ្ជូនឈើប្រណីតតាមម៉ូតូ និងរថយន្តមកពីស្រុកអូរជុំ វើនសៃ និងស្រុកតាវែង ដែលនាំឱ្យមានការរាំងស្ទះដល់សកម្មភាពរបស់ឈ្មួញមួយចំនួន ហើយនាំឱ្យលោកអភិបាលខេត្តមានការយល់ច្រឡំ និងមានការមិនពេញចិត្ត ។ ម្យ៉ាងទៀត ដោយសារក្រុមសមត្ថកិច្ច និងថ្នាក់ដឹកនាំមួយចំនួនរកស៊ីឈើ ហើយគិតថា ក្រុមអ្នកកាសែតជាបន្លានៅក្នុងកែវភ្នែករបស់ពួកគេ ។
ចំពោះមន្ត្រីសមត្ថកិច្ចគ្រប់មួយចំនួន តែងធ្វើសកម្មភាពស្ទាក់ជំរិតទារលុយពីឈ្មួញទាំងយប់ទាំងថ្ងៃ ហើយក៏ខុសពីតួនាទីរបស់ខ្លួនដែរ។ សួរថា តើការឈឺឆ្អាលពីការបាត់បង់ធនធានធម្មជាតិ រលាយព្រៃឈើស្ទើរអស់ពីក្នុងព្រៃទៅហើយនោះ ជាកំហុសអ្នកកាសែតដែលផ្សព្វផ្សាយ ឬបែបណា ។ ក្រុមអ្នកកាសែតដែលមានវិជ្ជាជីវៈមិនបានគិតពីផលប្រយោជន៍របស់ខ្លួនទេ តែបានធ្វើជាអ្នកផ្ញើសារដ៏មានប្រសិទ្ធភាពសម្រាប់អ្នកដឹកនាំ ក្នុងការឆ្លើយតបទៅនឹងអំពើអសកម្មរបស់ក្រុមមន្ត្រីខិលខូចតែប៉ុណ្ណោះ ៕
ចែករំលែកព័តមាននេះ