យោងតាមគេហទំព័របរទេសចេញផ្សាយកាលពីពេល ថ្មីៗកន្លងមកថា រមាសស៊ូម៉ាត្រាត្រូវគេប្រកាសថាផុតពូជហើយក្នុងព្រៃប្រទេសម៉ាឡេស៊ី ។ សត្វប្រភេទនេះសល់តែចំនួន៩ក្បាលប៉ុណ្ណោះ ក្នុងការមើលថែទាំក្នុងប្រទេស និងតិចជាង១០០ក្បាលផ្សេងទៀតមាននៅប្រទេសជិតខាង គឺឥណ្ឌូណេស៊ី ។
អ្នកជំនាញ និងអ្នកវិទ្យាសាស្ត្រ ឈានមុខគេដែលបានដឹកនាំការអភិរក្សសត្វរមាសនិយាយថា «យើងពិតជាសោកស្តាយណាស់ពេលដឹងថាពូជរមាសស៊ូម៉ាត្រាបានផុតពូជពីក្នុងព្រៃម៉ាឡេស៊ី ហើយយើងសង្ឃឹមថាពូជរមាសដែលនៅសេសសល់ក្នុងប្រទេសជិតខាងឥណ្ឌូណេស៊ីនឹងបានការយកចិត្តទុកដាក់យ៉ាងម៉ត់ចត់» ។
ទោះបីជាមានការខិតខំប្រឹងប្រែងយ៉ាងខ្លាំងក៏ដោយក៏នៅតែមិនមានរមាសសូ៊ម៉ាត្រារស់នៅក្នុងព្រៃប្រទេសម៉ាឡេស៊ីទេ តាំងពីឆ្នាំ២០០៧មកម៉្លេះ ។ រមាសស៊ូម៉ាត្រា ឬរមាសអាស៊ីស្នែង២ គឺជាពូជរមាសដ៏កម្រ ។
រមាសស៊ូម៉ាត្រាគឺជារមាសមាឌតូចជាងគេក្នុងចំណោមពូជរមាសដទៃផ្សេងទៀត ។ វាមានកម្ពស់ចាប់ពី១១២សង្ទីម៉ែត្រទៅ១៤៥សង្ទីម៉ែត្រ ។ ក្បាល និងដងខ្លួនរបស់វាមានប្រវែងបណ្តោយចាប់ពី២,៣៦ម៉ែត្រ ទៅ៣,១៨ម៉ែត្រ ចំណែកកន្ទុយរបស់វាមានប្រវែងចាប់ពី៣៥សង្ទីម៉ែត្រទៅ៧០សង្ទីម៉ែត្រ ។ រីឯទម្ងន់សរុបរបស់វាគឺពី៥០០គីឡូក្រាម ទៅ១.០០០គីឡូក្រាម ។
រមាសស៊ូម៉ាត្រា ស្រដៀងទៅនឹងពូជរមាសអាហ្វ្រិកដែរ ពោលគឺវាមានស្នែងចំនួន២។ ស្នែងធំជាងគេគឺស្នែងស្ថិតត្រង់ចម្រុះមានប្រវែងពី១៥សង្ទីម៉ែត្រទៅ ២៥សង្ទីម៉ែត្រ ។ រមាសស៊ូម៉ាត្រាស៊ីស្លឹកនិងផ្លែឈើ ក្នុង១ថ្ងៃចំនួន៥០គីឡូក្រាម ៕
ចែករំលែកព័តមាននេះ