រាជធានីភ្នំពេញ ៖ បុរសម្នាក់ចេញពីក្លឹបស្រវឹងស្រាជោកជាំជិះម៉ូតូយ៉ាងលឿនទៅបុកខឿនចិញ្ចើមផ្លូវផ្លោងទៅបុកនឹងបង្គោលភ្លើងបំភ្លឺផ្លូវបណ្តាលឲ្យរងរបួសធ្ងន់។ ហេតុការណ៍នេះបានកើតឡើងកាលពីវេលាម៉ោង ៤ និង២០នាទីទៀបភ្លឺ ថ្ងៃទី២៨ សីហា ស្ថិតតាមបណ្ដោយផ្លូវលេខ១០១៩ កែងសហព័ន្ធរុស្ស៊ី ត្រង់ចំណុចផ្សារដីហុយ សង្កាត់ទឹកថ្លា ខណ្ឌសែនសុខ ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុជនរងគ្រោះជិះម៉ូតូ plusa ស៊េរីឆ្នាំ២០១៥ ពណ៌លឿង ពាក់ស្លាកលេខ ភ្នំពេញ 1FE 6398 បើកបរដោយបុរសម្នាក់វ័យ៣០ឆ្នាំ ក្នុងទិសដៅពីត្បូងទៅជើងក្នុងស្ថានភាពស្រវឹងជោកជាំ ហើយជិះលឿនទើបតែចេញមកពីក្លឹបកំសាន្តមួយកន្លែងនៅផ្លូវ1986 ។
មុននឹងមកដល់កន្លែងកើតហេតុបានជិះដួល២ដងរួចមកហើយ តែរងរបួសស្រាលបានលើកម៉ូតូជិះមកទៀតទាំងបញ្ច្រាសទិសតាមផ្លូវ1019ទិសដៅពីត្បូងទៅជើងក្នុងល្បឿនលឿន ហើយបានរេចង្កូតទៅបុកខឿនចិញ្ចើមផ្លូវធ្វើឲ្យអ្នកបើកម៉ូតូផ្លោងទៅបុកនឹងបង្គោលភ្លើងបំភ្លឺផ្លូវរំលងសួនច្បារពុះចែកទ្រូងផ្លូវបណ្ដាលឱ្យជនរងគ្រោះហោះទៅទើលើសួនច្បារ រីឯម៉ូតូហោះទៅម្ខាងនៃសួនច្បារធ្វើឲ្យជនរងគ្រោះរងរបួសធ្ងន់ធ្ងរសន្លប់ស្តូកស្តឹង ។
ក្រោយពេលកើតហេតុជនរងគ្រោះត្រូវបានប្រជាពលរដ្ឋនៅជិតនោះទូរស័ព្ទហៅរថយន្តសង្គ្រោះគ្លីនិកឯកដឹកទៅកាន់មន្ទីរពេទ្យកាល់ម៉ែត រីឯម៉ូតូត្រូវបានយកទៅរក្សាទុកនៅប៉ុស្ដិ៍នគរបាលសង្កាត់ទឹកថ្លាដើម្បីរង់ចាំជនរងគ្រោះមកទទួលយកទៅវិញ ៕
ចែករំលែកព័តមាននេះ