ខេត្តកំពង់ចាម ៖ ក្រុមចោរប្លន់៣នាក់ប្រដាប់ដោយអាវុធខ្លី បានធ្វើសកម្មភាពតាមភ្ជង់ប្លន់ស្ត្រីអាជីវករលក់មាស-ប្តូរប្រាក់ម្នាក់ឈ្មោះអ៊ាង ម៉ុកម៉ាយ អាយុ៣៤ឆ្នាំ រស់នៅភូមិស្គន់ ឃុំសូទិព្វ ស្រុកជើងព្រៃ កាលពីវេលាម៉ោងប្រហែលជា៥ល្ងាចថ្ងៃទី១៤ មីនា ២០១១ ខណៈជិះម៉ូតូម៉ាក C125 ពណ៌ខ្មៅ ស៊េរី២០០៨ ចេញពីផ្សារស្គន់ត្រឡប់មកផ្ទះវិញ គឺប្លន់ស្បោងមាស និងប្លាទីនជាង១០តម្លឹង និងលុយខ្មែរ៥៨លានរៀល ព្រមទាំងលុយដុល្លារចំនួន១៥០ដុល្លារ សរុបជាង២ម៉ឺនដុល្លារ ហើយបាននាំគ្នាជិះម៉ូតូរត់គេចបាត់ដោយសុវត្ថិភាព។
ប្រភពពីសាក្សីបានប្រាប់កោះសន្តិភាពឱ្យដឹងថា ស្ត្រីអាជីវករលក់មាសនៅផ្សារស្គន់រូបនេះបានជិះម៉ូតូចេញមកពីផ្សារស្គន់ ត្រឡប់មកផ្ទះជាមួយនឹងកូនប្រុសម្នាក់អាយុ៨ឆ្នាំ ស្របពេលមកដល់មុខផ្ទះត្រូវបានក្រុមចោរមានគ្នា៣នាក់ មិនមានពាក់ម៉ាស់មុខនោះទេ បាននាំគ្នាមកចាប់ប្រតាយប្រតប់ដណ្តើមយកស្បោងដាក់គ្រឿងអលង្ការ ។ សាក្សីបានប្រាប់បន្តថា ក្នុងពេលប្រតាយប្រតប់នោះម៉ូតូរកកល់នឹងដួលសង្កត់ទៅលើកូនប្រុសតូច មានអ្នកជិតខាង២-៣នាក់បាននាំគ្នាស្ទុះចូលទៅជួយលើក តែមិនទាន់បានលើកផង ស្រាប់តែមានបុរស ម្នាក់ជាចោរប្លន់បានលើកកាំភ្លើងខ្លីភ្ជង់ធ្វើឱ្យភ័យគ្រប់គ្នា និងរត់ថយក្រោយវិញ ព្រោះខ្លាចគ្រោះថ្នាក់ដល់អាយុជីវិត។ បន្តិចក្រោយមក ក្រុមចោរប្លន់បានយកម៉ូតូរបស់ស្រ្តីអាជីវករលក់មាសនោះជិះចេញទៅទិសខាងលិចយ៉ាងប្រញាប់ប្រញាល់បន្សល់ទុកស្រ្តីឈ្មោះម៉ាយ បានស្រែកយំ និងបង្កឱ្យមានការភ្ញាក់ផ្អើលដល់អ្នកជិតខាងមកចោមរោមមើលឡើងកកកុញពេញមុខផ្ទះ ។
តាមលោកអនុសេនីយ៍ឯកយ៉ែម សុផល អធិការរងនគរបាលស្រុកជើងព្រៃបានប្រាប់ថា ចំពោះសម្បត្តិដែលត្រូវចោរយកទៅនោះរួមមានមាសនិងប្លាទីនសរុបជាង១០តម្លឹង លុយខ្មែរ៥៨លានរៀល ប្រាក់ដុល្លារ១៥០ (សរុបជាង២ម៉ឺនដុល្លារ) និងម៉ូតូរបស់ស្រ្តីរងគ្រោះជិះគេចចេញទៅទិសខាងលិច ភ្លាមៗនោះកំលាំងនគរបាល និងកងរាជអាវុធហត្ថស្រុកជើងព្រៃបានចេញអន្តរាគមន៍ដេញតាមពីខាងក្រោយ យ៉ាងប្រកៀកប្រកិតដល់ម្តុំចំការស្វាយចន្ទី
មួយកន្លែងស្ថិតនៅភូមិ ប៉ាណា ឃុំសូទិព្វ មានចំងាយពីផ្ទះកើតហេតុប្រហែល៥គីឡូម៉ែត្រ ក្រុមចោរបានទុកម៉ូតូចោលហើយនាំគ្នារត់ចូលទៅក្នុងព្រៃបាត់ ៕
ចែករំលែកព័តមាននេះ