ខេត្តកំពង់ចាម ៖ បុរសកើតរោគសរសៃប្រសាទម្នាក់ឈ្មោះវ៉ែន ធឿន អាយុ៤០ឆ្នាំ រស់នៅភូមិមួង ឃុំមង់រៀវ ស្រុកត្បូងឃ្មុំ ត្រូវបានបងថ្លៃប្រុសវាយសំពងត្រូវក្បាលនិងខ្លួនប្រាណចំនួន៣ឈើជ្រុងកាលពីវេលាម៉ោង៥និង៣០នាទីព្រឹកថ្ងៃទី១៣ មីនា ២០១១ បណ្តាលឱ្យរយះហូរឈាមស្រោចពេញខ្លួនសន្លប់នៅនឹងកន្លែង ហើយត្រូវបានម្តាយនាំមកសង្គ្រោះនៅមន្ទីរពេទ្យខេត្តជាបន្ទាន់ ។ ចំណែកបុរសជាបងថ្លៃឈ្មោះញឹក ផន អាយុ៤៣ឆ្នាំ ត្រូវបានកម្លាំងប៉ុស្តិ៍រដ្ឋបាលឃុំមង់រៀវ ឃាត់ខ្លួននាំមកកាន់អធិការដ្ឋាននគរបាលស្រុកត្បូងឃ្មុំដើម្បីសួរនាំផងដែរ ។
តាមបុរសរងគ្រោះឈ្មោះវ៉ែន ធឿន បានរៀបរាប់ឱ្យដឹងថា នៅយប់ថ្ងៃទី១២ មីនា បងថ្លៃប្រុសឈ្មោះញឹក ផន ដែលមានផ្ទះនៅក្បែរគ្នាបានផឹកស្រាស្រវឹងហើយជេរម្តាយក្មេកនូវពាក្យអសុរោះជាច្រើន ពេលនោះគាត់បានឃាត់បងថ្លៃកុំឱ្យជេរម្តាយទៀត ប៉ុន្តែបងថ្លៃមិនព្រមស្តាប់នោះទេ ។ លុះដល់វេលាម៉ោងប្រហែលជាង៥ទៀបភ្លឺថ្ងៃទី១៣ មីនា ពេលគាត់(វ៉ែន ធឿន) ដើរចុះមកដល់ខាងក្រោមផ្ទះ ស្រាប់តែបងថ្លៃបានយកឈើជ្រុងប្រវែងប្រហែល១ម៉ែត្រមកវាយក្បាលគាត់ពីខាងក្រោយយ៉ាងពេញទំហឹងនិងវាយលើខ្លួនប្រាណបណ្តាលឱ្យរយះហូរឈាមស្រោចពេញខ្លួនប្រាណដួលដេកទៅលើដី។ ភ្លាមនោះគាត់ត្រូវបានម្តាយនាំយកទៅសង្គ្រោះនៅពេទ្យភូមិតែដោយស្ថានភាពរបួសធ្ងន់ធ្ងរពេកក៏បានបញ្ជូនបន្តទៅសង្គ្រោះនៅមន្ទីរពេទ្យខេត្ត ។
ទាក់ទិននឹងហេតុការណ៍ខាងលើនេះលោកអនុសេនីយ៍ឯកឡុង សារិន អធិការរងនគរបាលស្រុកត្បូងឃ្មុំទទួលផែនយុត្តិធម៌បានប្រាប់ឱ្យដឹងតាមទូរស័ព្ទថា កាលពីល្ងាចថ្ងៃទី១២ មីនា បុរសជាបងថ្លៃឈ្មោះញឹក ផន បានសុំលុយប្រពន្ធ១០.០០០រៀលតែប្រពន្ធមិនឱ្យក៏មានការឈ្លោះប្រកែកគ្នាទៅវិញទៅមក ។ លុះដល់វេលាម៉ោងប្រហែល៥និង៣០នាទីព្រឹកថ្ងៃទី១៣ មីនា បុរសជាបងថ្លៃបានឈ្លោះជាមួយប្រពន្ធទៀត ពេលនោះបុរសរងគ្រោះជាប្អូនថ្លៃបានយកចម្ពាមកៅស៊ូបាញ់មកលើបងថ្លៃត្រូវចំនួន៣ទៅ៤គ្រាប់ ។ បងថ្លៃខឹងយ៉ាងខ្លាំងក៏បានវាយប្អូនថ្លៃវិញចំនួន៣ឈើជ្រុង ត្រូវក្បាលនិងខ្លួនប្រាណបណ្តាលឱ្យបែករយះហូរឈាមស្រោចពេញខ្លួនសន្លប់បាត់ស្មារតី។ បន្ទាប់មកបុរសជាបងថ្លៃត្រូវបានកម្លាំងរដ្ឋបាលប៉ុស្តិ៍ឃុំមង់រៀវចុះចាប់ខ្លួនភ្លាមៗបញ្ជូនមកកាន់អធិការដ្ឋាននគរបាលស្រុកត្បូងឃ្មុំដើម្បីសួរនាំ ។
លោកអនុសេនីយ៍ឯកឡុង សារិន អធិការរងនគរបាលស្រុកត្បូងឃ្មុំបានបញ្ជាក់ថា បុរសបងថ្លៃឈ្មោះញឹម ផននេះ ជាអ្នករកស៊ីចិញ្ចើមក្រុមគ្រួសារទាំងមូលរួមនឹងជនរងគ្រោះឈ្មោះវ៉ែន ធឿន ដែលកើតរោគសរសៃប្រសាទជាយូរឆ្នាំមកហើយនោះផង ។ កន្លងមកបុរសរងគ្រោះរូបនេះត្រូវបានសមត្ថកិច្ចធ្វើការអប់រំនៅឆ្នាំ២០០៩ម្តងនិងឆ្នាំ២០១០ម្តង ដោយសារបង្ករឿងក្នុងគ្រួសារនិងរករឿងគេឯងគ្រប់គ្នា ។ ក្នុងករណីខាងលើនេះបុរសជាបងថ្លៃត្រូវបានកម្លាំងជំនាញកំពុងតែចាត់ការទៅតាមនិតីវិធី ហើយបុរសជាប្អូនថ្លៃមិនបានប្តឹងប្តល់អ្វីនោះទេ ព្រោះបងថ្លៃជាអ្នកចិញ្ចឹមក្រុមគ្រួសារទាំងមូល ហើយស្ថានភាពជីវភាពវិញសុទ្ធតែក្រីក្រទៀត ចុះបើបងថ្លៃត្រូវជាប់គុកតើក្រុមគ្រួសារនឹងទៅជាយ៉ាងណា ?
ចែករំលែកព័តមាននេះ