មេបក្សដែលសង្ឃឹមពីអនាគត បានប្រកាសពីប្រទេសអូស្ត្រាលីថ្មីៗនេះថា ក្នុងនាមមេបក្សសង្គ្រោះជាតិ បានត្រៀមខ្លួនឡើងដឹកនាំប្រទេស នៅឆ្នាំ២០១៨នេះហើយ ។
លោក កឹម សុខា ថ្លែងដោយញញឹមសង្ឃឹមទុក ដោយមានអ្នកគាំទ្រ… ជាជនជាតិខ្មែរច្រើននាក់ញញឹមស្វាគមន៍ ចំពោះអនាគតដ៏ច្បាស់លាស់… អនាគតមិនខកចិត្ត… នូវអនាគត បានធ្វើមេដឹកនាំប្រទេស ។
ប្រសិនអនាគត មើលឃើញនៅនឹងមុខមែន… ឬអនាគត ពិតជាបានដឹកនាំប្រទេសមែន… សូមស្វាគមន៍«អនាគត»… ប៉ុន្តែឮផ្គរលាន់ សូមកុំប្រញាប់ចាក់ទឹកពាងចោល ។
កន្លងមក មេបក្សកាន់អំណាចយូរ… ឬមេបក្សស៊ីដាច់ខាងកាន់អំណាចក្នុងសម័យប្រជាធិបតេយ្យនេះ ធ្លាប់បានដៀមដាមដាក់ថា សម័យនេះមាន «នាយករដ្ឋមន្ត្រីឧទាហរណ៍» ដែលសំដៅទៅលើលោក សម រង្ស៊ី លោក កឹម សុខា ។
ប្រហែលជាមិនខុសមែនពាក្យ«ដៀមដាម»នេះ… ព្រោះពាក្យថា ដឹកនាំប្រទេស… ឬត្រៀមធ្វើនាយករដ្ឋមន្ត្រីនៅឆ្នាំ២០១៨ បានព្រលយចេញគួរឱ្យភ្ញាក់ផ្អើលរួចហើយ ។
អាឡេវអត់ខ្វល់ទាល់តែសោះ… ចង់អ្នកណា ឡើងធ្វើនាយករដ្ឋមន្ត្រី ដឹកនាំប្រទេស ក៏អាឡេវនៅតែអាឡេវដដែល!
សម័យសង្គមរាស្ត្រនិយមនៃរាជាណាចក្រទី១ ក៏មានអាឡេវ… សម័យសាធារណរដ្ឋខ្មែររបស់សេនាប្រមុខ លន់ នល់ ក៏មានអាឡេវ… សម័យរាជាណាចក្រទី២ ក៏មានអាឡេវ… ពិសេសគឺសម័យអ្នកកាន់អំណាចយូរ… តែម្តង ដែលមានអាឡេវនៅយូរដូចគេដែរ… ។ល។
ក្តីស្រមៃឆ្នាំ២០១៨… នៅយូរណាស់… ធ្មេចបើក… ធ្មេចបើកក៏នៅយូរដែរ…
ឧទាហរណ៍ទៅចុះ… ដល់ឆ្នាំ២០១៨ ស្រាប់តែមិនបានដូចបំណង… ខ្មាស់គេដល់កហើយខ្ញុំ… វាគ្រាន់តែជាកូនឧទាហរណ៍មួយទេ… ឯមេៗវិញ… ក្លាយជាអ្នកមានមែនហើយ…
ប៉ុន្តែរកថាមិនត្រូវដែរ… អនាគតដែលបានដៅទុក… ស្រួលមិនស្រួល ក្តីស្រមៃ… ធ្លាក់មកចំកណ្តាលមុខមែននោះ… អាឡេវសូមជួយស្រែកប្រាវ៉ូ !
អាឡេវ
ចែករំលែកព័តមាននេះ