រាជធានីភ្នំពេញ ៖ ក្រុមនារីជាបុគ្គលិកស៊ីឈ្នួលបំរើការងារយកប្រាក់ខែ៤០ដុល្លារក្នុង១នាក់ឱ្យទីតាំងបើកលេងល្បែងស៊ីសងខុសច្បាប់១កន្លែងត្រូវសមត្ថកិច្ចចាប់ខ្លួន៦នាក់ កាលពីល្ងាចថ្ងៃទី២២ មីនា ហើយតុលាការសាលាដំបូងរាជធានីភ្នំពេញបានសំរេចផ្តន្ទាទោសម្នាក់៣ឆ្នាំ តែអនុវត្តក្នុងពន្ធនាគារ១ឆ្នាំ នៅសល់២ឆ្នាំទៀតត្រូវព្យួរ ដែលទោសនេះបានកំណត់តាមមាត្រាទី៥នៃច្បាប់ស្តីពីការបង្ក្រាបល្បែងស៊ីសង។
ក្រោយពីសាលក្រមត្រូវបានប្រកាសជាសាធារណៈ នារីស៊ីឈ្នួលមើលវង់ល្បែងស៊ីសង(ឆ្នោត កន្ទុយលេខ) ទាំង៦នាក់បានសម្រក់ទឹកភ្នែកស្រែកទ្រហោយំគ្រប់គ្នា ដោយហួសចិត្តថា ពួកគេគ្រាន់តែជាអ្នកស៊ីឈ្នួលយកប្រាក់ខែចិញ្ចឹមក្រពះ១ខែ៤០ដុល្លារប៉ុណ្ណោះ មិនគួរមានទោសជាប់ពន្ធនាគារយ៉ាងដូច្នេះសោះ។ ផ្ទុយទៅវិញថៅកែដែលមានឈ្មោះហាក់ អៀងហួរ ភេទប្រុស អាយុ៤៣ឆ្នាំ ជាអាណិកជនខ្មែរមកពីប្រទេសញូវសឺឡែន និងប្រពន្ធបែរជាបានរួចខ្លួនទៅវិញ។
នារី៦នាក់ដែលតុលាការសាលាដំបូងរាជធានីភ្នំពេញសំរេចផ្តន្ទាទោសពីបទល្មើសស្តីពីការបង្ក្រាបល្បែងស៊ីសង ១-ឈ្មោះប៉េង ចាន់ពៅ អាយុ២២ឆ្នាំ , ២-ឈ្មោះប៉េង ចាន់ស អាយុ១៩ឆ្នាំ , ៣-ឈ្មោះ ជិន ស្រីពៅ អាយុ២៣ឆ្នាំ,៤-ឈ្មោះរស់ ផាន្នី អាយុ២២ឆ្នាំ ,៥-ឈ្មោះឈន ធីតា អាយុ២០ឆ្នាំ និង៦-ឈ្មោះរិន ស៊ាងឡេន ហៅដា អាយុ២៣ឆ្នាំ ពួកគេសុទ្ធតែមានអាសយដ្ឋាននៅតាមបណ្តាខេត្តផ្សេងគ្នា និងបានមកប្រកបមុខរបរស៊ីឈ្នួលមើល ឬបូកបញ្ជីឆ្នោតកន្ទុយលេខតាមកុំព្យូទ័រឱ្យថៅកែឈ្មោះហាក់ អៀងហួរ ដែលមានទីតាំងនៅផ្ទះគ្មានលេខ ដីឡូត៍ ផ្លូវបណ្ឌិតម៉ុងឫទ្ធី ភូមិទួលគោក សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។
គួរបញ្ជាក់ថា នៅវេលាម៉ោង៣ និង២០នាទីរសៀល ថ្ងៃទី១៩ មីនា ប៉ូលិសព្រហ្មទណ្ឌកំរិតស្រាលរាជធានីភ្នំពេញ ដឹកនាំដោយលោកវរសេនីយ៍ត្រីផែង វណ្ណៈ និងបានការចូលរួមពីសំណាក់លោកគឺ ប៊ុណ្ណារ៉ា ព្រះរាជ អាជ្ញារងបានឆ្មក់ចូលបង្ក្រាបទីតាំងវង់ល្បែងស៊ីសងខុសច្បាប់១កន្លងនោះ។ ក្រោយពីសមត្ថកិច្ចឆ្មក់ចូលបង្ក្រាបបាននារីស៊ីឈ្នួលបំរើការងារ៦នាក់ រួមនឹងវត្ថុតាងមួយចំនួនត្រូវដកហូតដូចជាប្រាក់ដុល្លារ៣.៤០០ដុល្លារ លុយខ្មែរ៤លាន៣សែនរៀល ម៉ាស៊ីនហ្សាក់២៦គ្រឿង ម៉ាស៊ីនព្រីនធ័រ១គ្រឿង កុំព្យូទ័រ២គ្រឿង កាស្យូគិតលុយ១១គ្រឿង រថយន្ត២គ្រឿង និងឯកសារមួយចំនួនទៀត។ បន្ទាប់ពីឃាត់ខ្លួននារីទាំង៦នាក់ និងវត្ថុតាងត្រូវបានសមត្ថកិច្ចកសាងសំណុំរឿងបញ្ជូនទៅកាន់សលាដំបូងរាជធានីភ្នំពេញ ពួកគេត្រូវបានតំណាងអយ្យការធ្វើការសាកសួរ និងបន្ទាប់មកបានចោទប្រកាន់ជាផ្លូវការបញ្ជូនទៅចៅក្រមពីបទបើកលេងល្បែងស៊ីសងខុសច្បាប់។
សំណុំរឿងនេះត្រូវបានលោកឌិន ស៊ីវុទ្ធី ចៅក្រមស៊ើបសួរដាក់ជំរះផ្ទាល់កាលពីល្ងាចថ្ងៃទី២២ មីនា សវនាការផ្ទាល់នោះត្រូវបានតុលាការសំរេចផ្តន្ទាទោសនារីទាំង៦នាក់ឱ្យមានទោសក្នុងម្នាក់៣ឆ្នាំ តែទោសនេះត្រូវអនុវត្តក្នុងពន្ធនាគារម្នាក់១ឆ្នាំ នៅសល់២ឆ្នាំត្រូវព្យួរ។ តុលាការតម្រូវឱ្យប្តឹងជំទាស់តាមផ្លូវច្បាប់ និងអាចចេញដីកាឱ្យចាប់ខ្លួនថៅកែបើកវង់ល្បែងស៊ីសងមកផ្តន្ទាទោសផងដែរ។ មតិមហាជនបានយល់ឃើញថា ការវិនិច្ឆ័យរបស់តុលាការទៅលើនារី៦នាក់នោះ ហាក់ដូចជាធ្ងន់ធ្ងរពេកណាស់ បានជាមានការអះអាងយ៉ាងដូច្នេះពីព្រោះពួកគេគ្រាន់តែជាអ្នកស៊ីឈ្នួលយកប្រាក់កំរៃតិចតួចគ្រាន់ចិញ្ចឹមក្រពះប៉ុណ្ណោះបែរជាមានទោសដោយពុំដឹងខ្លួនទៅវិញ ៕
ចែករំលែកព័តមាននេះ