រាជធានីភ្នំពេញ ៖ សពស្រ្តីម្នាក់ដែលមានអាយុក្រោម៣០ឆ្នាំ ត្រូវបានកម្មករអ្នកធ្វើអនាម័យនៅក្នុងផ្ទះសំណាក់យីហោ ABC ដែលមានទីតាំងស្ថិតនៅភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ ប្រទះឃើញស្លាប់នៅក្រោមគ្រែក្នុងបន្ទប់លេខ៤១៥។ សពស្ត្រីរូបនេះគឺស្លាប់ក្នុងអំពើឃាតកម្មវាយសំលាប់ពីសំណាក់ឃាតកមិនស្គាល់អត្តសញ្ញាណ ហើយញាត់សពចូលក្រោមគ្រែបំបិទដាន។ សពស្ត្រីខាងលើនេះពុំទាន់ត្រូវបានគេស្គាល់អត្តសញ្ញាណនៅឡើយ។ ការសំលាប់ស្ត្រីម្នាក់នៅក្នុងផ្ទះសំណាក់នោះពុំទាន់មានប្រភពព័ត៌មានណាមួយអះអាងថា ជាអំពើសំលាប់ប្លន់យកគ្រឿងអលង្ការពីស្ត្រីរងគ្រោះ ឬក៏ជាការសំលាប់ក្នុងរឿងរ៉ាវបែបណាច្បាស់លាស់នៅឡើយទេ។ យោងតាមការត្រួតពិនិត្យរបស់សមត្ថកិច្ចបានបង្ហាញថា នៅលើរាងកាយសាកសពមានស្លាកស្នាមវាយបំបែកផ្ទៃមុខ និងមួល.កសំលាប់។ ក្រោយពេលពិនិត្យសាកសពរួចរាល់ហើយ សមត្ថកិច្ចបានដឹកសពទៅតំកល់ទុកនៅឈាបនដ្ឋានវត្តសំបួរមាស រង់ចាំក្រែងមានសាច់ញាតិមកទទួលយកទៅធ្វើបុណ្យ។
តាមប្រភពព័ត៌មានដែលបានបំភ្លឺដោយបុគ្គលិកនៅក្នុងផ្ទះសំណាក់បានឱ្យដឹងថា ស្ត្រីរងគ្រោះបានចូលមកស្នាក់នៅក្នុងផ្ទះសំណាក់ កាលពីយប់ថ្ងៃទី២៧ តុលា វេលាម៉ោង៨ជាមួយភ្ញៀវប្រុសៗ៣នាក់ ក្នុងនោះមានក្មេងស្ទាវ២នាក់ និងបុរសចំណាស់ម្នាក់។ នៅយប់ដដែលនោះបុរសចំណាស់បានចូលសំរាកនៅក្នុងបន្ទប់លេខ៤១៥ ជាមួយស្ត្រីដែលស្លាប់នេះ ហើយក្មេងស្ទាវ២នាក់ទៀត ចូលដេកនៅក្នុងបន្ទប់លេខ៤០៣ ជាន់ទី៤ ដូចគ្នា។ ប្រភពព័ត៌មានដដែលបានឱ្យដឹងបន្តថា លុះព្រឹកឡើងថ្ងៃទី២៨ តុលា ក្រុមប្រុសៗទាំងបីនាក់ បានចុះពីបន្ទប់ផ្ទះសំណាក់ទៅបាត់ដោយមានរថយន្ត១គ្រឿងមកទទួលយកផង។ ដោយឡែកស្ត្រីរងគ្រោះពុំមាននរណាចាប់អារម្មណ៍ឡើយថា បានចេញពីផ្ទះសំណាក់ ឬក៏អត់ គឺទាល់តែព្រឹកថ្ងៃទី២៩ តុលា ទើបមានការភ្ញាក់ផ្អើលពីកម្មករអនាម័យ ដោយសារបានធុំក្លិនស្អុយជះចេញពីសាកសពដែលដេកស្លាប់នៅក្រោមគ្រែប្រអប់មានពូក។ ប្រភពព័ត៌មានដដែលបាននិយាយថា កាលពីយប់ថ្ងៃទី២៧ តុលា នោះ អ្នកទទួលភ្ញៀវចូលដេកក្នុងបន្ទប់ផ្ទះសំណាក់ បានកត់ត្រាអត្តសញ្ញាណភ្ញៀវដែលចូលមកដេកនៅបន្ទប់លេខ៤១៥ ជាបន្ទប់ប្រទះឃើញសាកសពនោះ គឺមានឈ្មោះឡុង មានលេខទូរស័ព្ទ០៨៩ ៨៩៣ ១៩៨។ ករណីនេះសមត្ថកិច្ចកំពុងធ្វើការស្រាវជ្រាវហើយ។
អ្វីជាការកត់សំគាល់ និងជាកំហុសឆ្គងរបស់ម្ចាស់ផ្ទះសំណាក់ក្នុងការធានាសន្តិសុខសុវត្ថិភាពជូនភ្ញៀវដែលចូលមកស្នាក់នៅក្នុងផ្ទះសំណាក់នោះ គឺផ្ទះសំណាក់ពុំមានដាក់់កាម៉ារ៉ាចាប់រូបភាពមនុស្សចេញចូលទេ។ ជាងនេះទៅទៀតក៏គ្មានការកត់សំគាល់ពីអត្តសញ្ញាណមនុស្សដែលចូលស្នាក់នៅក្នុងផ្ទះសំណាក់ឱ្យបានច្បាស់លាស់ដែរ ហើយធ្ងន់ធ្ងរជាងនេះទៅទៀតនោះ គឺក្នុងចន្លោះយប់ថ្ងៃទី២៨ ឈានចូលថ្ងៃទី២៩ តុលា ក៏មានភ្ញៀវប្រុសស្រីមួយគូបានចូលសំរាកក្នុងបន្ទប់ដែលមានសពនៅក្រោមគ្រែប្រអប់នោះពេញមួយយប់។ ភ្ញៀវដែលដេកនោះបានត្រឡប់ទៅវិញ ដោយមិនដឹងថា ពួកគេបានដេកលើគ្រែដែលមានសពនៅពីក្រោមបែបនេះទាល់តែសោះ។
ជាមួយនឹងហេតុការណ៍ខាងលើនេះលោកហៀក ចាន់លាង អភិបាលរងខណ្ឌមានជ័យ និងលោកសេង សាញ់ ចៅសង្កាត់ស្ទឹងមានជ័យ ជំនួសមុខឱ្យលោកគួច ចំរើន អភិបាលខណ្ឌមានជ័យ សហការជាមួយតុលាការនៃសាលាដំបូងរាជធានីភ្នំពេញ បានចេញលិខិតផ្អាកអាជីវកម្មផ្ទះសំណាក់ខាងលើនេះមួយរយៈសិន។ សមត្ថកិច្ចខ្លះនិយាយថា ការស្លាប់របស់ស្ត្រីរងគ្រោះខាងលើនេះមានអាថ៌កំបាំងច្រើន ដូច្នេះទាមទារឱ្យសមត្ថកិច្ចចាត់ការតាមនីតិវិធីឱ្យបានល្អិតល្អន់ជាមួយម្ចាស់ផ្ទះសំណាក់នេះបន្ថែមទៀត។
នេះជាករណីទី២ហើយ ដែលរឿងរ៉ាវឃាតកម្មកើតឡើងក្នុងផ្ទះសំណាក់ ដែលកាលពីសប្តាហ៍មុនស្ត្រីម្នាក់ត្រូវបានគេច្របាច់.កសំលាប់ក្នុងបន្ទប់ទាំងរូបកាយអាក្រាត។ ទោះបីជាបែបណាការសំលាប់នោះត្រូវបានសមត្ថកិច្ចវែកមុខជនជាឃាតក គឺជាអ្នកទទួលខុសត្រូវក្នុងផ្ទះសំណាក់នោះ ដែលបានចូលទៅចែចង់នារីរងគ្រោះ បន្ទាប់ពីប្រុសស្នេហ៍នាងចេញទៅបាត់ ដែលនាងនៅក្នុងបន្ទប់មិនទាន់ទាំងបានស្លៀកសំលៀកបំពាក់ផង។ ដោយសារតែការចែចង់ទទួលការបដិសេធ នាងក៏ត្រូវគេច្របាច់.កសំលាប់។ បើតាមការសារភាពប្រាប់ប៉ូលិសថា ជននោះបានរំលោភនាងដែលស្លាប់ភ្លាមៗនេះថែមទៀត។ ចំពោះហេតុការណ៍ថ្មីនេះវាលំបាកធ្វើការសន្និដ្ឋានដោយសារស្ត្រីដែលត្រូវសំលាប់នៅមានសំលៀកបំពាក់ត្រឹមត្រូវ និងមិនបានឆ្លងកាត់ការរំលោភ ឬបានរួមភេទនោះទេ៕
ចែករំលែកព័តមាននេះ