លោក Chiril Gaburici ជាអគ្គនាយកដំបូងរបស់ក្រុមហ៊ុន Molcell ដែលជាក្រុមហ៊ុនទូរស័ព្ទធំជាងគេនៅប្រទេសម៉ុលដូវ៉ា និងជាបេក្ខជនរបស់គណបក្សប្រជាធិបតេយ្យសេរីម៉ុលដូវ៉ា (PLDM) ។ ថ្ងៃទី១៨ កុម្ភៈ ២០១៥
លោក Chiril Gaburici ជាអគ្គនាយកដំបូងរបស់ក្រុមហ៊ុន Molcell ដែលជាក្រុមហ៊ុនទូរស័ព្ទធំជាងគេនៅប្រទេសម៉ុលដូវ៉ា និងជាបេក្ខជនរបស់គណបក្សប្រជាធិបតេយ្យសេរីម៉ុលដូវ៉ា (PLDM) ។ ថ្ងៃទី១៨ កុម្ភៈ ២០១៥ លោក Chiril Gaburici បានលោកប្រធានាធិបតី N.Timofti ឧទ្ទេសនាមឱ្យឡើងកាន់តំណែងជានាយករដ្ឋមន្ត្រីម៉ុលដូវ៉ា ជំនួសលោកនាយករដ្ឋមន្ត្រីបណ្តោះអាសន្ន Lurie Leanca ហើយបានរដ្ឋសភាបោះឆ្នោតឯកភាពនៅប៉ុន្មានថ្ងៃបន្ទាប់ ។
រឿងអាស្រូវក្លែងបន្លំសញ្ញាប័ត្ររបស់លោកនាយករដ្ឋមន្ត្រី Chiril Gaburici អាយុ ៣៩ឆ្នាំរូបនោះត្រូវបានធ្លាយនៅចុងខែមេសា ២០១៥ បន្ទាប់ពីប្រព័ន្ធផ្សព្វផ្សាយរកឃើញថា លោកក្លែងបន្លំសំបុត្រស្នាមជាប្រព័ន្ធតាំងពីសញ្ញាប័ត្រមធ្យមសិក្សារហូតដល់បរិញ្ញាប័ត្រគ្រប់គ្រង់អាជីវកម្ម ។ តមកសភាពការណ៍ប្រៀបដូចចាក់ប្រេងលើអណ្ដាតភ្លើងកំពុងឆេះ ខណៈរដ្ឋមន្ត្រីក្រសួងមហាផ្ទៃ Oleg Balan តំណាងឱ្យគណបក្សប្រឆាំងក្នុងរដ្ឋសភាម៉ុលដូវ៉ា ចេញមុខប្រកាស ក្ដែងៗថាលទ្ធផលស៊ើបអង្កេតបានបង្ហាញឱ្យឃើញច្បាស់ថា សំបុត្រស្នាមទាំងឡាយរបស់លោក Chiril Gaburici ពិតជាមានចេតនាក្លែងបន្លំប្រាកដមែន ។
នៅពេលបែកធ្លាយរឿងនេះឡើង ថ្ងៃទី១១ មិថុនា ២០១៥ ការិយាល័យអយ្យការជាន់ខ្ពស់ម៉ុលដូវ៉ា កោះហៅលោកនាយករដ្ឋមន្ត្រី Chiril Gaburici ទៅសាកសួរភ្លាមជុំវិញរឿងក្លែងសញ្ញាប័ត្រ ធ្វើឱ្យមានការភ្ញាក់ផ្អើលគ្រប់មជ្ឈដ្ឋានប្រជាជនទូទាំងប្រទេសម៉ុលដូវ៉ា ។
អ្នកអង្កេតការណ៍នយោបាយជាច្រើនរូបនិយាយថា ការកោះហៅនាយករដ្ឋមន្ត្រី Chiril Gaburici ចូលស្ថាប័នយុត្តិធម៌នៅរដ្ឋធានី Chisinau មិនខុសពីការកោះហៅមុខសញ្ញាប្រព្រឹត្តបទល្មើសព្រហ្មទណ្ឌដែលជិតត្រូវបានកាត់ទោសឡើយ ។ មុននេះជិតមួយខែនៅរដ្ឋធានី Chisinau និងក្រុង ធំៗផ្សេងទៀតរបស់ម៉ុលដូវ៉ា មានបាតុកម្មគគ្រឹកគគ្រេងប្រឆាំងរដ្ឋាភិបាលកណ្ដាលម៉ុលដូវ៉ាថា ជួយបិទបាំងពួកនាយទុន និងក្បាលម៉ាស៊ីនមួយចំនួនដែលគប់គិតគ្នាធ្វើឱ្យបាត់បង់ប្រាក់មួយពាន់លានដុល្លារ ពីធនាគារអាជីវកម្មរដ្ឋចំនួន៣ ។ ដើម្បីបន្ថយភ្លើងកំហឹងប្រជាជន លោកនាយករដ្ឋមន្ត្រី Chiril Gaburici ប្រកាសទាមទារឱ្យតុលាការកាត់ទោសបុគ្គលដែលមានតួនាទីដឹកនាំស្ថាប័ន សំខាន់ៗ ដូចយ៉ាងការិយាល័យប្រធានអយ្យការ, ធនាគារកណ្ដាល, គណៈកម្មការជាតិទីផ្សារ ហិរញ្ញវត្ថុ… ព្រោះអ្នកទាំងនោះតិច ឬច្រើនមានពាក់ព័ន្ធដល់ភារកិច្ចគ្រប់គ្រង់ធនាគារទាំងបីនោះ ។
ខណៈហេតុការណ៍បាត់ប្រាក់ពីធនាគារទាំងបីមិនទាន់ស្ងប់ផង ស្រាប់តែថ្ងៃទី១២ សីហា ២០១៥ លោក Chiril Gaburici ចេញមុខប្រកាសសុំលាលែងពីតំណែង ដោយប្រើសំដីកែខ្លួនយ៉ាងបិុនប្រសប់ថា «សកម្មភាពរបស់ខ្ញុំមិនមែនជាការដកថយទេ, តែជាការឈានទៅមុខទៀតដើម្បីកុំឱ្យខ្លួនត្រូវបង្ខំចិត្តក្លាយជាអាយ៉ងក្នុងមជ្ឈដ្ឋាននយោបាយ និងសំដៅកសាងរដ្ឋាភិបាលថ្មីមួយមានការអភិវឌ្ឍល្អជាងក្នុងសង្គ្រាមប្រឆាំងអំពើពុករលួយ» ។
ដូច្នេះបើគិតពីថ្ងៃទី១៨ កុម្ភៈ ២០១៥ ដល់ថ្ងៃ១២ មិថុនា លោក Chiril Gaburici ទទួលឋានៈជាអ្នកដឹកនាំរដ្ឋាភិបាលម៉ុលដូវ៉ាមិនបាន៤ខែពេញលេញទេ ៕
ចែករំលែកព័តមាននេះ