រាជធានីភ្នំពេញ ៖ សមត្ថកិច្ចនគរបាលមន្ទីរប្រឆាំងគ្រឿងញៀ.ន ក្រសួងមហាផ្ទៃ កាលពីព្រឹកថ្ងៃទី២៥ សីហា ២០១៥ បានរៀបចំធ្វើសន្និសីទសារព័ត៌មានមួយ ស្តីពីលទ្ធផលនៃការបង្ក្រាបគ្រឿងញៀ.នជាលក្ខណទ្រង់ទ្រាយធំថ្មីមួយទៀត នៅកណ្តាលរាជធានីភ្នំពេញ
រាជធានីភ្នំពេញ ៖ សមត្ថកិច្ចនគរបាលមន្ទីរប្រឆាំងគ្រឿងញៀន ក្រសួងមហាផ្ទៃ កាលពីព្រឹកថ្ងៃទី២៥ សីហា ២០១៥ បានរៀបចំធ្វើសន្និសីទសារព័ត៌មានមួយ ស្តីពីលទ្ធផលនៃការបង្ក្រាបគ្រឿងញៀនជាលក្ខណទ្រង់ទ្រាយធំថ្មីមួយទៀត នៅកណ្តាលរាជធានីភ្នំពេញ ដែលបានឃាត់ខ្លួនជនសង្ស័យចំនួន៣នាក់ បន្ទាប់ពីបង្ក្រាបក្រុមជួញដូរគ្រឿងញៀនឆ្លងដែនបានចំនួនជិត៥៥គីឡូក្រាមកន្លងមក ។
ជនសង្ស័យដែលត្រូវបានសមត្តកិច្ចនាំមកបង្ហាញមុខទាំង៣នាក់គឺ ១-ឈ្មោះ វិត សាំង ភេទប្រុស អាយុ៤៨ឆ្នាំ ២-ឈ្មោះ សួន ភក្តី ភេទប្រុស អាយុ៣៣ឆ្នាំ និង៣-ឈ្មោះ សោម ដារ៉ា ភេទប្រុស អាយុ៣៦ឆ្នាំ ។ សន្និសីទសារព័ត៌មាន ត្រូវបានធ្វើឡើងដោយលោកឧត្តមសេនីយ៍ឯក ខៀវ សាម៉ន នាយកមន្ទីរប្រឆាំងគ្រឿងញៀនក្រសួងមហាផ្ទៃ និងមានការចូលរួមពីលោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ ។
លោកឧត្តមសេនីយ៍ឯក ខៀវ សាម៉ន បានថ្លែងក្នុងសន្និសីទសារព័ត៌មាននេះថា អនុវត្តតាមអនុសាសន៍សម្តេចក្រឡាហោម ស ខេង ឧបនាយរដ្ឋមន្ត្រី រដ្ឋមន្ត្រីក្រសួងមហាផ្ទៃ និងមានការចង្អុលបង្ហាញពីសំណាក់លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ លោកឧត្តមសេនីយ៍ឯក មាស វីវិទ្ធ អគ្គលេខាធិការនៃអគ្គលេខាធិការដ្ឋានប្រយុទ្ធប្រឆាំងគ្រឿងញៀន កាលពីថ្ងៃទី២០ សីហា លោកឧត្តមសេនីយ៍ឯក ម៉ក់ ជីតូ អគ្គស្នងការរង នគរបាលជាតិ និងជាអគ្គលេខាធិការរង អាជ្ញាធរជាតិប្រយុទ្ធប្រឆាំងគ្រឿនញៀន បានបើកកិច្ចប្រជុំបូកសរុបលទ្ធផលត្រួតពិនិត្យគ្រឿងញៀន និងទិសដៅអនុវត្តការងារ ផែនការបង្ក្រាបបទល្មើសគ្រឿងញៀន ។
នៅថ្ងៃទី២១ សីហា វេលាម៉ោង៨និង៣០នាទីព្រឹក កម្លាំងរបស់ការិយាល័យប្រឆាំងការជួញដូរគ្រឿងញៀននៃមន្ទីរប្រឆាំងគ្រឿងញៀន ក្រសួងមហាផ្ទៃ ដោយមានការសម្របសម្រួលពីសំណាក់លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ បាន ធ្វើការស្រាវជ្រាវ និងចុះប្រតិបត្តិការបង្ក្រាបករណីជួញដូរ ដឹកជញ្ជួន រក្សាទុកឧបករណ៍កែច្នៃគ្រឿងញៀន(កញ្ឆា)ឆ្លងដែននៅរាជធានីភ្នំពេញមានចំនួន៤គោលដៅ ។
ក្នុងសន្និសីទសារព័ត៌មានបានបញ្ជាក់ថា ជាលទ្ធផលសម្រេចបានរួមមាន គោលដៅទី១- បានឃាត់ខ្លូនមុខសញ្ញា២នាក់ នៅតាមផ្លូវ ជា សុផារ៉ា ក្នុងសង្កាត់ទួលសង្កែ ខណ្ឌឫស្សីកែវ គឺម្នាក់ឈ្មោះ វិត សាំង គ្មានទីលំនៅពិតប្រាកដ ជាអ្នកមើលការខុសត្រូវដឹកជញ្ជួន កញ្ឆាស្ងួត ដោយបង្កប់ក្នុងកញ្ចប់កាហ្វេ និងជាអ្នករត់ការមើលផ្លូវនាំកញ្ឆាពីខេត្តប៉ាក់សេ ប្រទេសឡាវ ចូលមកកម្ពុជាតាមច្រកត្រពាំងក្រៀល ខេត្តស្ទឹងត្រែង ។ ជាមួយនេះ ក៏ជាអ្នកដឹកជញ្ជួនម៉ាស៊ីនកែច្នៃដែលនាំមកពីប្រទេសថៃ ចូលតាមច្រកបទ្វារអន្តរជាតិប៉ោយប៉ែត ខេត្តបន្ទាយមានជ័យ មកស្តុកទុកនៅឃ្លាំងសម្រាប់ដំណើការគ្រីបនិងវេចខ្ចប់ ។ ឯម្នាក់ទៀត ឈ្មោះ សួន ភក្តី ត្រូវជាប្អូនថ្លៃរបស់ឈ្មោះ វិត សាំង ជាអ្នកដំឡើងម៉ាស៊ីន និងប្រើប្រាស់ម៉ាស៊ីនគ្រីប កិនក្រឡុក ដោយយកកញ្ឆាស្ងួតដែលកិនរួចទៅកែច្នៃ លាយនិងចម្រាញ់ជាប្រេងកញ្ឆា ។ ពេលសមត្ថកិច្ចឃាត់ខ្លួនជនសង្ស័យ២នាក់នេះហើយ ទើបឈានទៅចាប់់យកកញ្ឆាស្ងួត ៤ការុង ស្មើនឹង១០០គីឡូក្រាម ជាកញ្ចាក្រៀមគ្រីបរួច ។
គោលដៅទី២- ក្រោយពីឃាត់ខ្លួនជនសង្ស័យ២នាក់នោះហើយ សមត្ថកិច្ចបានបន្តទៅឆែកឆេរផ្ទះស្តុកកញ្ឆានៅក្នុងបុរីមង្គលភ្នំពេញ ផ្ទះលេខG២១ ផ្លូវលេខ២១ ភូមិទួលគោក សង្កាត់ទួលសង្កែ ខណ្ឌឫស្សីកេវ មួយកន្លែងទៀត បានរកឃើញនិងចាប់ដកហូតកញ្ឆាស្ងួតចំនួន៥៧ការុង មានទម្ងន់១.៣៨៧គីឡូក្រាម កញ្ឆាក្រៀមគ្រីបរួច និងប្រេងកញ្ឆា១,៥គីឡូក្រាមទៀត ។
គោលដៅទី៣-នៅថ្ងៃដដែលនោះដែរ វេលាម៉ោង១០យប់ បានបន្តចុះទៅផ្ទះគ្មានលេខ ផ្លូវលំ ភូមិស្ទឹងមានជ័យ សង្កាត់ស្ទឹងមានជ័យ ខណ្ឌមានជ័យ សមត្ថកិច្ចបានឃាត់ខ្លួនជនសង្ស័យម្នាក់ទៀត ដែលជាមេខ្លោងផងដែរ ឈ្មោះ សោម ដារ៉ា ជាអ្នកទទួលលុយកាក់ពីផលដែលលក់បាន ពីមេខ្លោងធំម្នាក់ទៀតជាជនបរទេស និងជាអ្នកចាត់ចែង ដំណើរការជួញដូរ ដឹកជញ្ជួន រក្សាទុក កែច្នៃ គ្រឿងញៀនឆ្លងដែននេះ ។
ជនឈ្មោះ សោម ដារ៉ា ជាមេខ្លោងធំម្នាក់នៅស្រុកខ្មែរ ចេះនិយាយភាសាអង់គ្លេសច្បាស់ និងធ្លាប់ធ្វើដំណើរទៅខេត្តប៉ាក់សេ ប្រទេសឡាវរួមជាមួយជនជាតិនូវែលហ្សេឡង់ម្នាក់ ដែលជាមេខ្លោងនៅក្រៅប្រទេស ។
គោលដៅទី៤-នៅព្រឹកថ្ងៃទី២២ សីហា សមត្ថកិច្ច និងតំណាងអយ្យការអមសាលាដំបូងរាជធានីភ្នំពេញ បានបន្តនីតិវិធីចុះឆែកឆេរឃ្លាំងលាក់ម៉ាស៊ីន និងឧបករណ៍ រួមទាំងសម្ភារមួយចំនួនដែលពាក់ព័ន្ធនឹងបទល្មើស នៅដីឡូត៍មួយកន្លែងគ្មានលេខ ផ្លូវលំ សង្កាត់ទួលសង្កែ ខណ្ឌឫស្សីកែវ ។ នៅក្នុងដីឡូត៍នោះ មានបន្ទប់ធំមួយលាក់ម៉ាស៊ីន និងឧបករណ៍ ព្រមទាំងសម្ភាររួមមាន ម៉ាស៊ីនធំសម្រាប់គ្រីប និងចម្រាញ់ប្រេង ឧបករណ៍សម្ងួត១ ម៉ាស៊ីនកិនក្រឡុកលាយ១គ្រឿង ជើងម៉ាស៊ីនទាញ១ ឧបករណ៍សម្រាប់តបណ្តាញភ្លើង ដូយធំ១ ម៉ូទរ័ ខ្សែពាន ថង់ប្លាស្ទិកសម្រាប់វេចខ្ចប់ សម្បកកេស ឡាំងសម្រាប់ច្រកកាហ្វេម៉ាកដាវ សម្រាប់ច្រកបន្លំពេលដឹកជញ្ជួនចេញ និងសម្ភារជាច្រើនទៀត ។
ជាសរុប លទ្ធផលដែលសមត្ថកិច្ចនគរបាលមន្ទីរប្រឆាំងគ្រឿងញៀនបង្ក្រាបបានរួមមាន ឃាត់ខ្លួនជនសង្ស័យ៣២នាក់ ក្នុងនោះមានម្នាក់ជាមេខ្លោង ទទួលប្រាក់ពីមេខ្លោងជាជនបរទេស និងធ្វើការចាត់ចែងក្នុងស្រុក ។ ការចាប់យកវត្ថុតាងសារធាតុញៀនប្រភេទកញ្ឆាស្ងួតទម្ងន់ ១.៤៨៧ គីឡូក្រាម ស្មើនឹងទឹកប្រាក់ជាង៧លានដុល្លារអាមេរិក ប្រេងចម្រាញ់ចេញពីកញ្ឆាទម្ងន់១,៥០គីឡូក្រាម ស្មើនឹងទឹកប្រាក់ជិត១០ម៉ឺនដុល្លារអាមេរិក (ប្រេងកញ្ឆា១គីឡូក្រាមមានតម្លៃ៥ម៉ឺន៦ពាន់ដុល្លារ) ព្រមទាំងសម្ភារមួយចំនួនទៀតដូចបានរៀបរាប់ខាងលើ ។
លោកឧត្តមសេនីយ៍ឯក ខៀវ សាម៉ន បន្តថា បើតាមប្រភពព័ត៌មានពីទីភ្នាក់ងារព័ត៌មាន AFP អូស្ត្រាលី និង DEA អាមេរិក បញ្ជាក់ថា តម្លៃទីផ្សារងងឹតនៅប្រទេសអូស្ត្រាលី និងសហរដ្ឋអាមេរិក កញ្ឆាស្ងួតក្នុង១គីឡូក្រាម គិតជាប្រាក់មធ្យម៥.០០០ដុល្លារអាមេរិក ចំណែកប្រេងកញ្ឆា១គីឡូក្រាម តម្លៃ៥ម៉ឺនដុល្លារអាមេរិក ។ ដូច្នេះ កញ្ឆាដែលសមត្ថកិច្ចនគរបាលមន្ទីរប្រឆាំងគ្រឿងញៀនយើងបង្ក្រាប និងចាប់ដកហូតបានមកនេះ បើគិតជាទឹកប្រាក់ស្មើនឹង៧.៤៣៥.០០០អាមេរិក ។
ក្រោយពីសមត្ថកិច្ចបង្ក្រាប និងចាប់ខ្លួនជនសង្ស័យ៣នាក់នោះ ទើបយើងទទួលបានចម្លើយសារភាពរបស់ពួកគេថា កញ្ឆាស្ងួតនេះគេនាំមកពីប្រទេសឡាវ(ប៉ាក់សេ)ដឹកជញ្ជួនតាមផ្លូវគោក បង្កប់ក្នុងកេសនិងស្បោងកាហ្វេដាវ ចូលតាមច្រកត្រពាំងក្រៀល ខេត្តស្ទឹងត្រែង មកកាន់រាជធានីភ្នំពេញ ដែលមានមេខ្លោងធំជាជនជាតិនូវែលហ្សេឡង់ ទាក់ទងជាមួយមេខ្លោងក្នុងស្រុក ផ្តល់លុយឲ្យចាត់ចែងរាល់សកម្មភាពទាំងអស់ រួមទាំងជួលទីតាំងធ្វើសកម្មភាពផងដែរ ។
លោកឧត្តមសេនីយ៍ឯក ម៉ក់ ជីតូ អគ្គស្នងការរងនគរបាលជាតិ និងជាអគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀនមាននប្រសាសន៍ថា ក្នុងឆ្នាំ២០១៥ មន្ទីរប្រឆាំងគ្រឿង ញៀនដែលលោកបានទៅទទួលការងារនេះ បើកកិច្ចបង្ក្រាបករណីជួញដូរ និងផលិតគ្រឿង ញៀនជារូបភាពធំៗ រួមទាំងចាប់មេខ្លោងបាន២ករណីមកហើយ ។ កាលពីលើកមុន បង្ក្រាបបាន ១ករណី ឃាត់ខ្លួនជនសង្ស័យ៤នាក់ ក្នុងនោះមានមេខ្លោងម្នាក់ឈ្មោះ លីវ សឺ និងស្ត្រីម្នាក់ ជនជាតិចិន២នាក់ ចាប់យកវត្ថុតាងថ្នាំញៀនជិត៥៥គីឡូក្រាម ដែលនាំមកពីខេត្តស្ទឹងត្រែងដែរ ។ លោកឧត្តមសេនីយ៍ឯក មានប្រសាសន៍ទៀតថា ជនសង្ស័យត្រូវបានសាលក្រមសាលាដំបូងរាជធានីភ្នំពេញ ឃុំខ្លួនដាក់ពន្ធនាគារ និងកំពុងស្ថិតក្រោមការស៊ើបអង្កេតមិនទាន់ចប់នៅឡើយទេ ។
លោកអគ្គស្នងការរង ម៉ក់ ជីតូ បន្តថា សមត្ថកិច្ចយើងនៅបន្តស្រាវជ្រាវ និងឈានទៅចាប់ខ្លួនករណីជួញដូរ និងផលិតគ្រឿងញៀនធំៗបន្តទៀត ដោយមិនរាប់បញ្ចូលចាប់ពី១គីឡូក្រាមឡើងទៅនោះទេ ។ លោកមានជំនឿថា សមត្ថកិច្ចនគរបាលមន្ទីរប្រឆាំងគ្រឿងញៀនគ្រប់ជំនាញ មានការខិតខំប្រឹងប្រែងណាស់ ។
លោកក៏បានចាប់អារម្មណ៍ដែរថា ថ្មីៗនេះយើងបានពិនិត្យឃើញថា នគរបាលរាជធានីភ្នំពេញក៏មានការខិតខំបង្ក្រាបបទល្មើសគ្រឿងញៀននេះដែរ ។ ជាក់ស្តែង សម្បុកជួញដូរគ្រឿងញៀនដែលបង្ក្រាបមិនចេះរីងស្ងួតនៅភូមិត្រពាំងឈូក សង្កាត់ទឹកថ្លា ខណ្ឌសែនសុខ ចុះចាប់បានក្រុមជួញដូរ ចែកចាយ និងប្រើប្រាស់ជិត១០០នាក់ ។ នៅតាមបណ្តាខេត្តទូទាំងប្រទេស ក៏មានកិច្ចប្រជុំជាប្រចាំខែ ពីសំណាក់លោកនាយអគ្គស្នងការនគរបាលជាតិ ឲ្យប្រើប្រាស់កម្លាំងជំនាញបង្ក្រាបបទល្មើសគ្រឿងញៀននេះឲ្យក្តៅគគុក ចៀសវាងបង្កគ្រោះថ្នាក់ដល់សន្តិសុខសង្គម ៕
ចែករំលែកព័តមាននេះ