សារព័ត៌មានបរទេស កាលពីពេល ថ្មីៗកន្លងមកផ្សាយថា អាជ្ញាធរជប៉ុនមិនអាចផ្គត់ផ្គង់ប្រាក់ឧបត្ថម្ភលើពលរដ្ឋមានអាយុគម្រប់១០០ឆ្នាំទៀតទេ ព្រោះចំនួនពលរដ្ឋដែលមានអាយុ១០០ឆ្នាំកើនឡើងខ្ពស់ជាលំដាប់ ។
សារព័ត៌មានបរទេស កាលពីពេល ថ្មីៗកន្លងមកផ្សាយថា អាជ្ញាធរជប៉ុនមិនអាចផ្គត់ផ្គង់ប្រាក់ឧបត្ថម្ភលើពលរដ្ឋមានអាយុគម្រប់១០០ឆ្នាំទៀតទេ ព្រោះចំនួនពលរដ្ឋដែលមានអាយុ១០០ឆ្នាំកើនឡើងខ្ពស់ជាលំដាប់ ។ ការផ្តល់ប្រាក់ឧបត្ថម្ភដល់ពលរដ្ឋមានអាយុ១០០ឆ្នាំ ក្លាយជាទំនៀមទម្លាប់ដែលដំណើរការតាំងពីឆ្នាំ១៩៦៣មក ។
ជារៀងរាល់ឆ្នាំរដ្ឋាភិបាលជប៉ុនផ្តល់ប្រាក់ឧបត្ថម្ភដល់ចាស់ជរាអាយុគម្រប់១០០ឆ្នាំ ដោយអំឡុងពេលផ្តល់ដំបូងមានពលរដ្ឋអាយុគម្រប់១០០ឆ្នាំ ត្រឹមតែ១៥៣នាក់ប៉ុណ្ណោះ ប៉ុន្តែ៥ទសវត្សក្រោយមកមានពលរដ្ឋអាយុ១០០ឆ្នាំ បានកើនឡើងយា៉ងឆាប់រហ័ស ។ នៅក្នុងឆ្នាំ២០១៤ប្រជាជនដែលមានអាយុលើសពី១០០ឆ្នាំ មានចំនួន២៩.៣៥៧នាក់ និងបានចាត់បញ្ចូលជាប្រទេសមានពលរដ្ឋវ័យចំណាស់ច្រើនបំផុតនៅលើពិភពលោកដោយច្រើនជាង១ភាគ៤នៃចំនួនពលរដ្ឋមានអាយុពី៦៥ឆ្នាំឡើង ។
លោកអាគីរា៉ យា៉ណាសេ មន្ត្រីក្រសួងសុខាភិបាល និងយុវនីតិសម្បទារបស់ជប៉ុនថ្លែងថា «កញ្ចប់ប្រាក់ឧបត្ថម្ភជាអនុស្សាវរីយ៍មានតម្លៃប្រហែល៨.០០០យ៉េន ឬ៥៧ដុល្លារ ធ្វើឱ្យរដ្ឋាភិបាលត្រូវបង្កើនប្រាក់ដ៏មហាសាលដល់ទៅ២៦០លានយ៉េន ឬ២លានដុល្លារ» ។
បច្ចុប្បន្នរដ្ឋាភិបាលជប៉ុនកំពុងពិចារណាដើម្បីកាត់បន្ថយថ្លៃចំណាយឱ្យនៅតិចជាងមុន ខណៈពេលប្រទេសនៅមានបំណុលច្រើនបំផុតនៅលើពិភពលោក និងស្ថានភាពសេដ្ឋកិច្ចកំពុងធ្លាក់ចុះទើបចាំបាច់ត្រូវរិះរកយុទ្ធសាស្ត្រសន្សំសំចៃប្រាក់ ឬការចំណាយ ។
ទោះជាយ៉ាងណាក៏ដោយ អាជ្ញាធរជប៉ុនបញ្ជាក់ថា ជនជាតិជប៉ុនដែលមានអាយុគម្រប់១០០ឆ្នាំ ក្នុងឆ្នាំ២០១៥នេះ មិនបាច់បារម្ភទេ ដោយរដ្ឋនៅរក្សាទុកផែនការផ្តល់ប្រាក់ឧបត្ថម្ភដូចដើម ប៉ុន្តែនៅឆ្នាំ២០១៦ អ្នកដែលមានវ័យគម្រប់១០០ឆ្នាំទាំងអស់ ត្រូវជួបនឹងការកែប្រែដ៏ធំនេះ ៕
ចែករំលែកព័តមាននេះ