រាជធានីភ្នំពេញ ៖ រហូតមកទល់ពេលនេះ តារាសម្តែងជើងចាស់អ្នកស្រី អ៊ឹម ផល្លា នៅមិនទាន់រស់នៅក្នុងជីវភាពសមរម្យនៅឡើយទេ ប៉ុន្តែផ្ទុយទៅវិញ ជីវិតរបស់អ្នកស្រីកាន់តែដុបដាបខ្លាំង ដោយការរស់នៅផ្ទះចាស់ទ្រុឌទ្រោម…
រាជធានីភ្នំពេញ ៖ រហូតមកទល់ពេលនេះ តារាសម្តែងជើងចាស់អ្នកស្រី អ៊ឹម ផល្លា នៅមិនទាន់រស់នៅក្នុងជីវភាពសមរម្យនៅឡើយទេ ប៉ុន្តែផ្ទុយទៅវិញ ជីវិតរបស់អ្នកស្រីកាន់តែដុបដាបខ្លាំង ដោយការរស់នៅផ្ទះចាស់ទ្រុឌទ្រោម និងគ្មានអង្ករច្រកឆ្នាំង ក្រោយរើបង្វេចចេញពីផ្ទះជួលមួយកន្លែង ដោយសារគ្មានលុយបង់។
ក្នុងវ័យប្រមាណជិត៦០ឆ្នាំ អ្នកស្រី អ៊ឹម ផល្លា ឬម៉ែផល្លា (ឈ្មោះហៅក្នុងសិល្បៈ) បានផ្ញើជីវិតរសាត់អណ្តែតយ៉ាងលំបាកលំបិនបំផុត ខុសពីការសម្តែងនៅសាច់រឿងដែលពេលខ្លះអ្នកស្រីដើរតួជាអ្នកមាន មានលុយ មានមាសពាក់ស្រោចខ្លួន តែធាតុពិតខាងក្រៅក្រលំបាករកតែអង្ករច្រកឆ្នាំងគ្មាន។
បើយោងតាមការប្រកាសឲ្យដឹងពីតារាសម្តែងល្បីឈ្មោះនាង នី មុន្នីនាថ បានបញ្ជាក់ថា តារាសម្តែងជើងចាស់អ្នកស្រី អ៊ឹម ផល្លា បាននិងកំពុងជាប់ការខ្វះខាតយ៉ាងខ្លាំង បន្ទាប់ពីអ្នកស្រីបានផ្ញើខ្លួននៅក្នុងផ្ទះចាស់របស់គេមួយកន្លែង ជាមួយនឹងការខ្វះខាតទាំងទឹកប្រើប្រាស់ និអង្ករច្រកឆ្នាំង។
នី មុន្នីនាថ បានបង្ហោះសារតាមគណនេយ្យហ្វេសប៊ុករបស់នាងថា បងប្អូនប្រហែលជាស្គាល់គាត់ហើយ គាត់ឈ្មោះម៉ែផល្លា គាត់គឺជាតារាសំដែងជើងចាស់ម្នាក់ តែពេលនេះគាត់កំពុងតែជួបការពិបាកក្នុងការរស់នៅ គាត់ជួលបន្ទប់គេរស់នៅមុខពេទ្យរុស្ស៊ី ជាមួយកូនស្រីនឹងកូនប្រុស តែដោយសារតែអត់លុយឱ្យថ្លៃបន្ទប់ជួលគេ២ខែមកហើយ ទើបគេក៏ឱ្យគាត់ចេញទៅរកកន្លែងថ្មី។
នាងបញ្ជាក់ថា ដោយសារតែគាត់អត់លុយទៅជួលកន្លែងថ្មី ក៏មានអ្នកស្គាល់គាត់ម្នាក់គេអាណិតគាត់ ហើយគេមានផ្ទះចាស់ទុកចោលជាច្រើនឆ្នាំមកហើយ ក៏ឱ្យគាត់ទៅរស់នៅសិន។ គាត់ក៏បានបោសំអាត ហើយអាចរស់នៅបាន តែអត់មានទឹកប្រើទេ បានអ្នកជិតខាងឱ្យគាត់ប្រើសិន ។ ចំណែកកាងារសិល្បៈក៏មិនមានធ្វើច្រើនដូចមុនដែរ ហើយគាត់មានអាយុច្រើនទៀត។
បើតាម នី មុន្នីនាថ បានបន្តថា មានរឿងជាច្រើនទៀតនៅក្នុងជីវិតរបស់គាត់ តែពេលខ្លះគាត់និយាយប្រាប់ខ្ញុំ ពេលខ្លះគាត់មិនចង់និយាយទេ កុំអោយពុកម៉ែបងប្អូនគិតថា គាត់ចេះតែសំដែងថា អត់ តែកាពិតគាត់អត់មែន អត់ខ្លាំងណាស់ ពេលនេះកូនស្រីគាត់លឺថា មានជំងឺទៀត គាត់តេមកខ្ញុំថាអត់មានអង្ករដាំបាយហូបទេកូន ខ្ញុំបានផ្ញើឱ្យគាត់បានខ្លះហើយ ដើម្បីដោះស្រាយជីវភាពសិន អាណិតគាត់ណាស់បងប្អូន បើពុកម៉ែបងប្អូនអាណិតគាត់ ចង់ជួយគាត់តិចក្តី ច្រើនក្តី តាមតែពុកម៉ែចង់ជួយគាត់ នេះលេខរបស់គាត់ 096 777 2990 ឬមួយបងប្អូនចង់ជួយតាមខ្ញុំក៏បាននេះលេខខ្ញុំ 012.081.(482 847)។
បន្ថែមពីលើអ្វីដែលនី មុន្នីនាថ ក៏បានបង្ហោះនេះ អ្នកស្រី អ៊ឹម ផល្លា ក៏បានអះអាងប្រាប់កោះសន្តិភាពតាមទូរស័ព្ទថា បច្ចុប្បនុ្ន អ្នកស្រីពិតជាមានបញ្ហាលើផ្នែកជីវភាពប្រាកដមែន ដោយរហូតមកទល់នាពេលនេះ អ្នកស្រីមិនត្រូវបានបណ្តាផលិតកម្មណាហៅអ្នកស្រីទៅថតឡើយ។
អ្នកស្រីបញ្ជាក់ថា សព្វថ្ងៃ អ្នកស្រីកំពុងរស់នៅផ្ទះចាស់មួយកន្លែងនៅមុំស្ទឹងមានជ័យ ហើយម្ចាស់ផ្ទះនោះ គឺជាផ្ទះអ្នកស្គាល់គ្នាដែលគេឲ្យនៅ ដោយសារតែអាណិត និងឃើញអ្នកស្រីពុំមានទីជម្រក ទើបគេឲ្យនៅបណ្តោះអាសន្ន។
អ្នកស្រីថា ផ្ទះនោះ ត្រូវបានម្ចាស់គេទុកចោលជាច្រើនខែមកហើយ ហេតុនេះវាមានសភាពចាស់ និងមិនសូវស្អាត ប៉ុន្តែអ្នកស្រីបានបោះសម្អាតរួចរាល់ និងអាចរស់នៅបាន គ្រាន់តែគ្មានទឹកប្រើប្រាស់ ដោយសាររដ្ឋករទឹកបានផ្តាច់ ព្រោះផ្ទះទុកចោលយូរហើយ។
យ៉ាងណា អ្នកស្រីត្រូវបានអ្នកជិតខាងមានការអាណិតអាសូរ ដោយបានឲ្យដងទឹកពីផ្ទះគេប្រើប្រាស់ជាបណ្តោះអាសន្ន ដរាបណាអ្នកស្រីអាចមានលទ្ធភាពទៅបង់លុយនៅរដ្ឋករទឹក ដើម្បីបើកទឹកប្រើប្រាស់វិញ។
បើតាមអ្នកស្រី អ៊ឹម ផល្លា ពេលខ្លះអ្នកស្រីពិតជាគ្មានអង្ករច្រកឆ្នាំងប្រាកដមែន ដូចទៅនឹង នី មុន្នីនាថ បានអះអាងខាងលើនោះមែន ដោយសារពេលនេះ អ្នកស្រីពុំអ្វីទីពឹងនោះឡើយ ដោយសារកូនស្រីក៏មានជំងឺមិនអាចទៅរកស៊ីអ្វីបានសម្រាប់ផ្គត់ផ្គង់គ្រួសារផងដែរ។
អ្នកស្រីបញ្ជាក់ថា កន្លងមក កូនស្រីរបស់អ្នកស្រីក៏មានមុខរបរបើកហាងអ៊ុតសក់ដែរ ប៉ុន្តែដោយសាររដូវកាលជំងឺកូវីដ ទើបហាងពិបាករកស៊ី និងបានបិទ ទើបធ្វើឲ្យកូនអ្នកស្រីពិបាកចិត្តយ៉ាងខ្លាំង ហើយគិតច្រើននាំឲ្យប៉ះពាល់ដល់ខួរក្បាល ដោយពេលខ្លះនិយាយមិនដឹងខុសត្រូវ។
ទោះជាយ៉ាងណា បើទោះបីជាអ្នកស្រីបានពើបប្រទះនូវបញ្ហាជីវិតរាប់មិនអស់ក៏ដោយ ប៉ុន្តែអ្នកស្រីមិនចង់ត្អូញត្អែរប្រាប់គេឲ្យដឹងឡើយ ព្រោះខ្លាចគេពើបជ្រាយ ជាពិសេសចង្កោមអ្នកសិល្បៈដូចគ្នា ព្រោះកន្លងមកអ្នកស្រីបានជួបប្រទះនូវរឿងរ៉ាវមួយនេះរួចហើយ។ ជួបបញ្ហានេះក៏ដោយ អ្នកស្រីមិនដែលតបតជាមួយអ្នកណាម្នាក់នោះឡើយ ពោលគឺអ្នកស្រីតែងអត់ធ្មត់សម្ងំសុខ ព្រោះយើងកំពុងជួបបញ្ហាជីវភាពខ្វះខាតប្រាកដមែន រហូតមកខ្លះអ្នកស្រីដាច់ចិត្តខលសុំប្រាក់តិចតួចពីអ្នកសិល្បៈជិតស្និត ដើម្បីបានអង្ករច្រកឆ្នាំង។
អ្នកស្រី អ៊ឹម ផល្លា បានបន្ថែមថា ក្នុងកាលៈទេសៈនាពេលនេះ ប្រសិនបើអ្នកស្រីមានដើមទុនតិចតួចនោះ អ្នកស្រីនឹងបង្កើតមុខរបរវេចនំលក់ ព្រោអ្នកស្រីក៏មានជំនាញនេះដែរ ក្នុងពេលដែលអ្នកស្រីស្ទើរតែអស់សង្ឃឹមនៅក្នុងការប្រកបអាជីពសិល្បៈតទៅទៀតហើយ។
ទោះជាយ៉ាងណា បន្ទាប់ពីជួបបញ្ហាជីវភាពនេះ កាលពីពេលថ្មីៗនេះ អ្នកស្រីក៏ទទួលបានជួយឧបត្ថម្ភជួបគ្រឿងឧបភោគបរិភោគមួយចំនួនពីក្រុមការងាររបស់ឯកឧត្តម ហ៊ុន ម៉ានី ផងដែរ។
ជាការកត់សម្គាល់ កន្លងមក អ្នកស្រី អ៊ឹម ផល្លា ធ្លាប់ធ្វើការសម្រេចចិត្តចងលោតទឹកបញ្ចប់ជីវិតខ្លួនដែរ ដោយមានសារជំងឺប្រចាំកាយ និងមិនមានការសម្តែងច្រើនដូចមុន ទើបអ្នកស្រីមិនមានចំណូលសម្រាប់បង់ថ្លៃផ្ទះជួលរយៈពេលជិត៤ខែ ហើយមិនមានទីពឹង ខណៈកូនប្រុសត្រូវជាប់ឃុំនៅឡើយ។ ប៉ុន្តែដោយសារអ្នកជិតដិតជាអ្នកសិល្បៈដូចគ្នាជួយលួងលោមលើកទឹកចិត្ត និងរ៉ៃគ្នាតិចតួចដើម្បីជួយ ទើបអ្នកស្រីបានប្តូរចិត្ត ។
អំឡុងពេលនោះ អ្នកស្រីត្រូវម្ចាស់ផ្ទះជួលចាក់សោលែងឲ្យចូល ហើយសម្លៀកបំពាក់ក៏គ្មានដែរ មានតែមួយចង្កះ ហើយក៏ត្រូវអ្នកសិល្បៈជិតដិតជួយទិញឲ្យខ្លះប៉ុណ្ណោះ ។ យ៉ាងណា ក្រោយពីការអំពាវនាវពីអ្នកសិល្បៈរួមអាជីពមួយចំនួនអ្នកស្រីក៏ទទួលបានការជួយជាថវិកាមួយចំនួនពីសប្បុរសជន និងអ្នកសិល្បៈដូចគ្នា ហើយអ្នកស្រីក៏ទទួលបានការជួយឧបត្ថម្ភខ្លះៗពីសមាគមមិត្តសិល្បៈស្ម័គ្រជួយសង្គម ដែលមានលោក ហេង ឡុង ជាប្រធានផងដែរ ។
គួរបញ្ជាក់ថា អ្នកស្រី អ៊ឹម ផល្លា មានវ័យប្រមាណ៥៦ឆ្នាំ ដែលអ្នកស្រីគឺជាអតីតអ្នករបាំបុរាណម្នាក់ ហើយបានផ្លាស់ប្តូរមកសម្តែងក្នុងតួជាម្តាយ អ្នកបម្រើ មេដោះ ជាដើម អស់រយៈពេលជាង១០ឆ្នាំមកហើយ៕
ចែករំលែកព័តមាននេះ