អាកាសយានិកម្នាក់ជាប់គុកព្រោះផឹកស្រាមុនពេលហោះហើរ
នៅប្រទេសន័រវែស ជំនួយការអាកាសយានិកម្នាក់ត្រូវតុលាការសម្រេចដាក់គុករយៈពេល៦ខែ ក្រោយពីគេសារភាពថា បានផឹកស្រាវិស្គី និងស្រាបៀរតែបុ៉ន្មានម៉ោងមុនពេលយន្តហោះឡើងលើអាកាស ។
នៅប្រទេសន័រវែស ជំនួយការអាកាសយានិកម្នាក់ត្រូវតុលាការសម្រេចដាក់គុករយៈពេល៦ខែ ក្រោយពីគេសារភាពថា បានផឹកស្រាវិស្គី និងស្រាបៀរតែបុ៉ន្មានម៉ោងមុនពេលយន្តហោះឡើងលើអាកាស ។
អាកាសយានិករូបនោះបម្រើការឱ្យក្រុមហ៊ុនអាកាសចរណ៍ «អ៊ែរបាល់ទិក» (Air Baltic) ដែលចេញដំណើរពីន័រវែសឆ្ពោះទៅកោះ «គ្រីត» ក្នុងសមុទ្រមេឌីទែរ៉ាណេ ។
តុលាការបានសម្រេចដាក់គុកបុគ្គលិកស្វាគមន៍ភ្ញៀវលើជើងហោះហើរជាមួយគ្នាចំនួន២នាក់ទៀតក្នុងរយៈពេល៤៥ថ្ងៃ និង៦០ថ្ងៃ ។
សារព័ត៌មានបរទេសកាលពីពេល ថ្មីៗកន្លងមកផ្សាយថា ក្នុងសវនាការកាលពីថ្ងៃទី១៧ សីហា ២០១៥ ជំនួយការអាកាសយានិកអាយុ៣៨ឆ្នាំរូបនោះបានសារភាពថា ខ្លួន និងមិត្តរួមការងារចាប់ផ្តើមផឹកស្រានៅវេលាម៉ោង៣រសៀលរហូតដល់យប់នៃថ្ងៃទី៧ សីហា ។ ពួកគេផឹកស្រាវិស្គីចំនួន២ដប ។ លើសពីនេះសម្រាប់រូបគេផឹកស្រាបៀរមួយចំនួនទៀតមុនពេលឡើងលើយន្តហោះដឹកអ្នកដំណើរប្រហែល១០០នាក់ឆ្ពោះទៅកោះ «គ្រីត» ។
នៅមុនពេលឡើងយន្តហោះ ពួកគេត្រូវប៉ូលិសន័រវែសសុំត្រួតពិនិត្យកម្រិតជាតិស្រវឹងក្នុងឈាមឃើញថា ជំនួយការអាកាសយានិកម្នាក់នោះមានជាតិស្រវឹងនៅក្នុងឈាមខ្ពស់ដល់ទៅ១,៣៥មីល្លីក្រាមក្នុងឈាម១មីល្លីលីត្រ លើសកម្រិតកំណត់ត្រឹមតែ០,២មីល្លីក្រាមដល់ទៅ៧ដងឯណោះ ។ ក្នុងដំណាក់កាលដំបូង តុលាការសម្រេចដាក់គុកជំនួយការអាកាសយានិករូបនោះរយៈពេល៨ខែ ប៉ុន្តែត្រូវបន្ថយទោសនៅសល់៦ខែ ដោយសារគេព្រមសារភាព ខណៈពេលកាពីទែនក្នុងជើងហោះហើរនោះដែរក៏ត្រូវប៉ូលិសឃុំខ្លួនដើម្បីសាកសួរនៅថ្ងៃទី១៧ កញ្ញា ។ ចំពោះកាពីទែនមានកម្រិតជាតិអាល់កុលក្នុងឈាម០,៥៤មីល្លីក្រាម ខ្ពស់ជាងកម្រិតកំណត់ជិត៣ដង ។
ក្រុមហ៊ុនអាកាសចរណ៍ «អ៊ែរបាល់ទិក» បានចេញសេចក្តីថ្លែងការណ៍ថា ក្រុមហ៊ុនកំពុងពិចារណាលើការបញ្ឈប់ការងារបុគ្គលិកទាំង១១នាក់នោះ ។ មិនតែប៉ុណ្ណោះ ក្រុមហ៊ុនបង្កើនបទដ្ឋានការពារសុវត្ថិភាព រួមទាំងវាស់ជាតិស្រវឹងចំពោះអាកាសយានិកនៅមុនពេលហោះហើរ ៕
ចែករំលែកព័តមាននេះ