ការស្ទាបស្ទង់មតិថ្មីមួយបង្ហាញថា ពលរដ្ឋអុីតាលីជិតពាក់កណ្តាលចង់ឱ្យលោកស៊ីលវីយ៉ូ ប័រលូស្កូនី នាយករដ្ឋមន្ត្រី ដែលមានរឿងអាស្រូវផ្លូវភេទច្រើនបំផុតចុះចេញពីតំណែង ។ ក្នុងការស្ទង់មតិនោះ ៤៩ភាគរយនៃពលរដ្ឋអ៊ីតាលី៦០០នាក់ ដែលគេបានសាកសួរពីថ្ងៃទី២០ និងទី២១ មករា កន្លងមក និយាយថា លោកប័រលូ ស្កូនី គួរតែចុះចេញពីតំណែង ចំណែក៤៥ភាគរយទៀតនិយាយថា លោកប័រលូស្កូនី អាចបន្តតំណែងទៀតបាន ។
លោកនាយករដ្ឋមន្ត្រីស៊ីលវីយ៉ូ ប័រលូស្កូនី អាយុ៧៤ឆ្នាំ ប្រឈមមុខនឹងបញ្ហាផ្ទាល់ខ្លួនយ៉ាងធ្ងន់ធ្ងរទាក់ទងទៅនឹងបញ្ហាផ្លូវភេទដោយលោករងការចោទប្រកាន់ពីបទរួមភេទជាមួយស្រីពេស្យាជាច្រើននាក់ ហើយពេលនេះលោកកំពុងព្យាយាមទទួលបានការគាំទ្រពីសម្ព័ន្ធមិត្តសំខាន់ៗរបស់លោក ទោះបីជារងការចោទប្រកាន់ដោយរដ្ឋអាជ្ញាក្រុងមីឡានថា រូបលោកនៅជាមួយស្រីរកស៊ីផ្លូវភេទនៅក្នុងផ្ទះជួលក៏ដោយ ។
ជាមួយគ្នានេះ គណបក្ស PD ដែលជាបក្សប្រឆាំងធំមួយរបស់ប្រទេសអ៊ីតាលីនិយាយថា ខ្លួននឹងដាក់ញត្តិស្នើសុំឱ្យលោកប័រលូស្កូនី ចុះចេញពីតំណែង ហើយសង្ឃឹមថា នឹងប្រមូលបានហត្ថលេខាជាង១០លានពីពលរដ្ឋអ៊ីតាលីដែលប្រឆាំងលោកប័រលូស្កូនី ៕
ចែករំលែកព័តមាននេះ