រាជធានីភ្នំពេញ ៖ នៅសាលាខណ្ឌ៧មករា កាលពីព្រឹកថ្ងៃទី២១ សីហា មានបើកកិច្ចប្រជុំគណៈបញ្ជាការឯកភាពខណ្ឌ លើរបៀបវារៈចំនួន៥ចំណុច ក្នុងទិសដៅអនុវត្តសម្រាប់ខែសីហានេះ។ កិច្ចប្រជុំបានធ្វើឡើងក្រោមអធិបតីភាពលោក លីម សុភា អភិបាលខណ្ឌ និងជាប្រធានគណៈបញ្ជាការឯកភាពខណ្ឌ ដោយមានការចូលរួមពីសំណាក់លោក-លោកស្រីអភិបាលរងខណ្ឌ អធិការនគរបាលខណ្ឌ មេបញ្ជាការរងកងរាជអាវុធហត្ថខណ្ឌ នាយករដ្ឋបាលសាលាខណ្ឌ ប្រធានការិយាល័យគ្រប់ជំនាញ ចៅសង្កាត់ទាំង៨ និងប្រធានសន្តិសុខសាលាខណ្ឌ ។
របៀបវារៈចំនួន៥ចំណុចនៃកិច្ចប្រជុំនេះមាន៖
១-ផែនការស្តីពីវិធានការការពារមណ្ឌលប្រឡងសញ្ញាបត្រមធ្យមសិក្សាទុតិយភូមិ
២-ការរៀបចំមន្ត្រីទទួលបន្ទុកការងារប្រយុទ្ធប្រឆាំងអំពើជួញដូរមនុស្ស
៣-ការងារសន្តិសុខសណ្តាប់ធ្នាប់ និងអត្តសញ្ញាណប័ណ្ណ
៤-ពិភាក្សា និងដោះស្រាយបញ្ហាការងារដែលនៅសេសសល់នាខែកន្លងទៅរបស់រដ្ឋបាលសាលាខណ្ឌ
៥-សមាជិកក្នុងគណៈបញ្ជាការឯកភាពខណ្ឌឡើងថ្លែង និងបញ្ចេញមតិរៀងៗខ្លួន ។
អ្វីដែលកិច្ចប្រជុំមានការចាប់អារម្មណ៍នោះគឺខណៈលោក លីម សុភា អភិបាលខណ្ឌ ថ្លែងថា មានលោកផ្កាយ២និងលោកធំខ្លះ សុំដាក់ទូហ្គេមបាញ់ត្រីជាប្រភេទល្បែងស៊ីសង នៅក្នុងអាណាចក្រខណ្ឌ៧មករា តែលោកបានសុំទៅវិញថា មិនបានជាដាច់ខាត បើល្បែងនោះជាលក្ខណៈកម្សាន្តអនុញ្ញាតឲ្យបើកបាន ។ ទោះជាយ៉ាងណា លោកមិនបានប្រាប់ឱ្យដឹងពីអត្តសញ្ញាណលោកផ្កាយ២ និងលោកធំនោះទេ ដែលសុំដាក់ទូហ្គេមបាញ់ត្រីនោះ ។
លោកប្រធានគណៈបញ្ជាការឯកភាពខណ្ឌ៧មករា បន្តថា ចំណុចក្តៅដែលត្រូវធ្វើពាក់ព័ន្ធនឹងការងារសន្តិសុខសង្គម ជារឿងគ្រោះថ្នាក់បំផុត ដែលត្រូវបានគេរាយការណ៍ថា នៅស្តង់បុរីកីឡា ស្ថិតក្នុងសង្កាត់វាលវង់ នៅមុខអធិការដ្ឋាននគរបាលខណ្ឌ មានជនខិលខូចមួយក្រុមបានលួចលាក់ប្រព្រឹត្តបទល្មើសរកស៊ីដាប់លេខតួ លេខម៉ាស៊ីនម៉ូតូ ហើយក៏មានអាជីវករមួយក្រុមទៀតរកស៊ីទិញ-លក់ម៉ូតូអត់ពន្ធ ។ ទង្វើមិនស្របច្បាប់នេះ លោកបានរៀបចំកម្លាំងរួចអស់់ហើយនៅចាំតែពេលចុះបង្ក្រាបប៉ុណ្ណោះ។
ដោយសារពេលនេះ យើងកំពុងត្រូវការប្រើប្រាស់កម្លាំងសមត្ថកិច្ចចុះរៀបចំការពារមណ្ឌលប្រឡងសញ្ញាបត្រមធ្យមសិក្សាទុតិយភូមិ ទើបមិនទាន់ធ្វើកិច្ចការងារនោះ ៕
ចែករំលែកព័តមាននេះ