ខេត្តក្រចេះ ៖ ទីតាំងអគារប៉ុស្តិ៍នគរបាលរដ្ឋបាលអូរគ្រៀងក្នុងស្រុកសំបូរ ត្រូវបានចាប់ដំណើរការសាងសង់ធម្មតាវិញហើយ កាលពីព្រឹកថ្ងៃទី២១ សីហា បន្ទាប់ពីផ្អាកការសាងសង់រយៈពេល៥ថ្ងៃ
ខេត្តក្រចេះ ៖ ទីតាំងអគារប៉ុស្តិ៍នគរបាលរដ្ឋបាលអូរគ្រៀងក្នុងស្រុកសំបូរ ត្រូវបានចាប់ដំណើរការសាងសង់ធម្មតាវិញហើយ កាលពីព្រឹកថ្ងៃទី២១ សីហា បន្ទាប់ពីផ្អាកការសាងសង់រយៈពេល៥ថ្ងៃ ក្រោយពីមានការប្រទះឃើញគ្រាប់មិនទាន់ផ្ទុះមួយគ្រាប់កប់ក្នុងដីពេលកំពុងតែជីកគ្រឹះសាងសង់នៅចំណុចក្បាលស្ពានអូរគ្រៀង ស្រុកសំបូរ អតីតជាកន្លែងការរដ្ឋានសំណង់ចិនធ្វើផ្លូវជាតិលេខ៧ ។
អធិការនគរបាលស្រុកសំបូរលោកវរសេនីយ៍ទោ ប៊ុន ឈឿន បានឲ្យដឹងថា អគារប៉ុស្តិ៍នគរបាលរដ្ឋបាលដែលនឹងត្រូវសាងសង់នេះធ្វើពីបេតុងមានទំហំ៩X១៣ម៉ែត្រជាគំរោងសាងសង់របស់នាយកដ្ឋានស្ថាបនាក្រសួងមហាផ្ទៃ ។
គួររំលឹកថា កាលពីព្រឹកថ្ងៃទី១៧ សីហា ២០១៥ នៅពេលកំពុងជីកគ្រឹះសង់អគារប៉ុស្តិ៍នគរបាលរដ្ឋបាលអូរគ្រៀងនៅចំណុចក្បាលស្ពានអូរគ្រៀង ស្រុកសំបូរស្រាប់តែជីកប៉ះចំគ្រាប់មួយគ្រាប់ដែលកប់ក្នុងដីបណ្តាលឱ្យហុយផ្សែងទ្រលោម តែមិនផ្ទុះធ្វើឱ្យមានការភ្ញាក់ផ្អើល។ ភ្លាមៗអាជ្ញាធរបានសម្រេចផ្អាកការសាងសង់ និងបានស្នើទៅកាន់ជំនាញស៊ីម៉ាក់ដើម្បីចុះរាវរក និងយកចេញជាបន្ទាន់។
លោកអធិការបានឲ្យដឹងថា ក្នុងអំឡុងរយះពេល៥ថ្ងៃមកនេះ ក្រុមការងារជំនាញរបស់ស៊ីម៉ាក់បានមករាវយកគ្រាប់១គ្រាប់នេះចេញ និងបំផ្ទុះចោល។ គ្រាប់មួយនេះមានទំហំធំល្មម និងជាប្រភេទគ្រាប់យុទ្ឋភ័ណ្ឌដែលនៅសល់ពីសម័យសង្គ្រាមរបស់អាមេរិកដែលបានមកទំលាក់ផ្តាច់ស្ពានអូរគ្រៀងនេះកាលពីអំឡុងឆ្នាំ១៩៧០៕
ចែករំលែកព័តមាននេះ