ខេត្តកំពង់ចាម ៖ ទោះបីជាគូស្នេហ៍វ័យក្មេងមួយគូបានស្រឡាញ់គ្នាទៅវិញទៅមកនិងបានប្រព្រឹត្តរំលងប្រពៃណីរបស់ខ្មែរយ៉ាងណាក្តីនៅទីបំផុតយុវជនឈ្មោះស្រ៊ីន ស្រ៊ី អាយុ២១ឆ្នាំ ស្នាក់នៅបណ្តោះអាសន្ន សង្កាត់វិហារហ្លួង ក្រុងសួង ត្រូវទទួលរងទឹកភ្នែក ដោយសារលោកចៅក្រមគឹម លុយ ចេញដីកាឃុំខ្លួននៅថ្ងៃទី២២ មីនា ២០១១ ចោទប្រកាន់ពីបទរំលោភសេពសន្ថវៈ ហើយត្រូវបានកម្លាំងការិយាល័យប្រឆាំងការជួញដូរមនុស្ស និងការពារអនីតិជននាំទៅដាក់ពន្ធនាគារខេត្តរួចហើយ ។
តាមប្រភពលោកវរសេនីយ៍ត្រី ទុំ ចាន់ណា ប្រធានការិយាល័យប្រឆាំងការជួញដូរមនុស្សនិងការពារអនីតិជនបានប្រាប់ថា តាមអង្គហេតុនៃរបាយការណ៍របស់កម្លាំងនគរបាលក្រុងសួងឃើញថា នារីរងគ្រោះបានត្រូវរូវគ្នាក្រោយពីបានត្រឡប់មកពីមើលល្ខោនបាសាក់ដែលគេសំដែងនៅក្នុងកម្មវិធីបុណ្យកាន់អង្គវត្តជ្រៃបិទមាស នៅក្រុងសួងកាលពីយប់ថ្ងៃទី១៨ មីនា ២០១១ ហើយក៏បណ្តើរគ្នាមកដេកនៅផ្ទះរបស់យុវជនដែលត្រូវជាគូកំណាន់ចិត្តដោយបានរូមភេទជាមួយគ្នាចំនួន២ដងទៀតផង ។
លោកវរសេនីយ៍ត្រី លាង អេង អធិការនគរបាលក្រុងសួងបានប្រាប់ថា បន្ទាប់ពីទទួលបានពាក្យបណ្តឹងរបស់ឪពុកម្តាយនាងរងគ្រោះហើយនោះ រូបលោកបានចាត់កម្លាំងក្រោមឱវាទចុះទៅស្រាវជ្រាវជាបន្ទាន់ដោយបានហៅយុវជនសង្ស័យមកសួរនាំនៅអធិការដ្ឋាននគរបាលក្រុងសួងក៏បានឆ្លើយសារភាពទើបសម្រេចឃាត់ខ្លួនតែម្តងកាលពីព្រឹកថ្ងៃទី២០ មីនា។ ក្រោយពីបានរសាយកំហឹងហើយនោះ ភាគីខាងនារីរងគ្រោះបានមកទំនាក់ទំនងសុំដកពាក្យបណ្តឹងវិញព្រោះក្រោយពីបានសួរនាំមកទើបដឹងថា ពួកគេទាំង២នាក់ស្រឡាញ់គ្នាដោយពិតប្រាកដ ។ តែអ្វីៗបានហួសពេលទៅហើយព្រោះបានរាយការណ៍ជូនទៅថ្នាក់លើ ទើបត្រូវបានបញ្ជូនមកកាន់ស្នងការដ្ឋាននគរបាលខេត្តដើម្បីមានចំណាត់ការតាមច្បាប់ ។ ឈ្មោះស្រ៊ី នេះគឺជាកូនច្បងក្នុងចំណោមបងប្អូន៣នាក់ ហើយម្តាយប្រកបរបរលក់ខោអាវជជុះនៅក្រុងសួង។
គួររំលឹកថា យុវជនសង្ស័យរូបនេះមានទំនាក់ទំនងស្នេហាលួចលាក់ជាមួយនឹងនារីរងគ្រោះរយៈពេល៣ខែមកហើយដោយបានឱ្យរូបថតគ្នាទៅវិញទៅមក ធ្វើឱ្យចំណងស្នេហ៍បានចាក់ស្រេះកួចត្របាញ់ចូលគ្នា លុះពេលដែលមានកម្មវិធីបុណ្យកាន់អង្គនៅវត្តជ្រៃបិទមាស កាលពីយប់ថ្ងៃទី១៨ មីនា ពួកគេទាំង២នាក់បានដើរលេងមើលល្ខោនបាសាក់ជាមួយគ្នា។ នៅវេលាម៉ោង៨យប់បាននាំគ្នាដើរត្រឡប់មកផ្ទះវិញ អង្គុយលេងនៅខាងមុខផ្ទះរបស់ឈ្មោះស្រ៊ីនិងនិយាយសារសងគ្នាអស់ពេលប្រហែល៣ម៉ោងទើបចូលទៅនិទ្រានៅក្នុងបន្ទប់មួយតែ២នាក់នឹងបានក្រេបទឹកឃ្មុំ២ដងទៀតផង រហូតមកដល់ព្រឹកថ្ងៃទី១៩ មីនានាងឈ្មោះ«ហ.ម.រ» បានត្រឡប់ទៅផ្ទះវិញ ។
យុវជនត្រូវចោទឈ្មោះស្រ៊ីន ស្រ៊ី បានឆ្លើយសារភាពថា រយៈពេលកន្លងមករូបគេធ្លាប់បានទំនាក់ទំនងតាមទូរស័ព្ទជាមួយនាងឈ្មោះ «ហ.ម.រ» ទៅវិញទៅមក។ ក្រោយមកក្នុងពេលដែលមានកម្មវិធីបុណ្យកាន់អង្គនៅវត្តជ្រៃបិទមាសនៅថ្ងៃទី១៨ មីនា ២០១១ នាម៉ោងប្រហែលជា៨យប់ ស្របពេលដែលរូបគេកំពុងតែដើរលេងនៅក្នុងវត្តគាប់ជួនបានជួបនឹង នាងដែលរូបគេបានស្រឡាញ់។ ពេលដែល ដើរត្រឡប់មកផ្ទះវិញនាងបានដើរតាមពីក្រោយរហូតមកដល់ផ្ទះរបស់គេ (ស្រ៊ីន ស្រ៊ី) ហើយបានអង្គុយលេងរហូតដល់ម៉ោង១១យប់ នាងមិនបានដើរត្រឡប់ទៅផ្ទះវិញនោះទេគឺបានមកចូលដេកក្នុងបន្ទប់ជាមួយនឹងរូបគេនិងបានរួមរ័កចំនួន២ដងដោយមិនមានការបង្ខិតបង្ខំនោះឡើយ ៕
ចែករំលែកព័តមាននេះ