ខេត្តត្បូងឃ្មុំ ៖ ជម្លោះនៅក្នុងវង់ផឹកស៊ីមួយកន្លែង រហូតឈានផ្ទុះអំពើហិង្សា បណ្តាលឱ្យបុរសម្នាក់ ឈ្មោះ ឡេង ចាន់សាង អាយុ៣៣ឆ្នាំ រងរបួសដាច់ដៃខាងឆ្វេងហូរឈាមស្រោចពេញខ្លួន កាលពីវេលាម៉ោង៨យប់ថ្ងៃទី១៩ សីហា ២០១៥ ស្ថិតនៅក្នុងភូមិពងទឹក ឃុំរកាពប្រាំ ស្រុកត្បូងឃ្មុំ ។ ក្រោយកើតហេតុភ្លាមៗ ជនរងគ្រោះត្រូវបានសាច់ញាតិដឹកទៅសង្គ្រោះនៅមន្ទីរពេទ្យខេត្តកំពង់ចាម ចំណែកក្រុមជនដៃដល់ទាំង២នាក់ បានរត់គេចខ្លួនបាត់ស្រមោល ។
លោកវរសេនីយ៍ត្រី ឡុង សារិន អធិការរងនគរបាលស្រុកត្បូងឃ្មុំ បានឲ្យដឹងថា មុនពេលមានអំពើហិង្សាកើតឡើង គេឃើញជនបង្ករបួសស្នាម២នាក់ ម្នាក់ ឈ្មោះ ចក ផាន់ណា ភេទប្រុស អាយុ២០ឆ្នាំ និងម្នាក់ទៀត ឈ្មោះ ធី ធាន ភេទប្រុស អាយុ២២ឆ្នាំ ទាំងពីរនាក់រស់នៅភូមិពងទឹក ឃុំរកាពប្រាំ រួមជាមួយបុរសរងគ្រោះ និងមាន
អ្នកផ្សេងទៀតបាននាំគ្នាផឹកស៊ីនៅផ្ទះលក់ដូរសាច់ក្លែមមួយកន្លែង ពេលស្រវឹងក៏និយាយដៀមដាមដាក់គ្នាទៅវិញទៅមកក៏បង្កទៅជាជម្លោះឈ្លោះប្រកែកគ្នាតែម្តង ។
លោកវរសេនីយ៏ត្រី បន្តថា បន្ទាប់មកក្រុមជម្លោះបានបែកគ្នាទៅផ្ទះរៀងៗខ្លួន ស្របពេលដែលបុរសឈ្មោះ ឡេង ចាន់សាង កំពុងនៅផ្ទះរបស់ខ្លួននោះ ជនដៃដល់ទាំង២នាក់នាំគ្នាទៅស្រែកជេរ ធ្វើឱ្យជនរងគ្រោះទ្រាំមិនបាន ក៏ចុះមកប្រកែកតតាំងគ្នា ជាហេតុធ្វើឲ្យជនដៃដល់ប្រើកាំបិតប័ុងតោព្រួតគ្នាកាប់ត្រូវដៃឆ្វេងស្ទើរដាច់ រួចនាំគ្នារត់គេចខ្លួនបាត់ស្រមោល ។
រហូតមកដល់រសៀលថ្ងៃទី២០ សីហា នេះ សមត្ថកិច្ចកំពុងតាមប្រមាញ់ជនដៃដល់ដើម្បីយកមកផ្តន្ទាទោសតាមច្បាប់ ៕
ចែករំលែកព័តមាននេះ