ប្រទេសថៃ ៖ សេដ្ឋកិច្ចថៃនៅតែបង្អង់ល្បឿនសន្ទុះរបស់ខ្លួនដដែលក្នុងអំឡុងត្រីមាសទី២នេះ ស្របពេលដែលមានការបង្កើនការចំណាយសាធារណៈ ក៏ដូចជាវិស័យទេសចរណ៍មិនបានទូទាត់នឹងតម្រូវការចុះខ្សោយក្នុងស្រុកនិងការនាំចេញទំនិញជាមួយនឹងកំណើននៅពេលខាងមុខ ដែលជួបហានិភ័យដោយសារការទម្លាក់ថ្លៃប្រាក់យន់ចិន ។
តាមការអះអាងពីក្រុមប្រឹក្សាអភិវឌ្ឍន៍សេដ្ឋកិច្ចជាតិនិងសង្គម(NESDB)កាលពីដើមសប្តាហ៍នេះ GDPថៃបានកើនឡើង២,៨%ពីមួយឆ្នាំ ទៅមួយឆ្នាំក្នុងត្រីមាសទី២ឆ្នាំ២០១៥ នេះ គឺថយចុះពីអត្រា៣%ក្នុងត្រីមាសដំបូង ។កំណើនGDPដែលសមហេតុផលគឺកើនឡើង០,៤%ពីត្រីមាសមុន ។ ក្នុងអំឡុងពេលដូចគ្នានេះដែរ អង្គភាពNESDBក៏បានទម្លាក់ការព្យាករទុកនៃGDPឆ្នាំ២០១៥នេះរបស់ខ្លួនក្នុងចន្លោះ២,៧%និង២,៣%ពីការប៉ាន់ប្រមាណទុកកាលពីមុន៣ទៅ៤% ។ ចំណែកការនាំចេញទំនិញរបស់ថៃ អង្គភាពបានព្យាករទុកថា នឹងរួញខ្លី៣,៥%ពីការវាយតម្លៃទុកកាលពីមុននូវកំណើន០,២% ។ រដ្ឋាភិបាលនឹងបង្កើនខ្ទង់ចំណាយ១១,៦%ក្នុងឆមាសទី២នេះ ។
លោក Akhom Termpittayapaisith លេខាធិការទូទៅរបស់NESDB បានគូសបញ្ជាក់ថា « ការកែសម្រួលឡើងវិញគឺដោយសារតែភាពស្ពឹកឬមិនសូវមានសន្ទុះនៃកំណើនសេដ្ឋកិច្ចសកល និងភាពអវិជ្ជមាននៃសេដ្ឋកិច្ចចិនស្ថិតក្នុងអត្រា៣,១%ទៅ៣,៤% » ។
បើងាកមកសង្កេតមើលប្រតិបត្តិការនិងចក្ខុវិស័យសេដ្ឋកិច្ចរបស់ថៃក្នុងត្រីមាសទី២ឆ្នាំ២០១៥នេះ បើតាមសេដ្ឋវិទូថៃរបស់ទីភ្នាក់ងារ Kasikorn Research Co លោក Pimowan Mahujchariyawong បានប្រាប់សារព័ត៌មាន Blomberg ថា « ការទម្លាក់ថ្លៃប្រាក់យន់ចិនគឺពុំមែនជាដំណឹងល្អឡើយសម្រាប់ថៃ ស្របពេលដែលវានឹងដាក់សម្ពាធកាន់តែច្រើនមកលើការនាំចេញរបស់យើង ។ វិស័យទេសចរណ៍ និងការចំណាយរបស់រដ្ឋាភិបាលគឺជាក្បាលម៉ាស៊ីនតែពីរគត់ដែលអាចជួយជំរុញកំណើនសេដ្ឋកិច្ចបាន ។ ប៉ុន្តែចក្ខុវិស័យនេះហាក់ដូចជាកាន់តែអាប់អួទៅវិញនាពេលបច្ចុប្បន្ន ជាមួយនឹងបម្រែបម្រួលនៃប្រាក់យន់ចិន » ។ សម្រាប់ឆមាសទី១នេះ សេដ្ឋកិច្ចថៃបានកើនឡើង២,៩% នេះបើតាមការលើកឡើងរបស់លោក Arkhom ។
កំណើនក្នុងត្រីមាសទី២ត្រូវបានជំរុញដោយការចំណាយ និងការវិនិយោគសាធារណៈតាមរយៈទាំងរដ្ឋាភិបាល និងបណ្តាសហគ្រាសរបស់រដ្ឋ ។ វិស័យទេសចរណ៍បានជំរុញសេដ្ឋកិច្ចហើយមួយផ្នែកគឺបានទូទាត់នឹងភាពរួញខ្លីនៃការនាំចេញទៀតផង ។
ចំណែកកត្តាវិជ្ជមានជាច្រើនទៀតក្នុងអំឡុងឆមាសទី១នេះ នឹងបន្តដំណើរក្នុងការចំណាយ និងវិនិយោគរបស់រដ្ឋាភិបាល ក៏ដូចជាការចុះខ្សោយជាងមុននៃប្រាក់បាតថៃ ដែលនឹងជួយដល់ការនាំចេញ ។ ការិយាល័យក្រុមប្រឹក្សាអភិវឌ្ឍន៍សេដ្ឋកិច្ចជាតិបានព្យាករទុកថា ប្រាក់បាតថៃ អាចនឹងប្រែប្រួលក្នុងចន្លោះ៣៣,៥០និង៣៤,៥០ដុល្លារ ។
លោក Arkhom បានបញ្ជាក់ថា «រដ្ឋាភិបាលនឹងបន្តពន្លឿនការចំណាយថវិកា និងការវិនិយោគ ។ ម្យ៉ាងទៀតយើងបានកំណត់រួចហើយក្នុងនិន្នការជំរុញបង្កើនការចាយវាយដើម្បីជួយគាំទ្រដល់សេដ្ឋកិច្ចក្នុងស្រុក ស្របពេលដែលលក្ខខណ្ឌសេដ្ឋកិច្ចសកលលោកមិនអំណោយផល» ។ ការកើនឡើងក្នុងវិស័យទេសចរណ៍ ក៏នឹងជួយជំរុញសេដ្ឋកិច្ចផងដែរជាមួយនឹងការគ្រោងទុកនូវបរិមាណអ្នកទេសចរ៣០លាននាក់កើនឡើងពីអត្រា២៩លាននាក់ ។ ជនជាតិចិននឹងនៅតែស្ថិតក្នុងកម្រិតខ្ពស់ជាងគេដដែលក្នុងទីផ្សារទេសចរណ៍ថៃក្នុងឆ្នាំ២០១៥នេះ ។
នៅគ្រានោះដែរ លោកបានបន្តថា ប្រទេសថៃបានពិនិត្យលើកត្តាហានិភ័យមួយចំនួនដូចជាការពុះពារនៃសេដ្ឋកិច្ចពិភពលោក ដំណើរនៃបម្រែបម្រួលរូបិយប័ណ្ណ ក៏ដូចជាភាពស្ពឹកនៃតម្លៃផលិតផលកសិកម្មសកលលោក ។ ចំណែកវិស័យផលិតកម្មឧស្សាហកម្មថៃបានធ្លាក់ចុះ០,៧%ក្នុងត្រីមាសទី២នេះ ធៀបនឹងឆ្នាំទៅ។ ការប្រើប្រាស់របស់ឯកជនបានកើនឡើង១,៥% ធៀបនឹងអត្រា២,៤%ក្នុងអំឡុងពេលមុន ៕
ចែករំលែកព័តមាននេះ